ریڈیو زْرمبش بلوچی | ریڈیو زْرمبش بلوچی,کازی-ریھان-,شھید-واجہ-گلام-مھمد-

درگاہ شھیدانی : راھشونے کہ مدام پندلانی آماچ اَت|| بنداتی بھر || کازی ریھان

درگاہ شھیدانی :  راھشونے کہ مدام پندلانی آماچ اَت|| بنداتی بھر  || کازی ریھان

NOV

07
07 / 11 / 2020 درگاہ شھیدانی 76


 


 درگاہ شھیدانی : راھشونے کہ مدام پندلانی آماچ اَت|| بنداتی بھر || کازی ریھان


 برے برے جیڑ آں باریں ماہ ءُ روچانی یات کنگ ءَ سیتے ھست کہ مردم بہ نند ایت روچاں بہ شمار ایت۔ چوناھیا گوں من ھساب نہ بیت ، روچانی نام ءُ ماہ ءُ سالاں دلجمی نہ زان آں پمیشکا مدام ایشاں رد کپ آں۔ بلے ھمینچو یات بیت کہ سال 2014 ءَ دیم وھدے کہ من کراچی ءَ وتی وانگ نیم بندگ اشت ءُ گوادر ءَ واتر کرت ، بی ایس او ءِ تہ ءَ ناسیلی ءُ گر ءُ چیلانی میان ءَ سما کنگ کہ نی گوں من بی ایس او ءِ سیاست نہ بیت ما کم کم ءَ بی این ایم ءَ نزیک بیان بوت ایں۔بی این ایم ءَ ما ھما وھد ءَ ھوار بوت ایں کہ شہید واجہ گلام مھمد بیگواہ اَت۔


گوادر ءَ چہ ما پیش بی این ایم نیست اَت۔گوں چیئرمین ھلیل ءَ ما پیش ءَ آژناک اَت ایں ، باز رند ءَ مراگشانی تہ ءَ دوچار کپتگ اَت ایں۔ مئے ھنکین ءِ بن ھشت ایر کنگ ءَ چیئرمین ءِ ھمراھی ءَ ڈاکٹر دین مھمد ءُ ڈاکٹر ھدابکش گون اَت اَنت۔من ھما روچی زانت کہ مئے کوپگانی سر ءَ گْرانیں بارے ایر کنگ بیتگ ، انچیں بارے کہ چہ مئے بود ءُ وس ءَ گیشتر اِنت۔ من اے زمہ واری ءِ زیرگ ءَ پد داں دیر ءَ چیر ءُ زیر بوت آں ، چوناھیا منی کار وانگ ءُ نبیسگ اِنت ءُ برے برے من ماھانی ماہ چہ لوگ ءَ ڈن در نہ کپت آں ، نشت ونت ءُ نبشت۔ھما جاوراں کہ من ءَ نوکیں کارے کنگی بہ بیت من گیشتر گوں وت ءَ نز کا یاں۔ آ ھم انچیں جاورے اَت۔


من وتی ھمراھانی بارہ ءَ جیڑ اِت ، پہ نوکیں ھمراھاں جیڑ اِت ، اے جیڑ اِت کہ ما وتی باسکاں چوں پھریز اِت کن ایں ؟
آشوبی کارے چہ ایشی ءَ پیش چنچو وت ءَ چیر اندری ساڑی کنگ لوٹ ایت ءُ ما چون اے کار ءَ بہ کن ایں ، گل ءَ چہ وڑ ءَ یکجا بہ کن ایں ؟
پہ گل ءِ کاراں پوڑی چون بہ گر ایں ؟
کجام پدریں کار ءَ دست بہ جن ایں داں ما مردمانی نزیک ءَ سر بوت بہ کن ایں؟


