ریڈیو زْرمبش بلوچی | ریڈیو زْرمبش بلوچی

ڈیرہ اللہ یار: بالان شاک جاپر آباد ءَ سلاہ بندیں مردماں مردمی ھکانی کارکن ھمیدہ نور ءِ پت نور اھمد ءِ ڈگارانی سر ءَ اُرش کرتگ ءُ کار کنگ ءَ نہ اشتگ لٹ شاپ کرتگ اَنت ءُ آئی پرپٹ، ٹکٹر ءُ آدگہ سامان پل اِتگ ءُ برتگ اَنت۔

اے بارو ءَ ھمیدہ نور ءِ کھول ءِ گوشگ اِنت کہ ھمیدہ نور ءِ پت نور اھمد ء اَبدراک وتی زھگ ءِ ھمراھی ءَ ڈگارانی سر ءَ کارکنگ ءَ بیتگ کہ سلاہ بندیں مردماں آیانی سر ءَ اُرش کرتگ، لٹ شاپ کرتگ ءُ تیرگواری ھم کرتگ ترسینتگ اَنت۔ گر ءُ چیل بیگ ءَ اَبید آ چہ ڈگارانی سر ءَ در کپتگ اَنت کہ راہ دگہ درزانانی کچ ءَ سلاہ بندیں مردماں انگر کرتگ ءُ لٹ شاپ کرتگ اَنت موبائل ءُ سامان پل اِتگ ءُ پروشتگ اَنت۔

بنشون ءِ رد ءَ ھندی مردم آتکگ اَنت نور اھمد ءُ آئی ءِ زھگ ءِ چہ سلاہ بندیں مردمانی دست ءَ رکینتگ ءُ چہ اود ءَ سلامتی کش اتگ اَنت۔

کھول ءِ گوشگ اِنت کہ آ زوراکیں مردم اَنت نور اھمد ءِ ڈگاراں دستیگ کنگ لوٹ اَنت۔ وئیل ءِ بارو ءَ پولیس ءِ ھال دیگ ءَ اَبید آئی ءِ پرپٹ ءُ ٹکٹر برگ بیتگ اَنت

۔ کھول ءِ گوشگ اِنت کہ نور اھمد دل ءِ نادراہ اِنت ءُ چہ لٹ شاپانی سوب ءَ زدگ بیتگ۔ مئے کھول ءَ چونیں تاوانے بوت آئی ءِ زمہ وار امداد رند ءُ پولیس اِنت۔

بنشون: اھوالکار / اکس: اھوالکار