شال: 2018 ءَ چہ مزن ھور ءَ زور بیگواہ کنگ بوتگیں مردمی ھکانی کارکن راشد ھسین ءِ گھار پریدہ ءَ وتی تامربندے ءَ اسلام آباد ءَ زھرشانی کنگ ءِ جار جتگ ءُ چہ مردمی ھکانی ادارھاں توار چست کنگ ءِ لوٹ کرتگ۔
آئی ءَ گوشتگ کہ منی برات راشد ھسین 2018 ءَ ڈپلومیسی ءِ رد ءَ پاکستانی ادارھانی دست ءَ چہ مزن ھور ءَ آوار جنگ ءُ پاکستان ءِ دست ءَ دیگ بوتگ۔ پد ءَ ھما اِنت کہ بیگواہ اِنت آئی بارو ءَ مارا ھچ گوشگ نہ بوتگ کہ چون ءُ کج ءَ اِنت۔
پریدہ ءَ گوشتگ کہ اے پنچیں سالانی تہ ءَ ما سرکار ءِ نیمگ ءَ جوڑ بوتگیں درسیں پتراں شتگ ایں ءُ چہ آمیدگساں انساپ ءِ لوٹ کرتگ۔
آئی ءَ گوشتگ کہ بیست ءُ ھپت نومبر ءَ راشد ھسین ءِ کھول پہ برات ءِ آجوئی ءَ اسلام آباد ءَ زھرشانی گدانے جنت ءُ زھرشانی ءِ رد ءَ چہ پاکستانی سرکار ءُ ادارھاں برات ءِ آجوئی ءِ لوٹ ءَ کنت۔
پریدہ ءَ گوشتگ کہ ما گوں اسلام آباد ءَ ساڑی ئیں بلوچانی ھواری ءَ آدگہ مردمی ھکانی کارکن ءُ رسانکدری کارکنانی گون ءَ لوٹ کن ایں کہ زھرشانی ءَ بھر بزور اَنت ءُ مئے توار جوڑ بہ بنت دانکہ مئے بے میاریں برات چہ چیریں زندان ءَ آجو کنگ بہ بیت۔
بنشون: تامربند/ اکس: اسکرین شارٹ