اے جستانی پسواں پد ما وتی کار بنا کرت اَنت۔ من لوٹ اِت کہ داں ھمینچک ءَ کہ ما وتی سسائی ءُ سیاسی ھیلکاری ءَ گرگ ءَ ایں ما ھچ رنگ ءَ وت ءَ بی این ایم ءِ باسک مہ گْوش ایں بلے ھما سنگت کہ چہ مارا پیش گوں بی این ایم ءَ بندوک اَت اَنت ءُ چیراندری وتی کاراں کنگ ءَ اَت اَنت ءُ پدری ءَ گوں نیشنل پارٹی ءَ گون اَت اَنت ۔ آ سھی کنگ بوت اَنت کہ گوادر ءَ بی این ایم ءِ ھنکین ٹاھینگ بیتگ۔ بی ایس او ءِ چہ گوادر ءَ بنجاھی پتر ءِ باسک شھید کیوم کامریڈ ءَ ھم کسے ءَ گْوشتگ اَت ، پمیشکا برے برے آئی ءَ مارا شگان جتگ اَت کہ بی این ایم گوادر برکا ءِ تہ ءَ اِنت ما اے شگان گوں بچکندے ایر برتگ اَت۔ چوش ھم نہ اَت کہ من ءُ شھیدلالا ھمید آیانی مراگش، مچی ءُ زھرشانیانی تہ ءَ گون نہ اَت ایں بلکہ ما گوادر ءِ ھمک مچی ءُ جیڑھاں ھوار اَت ایں ، ایوک ءَ ما اے پدر نہ کرتگ اَت کہ ما بی این ایم ءِ باسک ایں۔


ھمے میان ءَ شہید واجہ چہ زندان ءَ در کنگ بوت ، بی این ایپ جوڑ بوت ، گوادر ءَ بی ایس او ءَ مچی یے لوٹائینت ھما مچی ءَ شہید واجہ ھم اتکگ اَت ،من چد ءُ پیش ھم شہید واجہ دیستگ اَت۔ منی گمان ءَ چہ شھید واجہ ءِ بیگواھی ءَ پیش ، گوادر ءَ من ءُ شھید اھمد داد ءَ پاکستانی کلپیں گچینکاریانی وھد ءَ ماں آر سی ڈی کلب گوادر ءَ سسا تْرانی نیادے (سیمینارے ) برجم کرت ، اے نیاد ءَ ما شھید واجہ ھم لوٹ اتگ اَت۔ آ تیوک ءَ اتکگ اَت ، آئی ءَ ملاپازل پڑ ءَ ھوٹلے ءَ داشتگ اَت ، من ءُ شھید اھمد داد واجہ ءِ وش اتک ءَ ھمود ءَ شت ایں۔ واجہ ءَ مارا دیست ھما بچکند ءُ چمانی پر مھریں رژنائی کہ مدام آئی ءِ دیم ءِ بْراہ اَت اَنت ، گوں ھمایاں مارا وش اتک کرت ءُ امبازاں زرت۔ اے ندارگ مروچی ھم منی سسایاں ھما وڑ ءَ نگار اِنت، ھروھدے من تْرانگ ءَ کپ آں ، ماں منی گمان ءَ چوش تامرے ءَ پر بیت۔شھید واجہ ءَ کسانیں بریپ کیسے گون اَت ، آ شھید اھمد داد ءَ دست گپت ءُ ما چہ ھوٹل ءَ در کپت ایں۔


بلے اے بری کہ ما شھید واجہ ڈک داتگ اَت ، مئے گل ءِ راھشون اَت ما آئی ءِ رھبرے ءَ زْرمبشت ءِ تہ ءَ وتی کرد ءِ پیلو کنگ ءِ مسام کرتگ اَت۔ما وتی من ءَ چیر اَت ایں بلے مارا وتی کماش وش اتک ھم کنگی اَت۔مردنی مارا کمو چہ شھید کیوم کامریڈ ءَ ھم ترس اتگ اَت کہ اے مرد چہ گپ ءَ پیش مارا لھتے شگان جنت ءُ مئے کار کنگ ءِ وڑ ءُ ڈولاں ڈوبار ایت۔ھمے مچی ءَ بیگواھیں راھشون زاکرمجید ءِ ھم مارا کلھے دیدار بوت ، زاکر دلمانگ اَت گوں ما گپ بہ جنت بلے شہید کیوم کامریڈ ءِ سیکورٹی پلان انچوش اَت کہ من زاکر راہ رواجی دیست ءُ کامریڈ ءَ باریں کجام جاہ ءَ برت، رند ءَ ما سھی نہ بوت ایں۔ شھید واجہ ھم بی این ایپ ءِ مراگش ءَ اتکگ اَت بلے مچی ءِ آسر بیگ ءَ پد ھم آ داں دیر ءَ تلو ءِ سر ءَ نشت ، من ، نسیم اباس ءُ شہید لالا ھمید شت ءُ آئی ءِ دیم ءَ نشت ایں۔ دست ءُ دْروت بیگ ءَ پد ما وتی پجار کرت ءُ گْوشت کہ ما بی این ایم ءِ باسک ایں ، واجہ ءَ کند اِت ءُ گْوش ئے اجکہ بوت۔من ءَ ھمینچو یات کنت کہ اے گْونڈیں نیاد ءَ مئے میان ءَ دگہ ھچ گپ ءُ تْران نہ بوت۔


