ریڈیو زْرمبش بلوچی | ریڈیو زْرمبش بلوچی

روکپتی بلوچستان : کھنوچ، کرمان ءُ دزاپ ءَ پنچ بلوچ منشیات ءِ بھتام ءَ پاھو دیگ بیتگ۔ بنشون ءِ رد ءَ گْوستگیں روچ ءَ کھنوچ ءِ بندیگجاہ ءَ دو بلوچ رسول نارویی ء گل مھمد جھمنند رودبار منشیات ءِ بُھتام ءَ پاھو داتگ۔ رسول نارویی چار سال پیش منشیات ءِ بھتام ءَ چہ کھنوچ ءَ دزگیر کنگ بیتگ۔ گْوستگیں روچ ءَ رسول گوں مھمدی بامری نامیں مردمے ءَ ھور پاھو دیگ بیتگ۔ مھمدی بامری باروا انگت ءَ مارا دلجمیں سرپدی سر نہ بیتگ۔ ھمے وڑ ءَ گْوستگیں روچ ءَ کرمان شھر ءِ بندیگجاہ ءَ دو بلوچ "سئید ریگی ء امین جھمنند دُزاپ کہ اے وھد ءَ کرمان ءَ جھمنند بیتگ ءُ ابدُلگپور توماج جھمنند گرگان منشیات ءِ بھتام ءَ پاھو دیگ بیتگ اَنت۔ بنشون ءِ رد ءَ دوئیں مردم سَے سال پیش منشیات ءِ بھتام ءَ چہ کرمان ءَ دزگیر کنگ بیتگ اَنت۔ روکپتی بلوچستان ءِ شھر دُزاپ ءَ منشیات ءِ بھتام ءَ یاکوب اجباری پاھو دیگ بیتگ۔ یاکوب ء شیرجان جھمنند کرکروک دُزاپ چار سال پیش چہ دُزاپ ءَ منشیات ءِ بھتام ءَ دزگیر کنگ ءُ گْوستگیں روچ ءَ پاھو دیگ بیتگ۔ بنشون: دمگی اھوالکار / اکس: دامگ