ریڈیو زْرمبش بلوچی | ریڈیو زْرمبش بلوچی

بلوچستان ءَ پاکستانی لشکر ءِ ھواری ءَ سیول بیوروکریسی ھم جنگی میارباریاں ھوار اِنت۔ڈاکٹر اللہ نزر

بلوچستان ءَ پاکستانی لشکر ءِ ھواری ءَ سیول بیوروکریسی ھم جنگی میارباریاں ھوار اِنت۔ڈاکٹر  اللہ نزر

OCT

11

بلوچ آجوئی دوستیں راھشون ڈاکٹراللہ نذر ءَ ھوشاپ ءَ پاکستانی لشکر ءِ مارٹر آس دیگ گوں تْردیں دانکاں ایرجتگ ءُ گْوشتگ کہ بلیدہ ءَ رامز، ھوشاپ ءَ شراتون ءُ اللہ بکش ءِ پیمیں کودکانی کوش بہ بیت یا آسکانی بازار ءَ تاج بی بی ءِ کوش پدریں جنگی میارباریے۔ایشی ءَ پاکستانی استان ءُ پاکستانی لشکر ءِ ھواری ءَ سول بیوروکریسی یکیں وڑ ءَ ھوار اَنت۔کجام وھد ءَ کہ پاکستانی لشکر جنگی میار باری یے کنت گڑا دُرساں پیش ھمے سول بیوروکریسی پاکستانی لشکر ءِ دیمپانی ءَ دیم ءَ کیت۔ ڈاکٹراللہ نذر ءَ گْوشتگ کہ پاکستانی زوراکی ءُ لشکر ءِ نیمگ ءَ تْرندیں بیھاراں ابید مردمانی گوں وتی زھگانی لاشانی ھمراھی ءَ نندانک دیگ اے گپ ءِ منانک اِنت کہ بلوچ راج ءَ یکبرے پد ءَ پاکستانی لشکر ءِ تُرس بےسوب کُرتگ۔مردم چہ لشکر ءِ بیھار ءُ تْرندیں آسراں پدکِنز نہ بیگ ءَ اَنت۔بےمیاریں مردماں پہ وتی ننگ ءِ پھازگ ءُ ھستی ءَ دُژمن ءِ دیم ءَ جُھد برجاہ دارگ ءِ سوڑگ کُرتگ۔بلے اِد ءَ سول بیوروکریسی بلوچی ءِ پوشاک گْورءَ کُرتگ ءُ مردمانی ریپینگ ءُ پاکستانی لشکر ءِ بےمیار کنگ ءِ جُھد ءَ چہ شاہ گیش شاہ ءِ وپادار جوڑ بیتگ ءُ دُرسیں سیمسراں گْوازینگ ءَ اَنت۔ راجی راھشون ءَ گْوشتگ کہ پاکستانی استان چوشیں نشانگ کنگ ءُ لس آبادی ءِ سر ءَ ماٹر آس دیگ ءُ مارا جزباتی ءُ ردیں گامگیج ءِ زورگ ءِ جُھد کنگ ءَ اِنت بلے ما ھمک چیز ءِ سوڑگ ءُ بگیری ءَ وھد ءُ جاورانی ھساب ءَ کنیں۔آجوئی جُھد ءِ دراج ءُ اوپار ءُ چکاسیں زْرمبشتے۔مردمانی اوپار ءُ داں دو دھکاں آجوئی دوستانی گون ءَ ھمراھداری ءَ زورگریں لشکر اگولو کُرتگ۔پمشکا برے ڈنک، برے بلیدہ ءُ ھوشاپ ءَ آ وتی بدیں دروشُم ءَ پدر کنگ ءَ اِنت۔ آئی گْوشتگ کہ پاکستان ءَ راجدوستیں سیاست ءِ سر ءَ پابندی جتگ ءُ زمین ءِ سر ءَ یک ھورکشانے ودی کنگ ءِ جُھد کُرتگ داں ھمے وڑیں استان لوٹوک ءُ بنجاہ پرست گل اے جاگہ پُر بہ کن اَنت ءُ دُژمن ءِ بگیری ءَ مردمانی زِدّ ءَ کم بہ کن اِنت۔چہ ایشی ءَ مردماں دمانی ءَ کمکے رس ایت بلے دُژمن مھکم ءُ جوانمرد بیت ءُ چوشیں وئیل مدامی کنت۔ھوشاپ ءَ زھگانی کوش ءِ سر ءَ ھم اے گل سول بیوروکریسی ءِ زبان ءَ گپ کنگ ءَ اَنت۔ایشاں سرپد بیگ لوٹ ایت کہ مردم پہ ملام ءَ وتی زھگانی لاشاں چاراھاں ایر نہ کن اَنے بلکیں پاکستانی جنگی زوراکی ءَ جھان ءِ دیم ءَ پدر کنگ ءَ پہ نندگ ءَ لاچار اَنت۔اِد ءَ سول بیوروکریسی ءُ ھندی سرکاری باڑھی پہ کمو زر ءَ مردمانی جوانمردی زھرشانی ءِ بھا زورگ ءَ گندگ بیگ ءَ اَنت کہ پہ یک بلوچے ءَ شرم ءِ گپ اِنت۔ ڈاکٹر اللہ نذر ءَ گْوشتگ کہ پاکستان مئے زھگاں کُشت کنت،مئے گساں پروشت کنت،مئے زندگی ءَ ازاب جوڑ کُرت کنت بلے چہ بلوچ ءِ دلاں آجوئی ءِ جنگ ءِ روکیں شھماں کُشت نہ کنت۔کہ پاکستانی استان ءِ ھمراھداری ءَ بلوچ ءِ ھستی، شرپ ءُ ننگ ءِ گپ ءَ کن اَنت،آ گْوستانک ءَ پاکستان ءِ جنگی میار باری ءَ ھوار بنت ءُ کمشرپ ءُ رُزوائی ءَ وتی نام ءَ کنگ ءَ اَنت۔اے گپ گیش اِتگ کہ گْوستانک ءِ آمیدگس ءَ انساپ بلوچ ءِ ھک ءَ بیت۔


بنشون: درشان | اکس: دامگ