چہ اے روچ ءَ پد ما جیڑ اِت کہ نی مارا وتی کار پدر کنگ لوٹ اَنت ءُ ما وتی گل ءِ کار دیم ءَ برت اَنت ، بنزہ جوڑ کرت ءُ چہ بی این ایم ءِ نیمگ ءَ مراگش اڈ دات۔ بلوچ راجی زْرمبشت بزاں بی این ایم ءِ لیکہ ءُ دیدانک مھکم اَنت ، راھشون ھما ورنا اَت اَنت کہ آیانی زندگی پچیں کتابے ءِ رنگ ءَ مردمانی دیم ءَ اَت ۔ناں کسے ءَ گوچلی کرتگ اَت ، ناں گْوستگیں سیاسی گپچلاں ھوار بیتگ۔ بلوچ راجی زرمبشت ، بی این ایم پہ راج ءَ نوکیں اوستے اَت ءُ زیت بلوچستان ءِ مستریں گلاں یکے جوڑ بوت۔ گوادر یک برے پد ءَ بلوچ راجی سیاست ءِ مزنیں بنجاھانی تہ ءَ یکے اَت۔


دو ہزار ھشت ءِ سیشن ، ملیر ءَ پالاری ءِ باگ ءَ بوت۔چہ گوادر ءَ ما ھشت باسکاں بھر زرت۔گل ءِ راجمان پتر ءَ ما گوں شہید واجہ ءَ نزیک بوت ایں ، آئی ءِ زانگ ءُ سرپد بیگ ءَ باز موہ رس اِت۔چوشیں پاس نیست اَت کہ یا و شہید واجہ راجمان پتر ءَ نشتگ اَت ءُ گوں سنگتاں گپ ءَ اَت یا و چہ پتر ءَ ڈن گوں سنگتاں نشتگ ءُ آیانی ترند ءُ تھلیں جستانی پسواں دیگ ءَ اَت۔ اے پتر ءَ ڈاکٹر امداد ءِ سروگانی ءَ بازیں نوکباھند ھم ھست اَت کہ نوک چہ بی ایس او ءَ گیش اتگ ءُ بی این ایم ءِ باسکبندی اش زرتگ اَت اے ورنایانی دل ءَ بی این ایم ءِ گْوستگیں راھشونانی کار ءُ کرد ھچ نہ بیتگ پمیشکا آیاں ھمک تک ءَ بی این ایم ءِ سر ءَ ایراد گپتگ اَت۔


ڈاکٹر امداد ءِ اے دانک دنیگت منی گوشاں جکس اَنت کہ آئی ءَ بی این ایم ءِ کارراھبند ءُ مسام دست ءَ کرت ءُ گْوشت : مارا بی این ایم ءِ کارراھبند ءُ مسام انی دمانے پیش دیگ بیتگ من دنیگت نہ ونتگ باید پیسر دیگ بوتیں۔


شھید واجہ ءَ بچکند اِت ءُ درائینت :راجمان پتر ءَ کارراھبند ءُ مسام پمیشکا بھر کنگ نہ بیت کہ آئی ءَ راجمان پتر ءِ باسک چہ سر ءَ بہ وان اَنت بلکیں اے پیسر ءَ باسکاں ونتگ ءُ اے کہ اد ءَ نشتگ اَنت اے ھمک ھنکین ءِ گچینی باسک اَنت ، اے و تئی جیڑہ اِنت کہ تو کارراھبند ءُ مسام نہ ونتگ ءُ گل ءِ باسکبندی زرتگ۔


