ریڈیو زْرمبش بلوچی | ریڈیو زْرمبش بلوچی

ڈیرہ بگٹی ءِ ھند سوئی ءَ سے روچ اِنت کہ زورگریں پاکستانی لشکر ءِ لشکرکشی یکشل ءَ برجاہ اِنت، پاکستانی لشکر ءَ دو براتاں ھوار دگہ چار مردم آوار جتگ ءُ بیگواہ کرتگ۔

اھوالکار ءِ رد ءَ دوشمبے ءُ سے شمبے ءِ میانی شپ ءَ زورگریں پاکستانی لشکر ءُ چیریں ادارھانی کارمنداں ادل ھان کالونی ءَ بیڑ برتگ ءُ سبزل بگٹی آوار جتگ، بگٹی کالونی ءَ بیڑ برتگ یاکوب ء شاہ مور بگٹی آوار جتگ۔ سوئی ءِ بازار ءَ گلام رسول نامیں مردمے ءِ گِس ءَ بیڑ برتگ ءُ آئی ءِ دو زھگ کریم بکش ءُ مستپا آوار جتگ ءُ گوں وت برتگ اَنت۔

اے چاریں زو بیگواھیں مردمانی گپ بیگواھیں بلوچانی توار ( وی بی ایم پی ) ءَ راست کرتگ ءُ ماں رسانکدر ءَ آیانی اکس شنگ کرتگ اَنت۔

یات بہ بہ اِت کہ ڈیرہ بگٹی ءَ ھمے لشکرکشی ءِ میان ءَ زورگریں پاکستانی لشکر ءَ چہ اے مردماں پیش یازدہ مردم آوار جتگ ءُ بیگواہ کرتگ لشکرکشی انگت ءَ برجاہ اِنت۔

بنشون ءِ رد ءَ مرچی سھب ءَ زورگریں پاکستانی لشکر ءِ چل گاڑیانی کاروانے چہ سند ءِ کشمور ءَ سوئی ءَ سر بیتگ۔ اے وھد ءَ زورگریں لشکر رستم دربار ءِ کِر ءُ کشانی ھنداں لشکرکشی کنگ ءَ اِنت۔

انچوش گوشگ بوگ ءَ اِنت کہ پاکستانی لشکر ءِ ھمراھی ءَ بلوچستان ءِ وتگڑیں وزیر سرپزار بگٹی ءِ جوڑ کرتگیں کشندہ ٹولی ءِ کارمند بازیں کچے ءَ گوں اَنت۔

بنشون ءِ رد ءَ اے وھد ءَ زورگریں پاکستانی لشکر ءِ شش جنگی بالگرد زین کوہ، اوچ ءُ کِر ءُ کشانی ھنداں سوناری، مٹ ٹھوبو، بھشک ءُ لاگردان ءَ یکشل ءَ تیر ءُ بمب گواری کنگ ءَ اَنت۔

دگہ یک ھالے ءِ رد ءَ اے وھد ءَ بلوچستان ءِ کور کمانڈر آسپ گپور ءُ آئی جی ایپ سی سوئی ءَ سر بیتگ اَنت ءُ لشکرکشی ءَ گیش تیز کنگ ءَ اَنت۔ #BalochistanCrisis

بنشون: اھوالکار / اکس: اھوالکار