ریڈیو زْرمبش بلوچی | ریڈیو زْرمبش بلوچی

مشکے ءَ پاکستانی لشکر ءَ بندیگجاہ ءَ زوراکی ءِ میان ءَ انور شھید کُرتگ۔ ڈاکٹر مراد

مشکے ءَ پاکستانی لشکر ءَ بندیگجاہ ءَ زوراکی ءِ میان ءَ انور شھید کُرتگ۔ ڈاکٹر مراد

NOV

23
23 / 11 / 2021 بی این ایم 71

شال: بلوچ راجی زْرمبشت (بی این ایم) ءِ بنجاھی کارگشاد ڈاکٹر مراد ءَ گْوشتگ کہ مشکے ءَ پاکستانی لشکر ءَ انور ء مھمود، گپور ء مھمود، زھری ھان ء جُما، امداد ء زھری ھان، رشید ء پتے مھمد دزگیر کنگ ءَ پد بیگواہ کُرتگ۔پاکستانی لشکر ءَ بندیگجاہ ءَ زوراکی کُرتگ ءُ انور ء مھمود کُشتگ ءُ لاش کھول ءِ دست ءَ داتگ۔ ڈاکٹر مراد ءَ گْوشتگ کہ اے مردمانی دزگیر کنگ ءِ وھد ءَ پاکستانی لشکر ءَ بیھار داتگ کہ اگاں اے گپ پدر بوت گڑا ایشی ءِ آسر جوان نہ بیت۔اے بیھار ءَ پد پاکستانی لشکر ءَ وتی پسو انور ء مھمود کُشگ ءِ دروشُم ءَ داتگ۔انور ءِ مستریں برات ءُ سیاد درکانودی بندیگ اَنت ءُ آیانی بابت ءَ کس ءَ سرپدی نیست۔گمان کنگ بیگ ءَ اِنت کہ پاکستانی لشکر ایشاں ھم شھید کنت۔ ڈاکٹر مراد ءِ گْوشتگ کہ پاکستانی لشکر بلوچستان ءَ گنتریں ناشرکاری کنگ ءَ اِنت۔اود ءَ زوراکی ءُ جنگی میارباری ءِ ھَد توام اِنت۔انیگیں روچاں یک نیمگے پاکستانی لشکر ءَ مردمانی بیگواہ کنگ ءِ تہ ءَ گیشی آورتگ دومی نیمگ ءَ کُشت ءُ کوش ھم گیش کنگ بیتگ۔کولواہ ءَ گْوستگیں دہ روچ ءِ تہ ءَ دو جنیناں ھوار نوہ ءَ گیش مردم آزارجاھاں برگ بیتگ اَنت۔ آئی گْوشتگ کہ پاکستان ءَ اے جنگی میار باریان ھساب دیگ لوٹ ایت۔ما اُمیت کن ایں کہ یک روچے جھان پاکستان ءِ زوراکیاں گند ایت ءُ بلوچ ءِ چکچینی ءِ گر ءُ دار کنگ ءَ وتی کِرد ءَ پیلو کنت۔ اگاں اے بری ھپتاد ءِ دھک ءِ وڑ ءَ پاکستان جنگی میارباریانی بابت ءَ جُست کنگ نہ بوت گڑا آ بنگالی ءُ بلوچاں پد آدگہ راجانی چکچینی کنگ ءَ چک ءُ پد نہ بیت۔ ڈاکٹر مراد ءَ گْوشتگ کہ پاکستان اگاں سرپد بیت کہ آ گوں رستری ءُ زوراکیاں بلوچ راج ءَ چہ راجی آجوئی زْرمبشت ءَ دزکش کنت گڑا اے آئی نازانتی اِنت۔بلوچ راج پاکستان ءِ رستری زوراکیانی دیم ءَ گوں نوکیں جوزگے ءَ دیم ءَ جُنگ ءَ انت۔ایشی ءِ آسر زوت یا دیر ءَ چہ پاکستان ءَ نجات ءُ بلوچستان ءِ آجوئی ءِ دْروشُم ءَ رس ایت۔ بنشون: درشان | اکس: زرمبش