بلے واجھیں امداد ءَ انچوش کہ مروچی کچ ءُ تت پر نیست یا کار نہ کن اَنت کہ وتی نبشتانکانی تہ ءَ دنیگت کش بری شھید واجہ ءَ ڈوبار ایت آ روچی ھم آ وتی بے مھاریں رکش ءَ سوار اَت۔ھمے نیاد ءَ درائینت ئے : گل ءِ کارگشاد کج اِنت ؟ ءُ ایراد گران ءَ گْوشت ئِے ، گلام مھمد ! من تئی گٹ ءَ گر آں ۔ گوں اے گپ ءَ پتر ءِ باسکانی گویاک بند بوت ءُ مئے تہ ءَ بازیں مردمانی چمانی کانیگ ارسین بوت اَنت۔من سری رند ءَ دیست شھید واجہ ءِ ھم رنگ پر اِت، آئی ءِ پرمھریں بچکند چہ لنٹاں بیگواہ بوت۔ آ کہ پہ بی این ایم ءِ باندات ءَ پر اوست اَت گوں پریشانیاں دوچار بوت۔ اے ھما گپ اَت کہ چہ ایشی ءَ ڈاکٹر امداد ءِ ماں راجدوست سیاست ءَ باندات ءُ کرد گیش اِت اَنت۔ بازیں سنگتانی دل ءَ ڈاکٹر امداد ءُ آئی ءِ ھمراھانی منگہ پشت نہ کپت۔


بلے شھید واجہ ءَ اے وھد ءَ ھم چوشیں ھچ کار نہ کرت کہ پہ امداد ءَ بی این ایم ءِ اگدہ ءِ سر ءَ آیگ ءَ جیڑہ ودی بہ بیت۔ چہ بی ایس او ءَ اتکگیں اے ورنایانی کرد ءِ گندگ ءَ پد پہ نوکیں باسکاں اے جیڑگ بوت کہ باید چوش مہ بیت کہ یکے چہ راجمان پتر ءَ چندیں روچ پیش بئیت ءُ آ بی این ایم ءِ باسکبندی دیگ بہ بیت پیش ءَ چوشیں راھبندے نیست اَت ءُ بی این ایم ءِ اگدہ دار پابند اَت اَنت کہ ھمک چوشیں بلوچے ءَ کہ باسکبندی ءِ لوٹ ءَ بہ کنت باسک بہ کن اَنت بلے ڈاکٹر امداد ءِ آ روچیگیں کرد ءَ سیاسی کارکن گوں نوکیں تجربھے ءَ دیم پہ دیم کرت اَنت کہ دیمتر ءَ بی این ایم ءِ کارراھبند ءِ بھر جوڑ کنگ بوت نی کسے بی این ایم ءِ باسک بیگ لوٹ ایت باید داں سے ماہ دوزواہ بہ بیت ءُ اے میان ءَ گل ءِ باسکاں دلجمی بہ دنت کہ آ بی این ایم ءِ باسکے ءِ لوٹاں پیلو کرت کنت۔


بلے شھید واجہ ءَ چوش نہ گْوشت کہ من ھما مرداں کہ بی این ایم ءِ جوڑ کنگ ءَ پد پاکستانی واکدارانی زوراکیانی تچکیں نشانگ آں ءُ من دراجیں باریگے چیریں زندان ءَ گْوازینتگ ءُ چیزے ماہ بیت کہ درا بیتگ آں۔دنیگت منی درد ءُ دوراں تم نہ کرتگ کہ من وتی سیاسی چست ءُ ایر بندات کرتگ اَنت۔ بلے ما درساں دیست کہ چہ 2008 ءِ راجمان پتر ءَ پد شھید واجہ گلام مھمد ءِ زند ءُ آئی ءِ سیاسی سرگرمی چہ زورگر ءِ نیمگ ءَ انگر ءَ کنگ بوت اَنت۔2008 داں اپریل 2009 ءِ میان ءَ باز رند ءَ شھید واجہ ءِ کوش ءِ پندل بیتگ بلے چہ ایشی ءَ پیش بازیں انچیں کار بیتگ اَنت کہ داں پہ زورگر ءَ شھید واجہ ءِ کوش آسان بہ بیت۔


روان اِنت ۔ ۔