ریڈیو زْرمبش بلوچی | ریڈیو زْرمبش بلوچی

ماں پنجگور ءَ ربیدگی مراگش کنگ ءَ نہ ھلگ بلوچ ءِ ربیدگی چکچینی اِنت۔دلمراد بلوچ

ماں پنجگور ءَ ربیدگی مراگش کنگ ءَ نہ ھلگ بلوچ ءِ ربیدگی چکچینی اِنت۔دلمراد بلوچ

SEP

23

شال: بلوچ راجی زْرمبشت۔ بی این ایم ءِ مزن کارگشاد دلمراد بلوچ ءَ وتی درشان ءَ گْوشتگ پنجگور ءَ ساز ءُ زیملی مراگشے ءَ اے گْوشگ ءُ نہ ھلگ کہ اے مراگش مئے ربیدگانی بگیر اِنت ، مئے چہ سالاں برجاھیں بے تاھیریاں گواچن کنت کہ پاکستان پہ وتی بد ءُ بیرانیں مولاں مزھب ءُ مزھب ءِ نام ءِ سر ءَ جوڑ کرتگیں توپکی رمباں پہ بلوچ راجی زْرمبش ءِ بگیری ءَ کارمند کنگ ءِ شوندات ءِ سر ءَ گامجن اِنت۔زورگریں ریاست مزھب ءَ پہ بلوچ دود ءُ ربیدگ ءِ آسر کنگ ءُ آیانی رنگ ءُ دْروشم ءِ مٹائینگ ءَ کارمرد کنگ ءَ اِنت۔ اے سری رند نہ اِنت کہ پنجگور ءَ چوشیں کارے کنگ بیگ ءَ اِنت بلکیں پیش ءَ ھم ’فرقان الاسلام‘ ءِ نام ءَ آئی ایس آئی ءِ رودینتگیں مردماں اسکولانی سر ءَ ارش کرتگ ءُ جنکیں زھگانی چہ وانگ ءِ دارگ ءِ کوشست کرتگ۔ دلمراد بلوچ ءَ گْوشتگ پنجگور ءَ 24 ستمبر ءَ التاپ ساجد اکیڈمی ءِ چیردستی ءَ ساز ءُ زیملی مراگشے ایر کنگ بیتگ اَت کہ ایشی ءِ دیم ءَ ’عالمانی نام ‘ ءِ سر ءَ سرکاری کاسگ چٹ ءُ ریاستی لشکر ءِ مردم کشیں چیرک میلانک بوت اَنت ءُ ناں ایوک ءَ ساز ءُ زیملی مراگاہ دارگ بوت بلکیں سرکاری کاسگ چٹاں تامرے پیت بند ءُ کرت شکسات کہ آئی ءِ تہ ءَ اے ساز ءُ زیملی مراگاہ ننگ ءِ سر ءَ ارش لیکگءُ مراگاہ ءِ چارگزار کوش ءِ بیھار دیگ بیتگ اَنت۔ آئی ءَ گْوشتگ اگاں نام ءِ آلم اسلامی ءُ بلوچی دودانی گپ ءَ جن اَنت گڑا آیاں چہ درساں پیش پاکستانی رستری ءُ زوراکیانی بگیری ءَ پاد آیگ لوٹ ایت کہ آ روچ ء رامانی لوگانی سر ءَ ارش کن اَنت ، جنین، چک ، کماش ءُ ورنایاں آوار جنگ ءَ پد زور بیگواھی ءِ آماچ کن اَنت۔ اگاں آ وت ءَ دودمانانی پانک سرپد اَنت گڑا آیاں نورجان ءِ زوریں بیگواھی ءُ ملکناز رنگیں بے میاریں جنین آدمانی شھیدی ءِ سر ءَ باھند کنگی اَت۔ما شر زان ایں کہ چوشیں کارانی سر ءَ آ ھچ نہ گْوش اَنت پرچا کہ چہ ایشی ءَ آیانی واجہ دل ءَ کار اَنت۔ آئی ءَ گْوشتگ زبان ءُ دود ءُ ربیدگ ءِ دیم ءَ آرگ ءَ زیمل ءُ گشندھانی مزنیں کردے بیت۔اے رنگیں جاورے ءَ کہ رسانکدر ءَ بلوچ راج، بلوچ دود ءُ ربیدگ ءِ بارہ ءَ ھچ رنگیں سرپدی درشان کنگ نہ بیت ، اے وڑیں مراگش دود ءُ ربیدگانی دیمروی ءَ مزنیں کردے پیلو کن اَنت۔ ایشانی دارگ ربیدگی چکچینی اِنت۔ بی این ایم ءِ مزن کارگشاد ءَ گْوشتگ ، ما چہ تچکیں مزھبی راھشوناں دزبندی کن ایں کہ آ بلوچ چکچینی، بلوچ ربیدگی چکچینی ءِ پجیگ ءِ مردمگری ءِ بیگری ءَ پاکستان ءِ میارانی سر ءَ ’علماء حق ‘ ءِ کرد ءَ پیلو بہ کن اَنت ءُ پاکستان ءِ دست ءِ لیبوک ءِ بیگ ءِ جاہ ءَ بلوچ راجی زْرمبش ءِ کوپگ بہ بہ اَنت۔ ما شیوار کن ایں ، اگاں راجی زْرمبش ءُ راجی ربیدگ مہ مان اَنت گڑا آ روچ مئے راجی مرگ ءِ برابر بیت۔ بنشون: درشان | اکس: بی ایم ایم