ریڈیو زْرمبش بلوچی | ریڈیو زْرمبش بلوچی

بلوچ نودربر گل بلوچ چاگرد ءِ تہ ءَ یک منگھیں سیاسی اَرزِشتے ءِ واھُند اِنت۔چیئرمین جلیل

بلوچ نودربر گل بلوچ چاگرد ءِ تہ ءَ یک منگھیں سیاسی اَرزِشتے ءِ واھُند اِنت۔چیئرمین جلیل

NOV

26
26 / 11 / 2021 بی این ایم 93

شال: بلوچ راجی زْرمبشت( بی این ایم) ءِ سرکماش ھلیل ءَ بی ایس او ءِ پنجاہ ءُ چارومی سالروچ ءِ درگت ءَ وتی شنگ کُرتگیں درشانی ءَ گْوشتگ کہ بی ایس او یک گھگیری زانشتجاھے ءِ نام اِنت کہ آئی بلوچ چاگرد ءِ تہ ءَ نہ تیوک ءَ زانت ءُ سما ءِ رُژنائی تالان کُرتگ بلکیں بلوچ چاگرد ءَ ھنچیں سروک داتگ کہ آ مرچی گھگیری ءِ چیدگ جوڑ بیتگ ءُ گرانبھائیں دیمونیاں گْوستانک ءَ گل ءَ بلوچ چاگرد ءَ یک منگھیں سیاسی اَرزِشتے بکش اِتگ۔ بلوچ نودربر گل ءِ جوڑ بیگ ءِ مول ءُ مراد ءُ جُھد ءَ ورنایان ءَ یک انچیں راھے داتگ کہ اود ءَ آ مھترھند ءِ زوراکی ءُ نو آبادیاتی نزام ءِ تباھیاں سرپد بیتگ اَنت ءُ آئی ءِ بگیری ءَ گھگیری ءِ راہ گچین کُرتگ۔ بی ایس او ءَ ورنایان ءَ اے زانت ءُ سرپدی دات کہ گھگیری ھما یکیں راہ اِنت کہ آئی ءِ ساھگ ءَ آ راجی ارزِشت ءُ راجی ھستی ءَ مھکم جوڑ کُرت کن اَنت۔ چیئرمین ھلیل ءَ گْوشتگ کہ وریانی بی ایس او ءَ ھوار ءُ راج ءِ تہ ءَ گل ءِ دوست دارگ ءَ مھترھند ءِ تْرامگیج مدام تُرس ءِ آماچ کُرتگ اَنت ءُ ھمے تُرس ءِ سْوب ءَ آئی ھمک دور ءَ گل ءِ بھر ءُ بانگ کنگ ءِ پندل ساز اِتگ ءُ چہ بدبھتی ءَ ھمک پندل سوبمند گندگ بیتگ بلے بی ایس او ءِ مھکم ءُ گھگیری ءِ جوزگ ءَ چکاریں ورنایاں گل ءِ گھگیری اَرزِشت گوں وتی ھوناں زندگ داشتگ ءُ مرچی ھم بی ایس او ءَ دیمونیانی دْرچ برجاہ داشتگ۔ آئی گْوشتگ کہ بیست ءُ یکمی کرن ءِ بندت ءَ بی ایس او ءَ پارلیمانی سیاست کُشندھیں زھر گْوشت ءُ پارلیمانی سیاست ءِ پاکٹ آرگنائزیشن جوڑ بیگ ءِ بدل ءَ گوں آجوئی دوستیں گلاں نزیکی کُرت ءُ ورناھان ءَ پارلیمانی سیاست ءِ ٹیل جوڑ بیگ ءِ بدل ءَ گْواچنی گھگیری ءِ راہ پیشداشت۔ چیئرمین ھلیل ءَ گْوشتگ کہ بی ایس او بلوچ راج ءِ زھن ءِ سر ءَ انچوش پیوند اِنت کہ مھترھند ءِ دُرسیں زوراکیاں بی ایس او ءِ مھر چہ بلوچ راج ءِ دل ءَ در کُت نہ کُرت۔مھترھند ءَ بلوچ چاگرد ءِ سنٹ کنگ ءُ نادلگوشی ءِ آماچ جوڑ کنگ ءَ زورانسری بیگواھی،بندیگجاھاں کوش،ژانگولیں لاش،مُچی مانش ءُ مُچی سزا ءِ درچ برجاہ داشت بلے زانت ءُ سما ءَ چکاریں بلوچ نودربر سروکاں گل ءِ گھگیری اَرزِشت برجاہ داشت ءُ چاگرد چہ سنٹ بیگ ءَ رکینت۔سدانی کچ ءَ بیگواھی،درزنی ءِ کچ ءَ سروکانی شھیدی ءَ بی ایس او ءِ آجوئی ءِ جوزگ ھلاس کنگ ءِ بدل ءَ گیش مھکم کُرت۔ آئی گْوشتگ کہ گھگیری گل ءِ زور اِنت ءُ گھگیری گل ءَ چاگرد ءِ تہ ءَ یک مزنیں ارزِشتے بکش ایت۔ چیئرمین ھلیل ءَ گْوشتگ کہ انگیں سروک بایدیں بی ایس او ءِ جوڑ بیگ ءِ مول، دیمونی ءُ جُھد ءِ بابت ءَ سرپدی بہ دیئنت ءُ آئی ءِ بنگپانی سر ءَ گپ ءُ تران بہ کن اَنت کہ آ کجام سْوب بیتگ اَنت کہ آیاں بی ایس او بھر ءُ بانگ کُرتگ ءُ بلوچ نودربرانی توانمندی بھر کُرتگ۔شرگداری ءِ بنیاد ءَ گپ ءُ تران پہ گل ءَ نوکیں راھے ءِ گچین کنگ ءَ کمک ءَ کنت۔ بنشون: درشان | اکس: زْرمبش