ڈیرہ بگٹی/ تربت: زورگریں پاکستانی لشکر ءُ چیریں ادارھانی کارمنداں پِت ءُ چکے ءَ ھوار سے مردم آوار جنگ ءَ پد بیگواہ کرتگ۔
اھوالکار ءِ رد ءَ چہ ڈیرہ بگٹی ءِ ھند سوئی ءَ زورگریں پاکستانی لشکر ءَ دست ءَ بیگواہ کنگ بیتگیں مردمانی نام امام بکش بگٹی ء پیربکش بگٹی ءُ امام دین بگٹی ء امام بکش بگٹی اِنت کہ پاکستانی لشکر ءُ چیریں ادارھانی کارمنداں چہ سوئی ءِ توتا کالونی ءَ آوار جتگ ءُ بیگواہ کرتگ اَنت۔
امام بکش بگٹی ءُ آئی زھگ امام دین بگٹی ءِ بیگواھی ءِ گپ بلوچ ریپبلکن پارٹی ءَ راست کرتگ ءُ ماں چاگردی رسانکدر ایکس ( ٹویٹ) ءَ آیانی اکس ھم شنگ کرتگ اَنت۔
زور بیگواھیں ورنا امام دین بگٹی ءِ بارو ءَ گوشگ بیگ ءَ اِنت کہ چہ پاکستانی لشکر ءِ جوڑ کرتگیں کشندہ ٹولی ءِ کارمندانی تیرگواری ءَ ٹپی ھم بیتگ۔
بنشون ءِ رد ءَ چہ کیچ ءِ بجاھی شھر تربت ءَ زور بیگواہ کنگ بیتگیں ورنا ءِ نام رزاک ء ھالد اِنت کہ دہ تبک ءَ نودربرے۔ پاکستانی لشکر ءِ جوڑ کرتگیں چیریں ادارھانی کارمنداں چہ تربت ءِ آسکانی بازار ءَ آوار جتگ ءُ بیگواہ کرتگ۔
زور بیگواھیں رزاک ء ھالد ءِ زوریں بیگواھی ءِ گپ تربت سول سوسائٹی ءِ سروک گلزار دوست ءَ راست کرتگ ءُ ماں چاگردی رسانکدر پیسبک ءَ آئی ءِ بارو ءَ پوسٹ کرتگ۔ #BalochistanCrisis
بنشون: اھوالکار / اکس: اھوالکار
