ریڈیو زْرمبش بلوچی | ریڈیو زْرمبش بلوچی

ھمساھگیں ڈیھ ءُ جھان ءَ بلوچ راج ءُ راجی زْرمبشت کمک کنگی اِنت، ڈاکٹر مراد

ھمساھگیں ڈیھ ءُ جھان ءَ بلوچ راج ءُ راجی زْرمبشت کمک کنگی اِنت، ڈاکٹر مراد

OCT

08
08 / 10 / 2021 بی این ایم 73

شال: بلوچ راجی زْرمبشت (بی این ایم) ءِ کارگشاد ڈاکٹر مراد ءَ بلوچ باھوٹیانی دزگیر کنگ ایر جتگ ءُ گْوشتگ کہ اوگانستان ءِ شھر نمروز ءَ پیرمرد ملک مھمد کان مری زھگاں ھوار برگ بیتگ۔آ چہ پاکستانی زوراکیانی رکّگ ءَ لڈّ اِتگ ءُ ھمساھگیں ڈیھ اوگانستان ءَ باھوٹی زند گْوازینگ ءَ بیتگ۔ اوگانستان ءِ سرکار ءِ بدل بیگ ءَ پد چوشیں وئیلاں بلوچ راج سک بژنی اِنت۔باھوٹیانی پھریزگ بلوچ ءُ پشتون ربیت ءَ ابید جھانی کانود ءُ اسلام ءِ تہ ءَ ھم ھست اِنت۔اے ربیتانی پیلو کنگ مئے دُرسانی زمہ واری اِنت۔ آئی گْوشتگ کہ پاکستان جھانی ءُ مزھبی کانوداں لپاشان ءَ ناشر کاریں ڈیھے ءِ ارزیشت ءَ برجاہ اِنت۔چہ پاکستان ءِ زوراکیاں بلوچ راج ءَ ھوار دُرسیں ھمساھگیں ڈیھ پریشان اَنت۔اے ڈیھ اسلام ءِ نام ءَ جوڑ بیگ ءَ پد مسلمانانی کُشت ءُ کوش ءَ یک جونیں درجھے ءَ برجاہ اِنت۔آ کُشت ءُ کوش بنگالی مسلمانانی بہ بیت یا پشتون ءُ بلوچانی جھان ھچ ڈیھ ءَ انچوکیں مُدتی ءَ انچُک شھری نہ کُشتگ۔ ڈاکٹر مراد ءَ گْوشتگ کہ جھان ءَ کس ءَ پاکستان ءِ سر ءَ بیسہ کنگ ءَ پیش آئی ءِ گْوست ءُ انیگیں بابت ءَ زانگ لوٹ ایت۔اے چہ ھما اولی روچ ءَ بگر داں مرچی ریپینگ ءِ شوندات ءِ سر ءَ کار ءَ کنگ ءَ اِنت۔ھمساھگیں ڈیھ ءُ جھان ءَ بلوچ راج ءُ راجی زْرمبشت کمک کنگی اِنت داں اے دمگ ءَ پاکستان ءِ ریپینگ ءُ ناشرکاری گِر ءُ دار کنگ بہ بیت۔


بنشون: درشان | اکس: زرمبش