ریڈیو زْرمبش بلوچی | ریڈیو زْرمبش بلوچی,Aysha-Baloch,Joe-Biden

بائیڈن ءِ اوگان بَے . رجانکار : آئیشہ بلوچ

بائیڈن ءِ اوگان بَے .  رجانکار : آئیشہ بلوچ

MAY

03
03 / 05 / 2021 نبشتانک 144

' بائیڈن ءِ اوگان بَے '
رجانکار : آئیشہ بلوچ


بِہ گِند ئے راجی کارمستر واجہ جو بائیڈن ءَ اوگانستان ءِ بابت ءَ باز جْوانیں سوڑگے کُتگ بلے آئی ءَ تہ ءَ لھتیں تُرس ھم ھست اَنت۔ بازیں ھیال ءُ جیڑگ ءَ رند من سرپد بوت آں بلکیں جْوانیں کارے کُتگ ئِے۔
البت اِے سوڑگ یک بَے یے کہ چَہ پاکستان ءِ بدکاری ءُ زِد ءِ آسر ءَ پہ پاکستان ءَ بازیں بدیں جاور ھم دیم ءَ ودی بنت۔


یک دْراجیں دپترے: من چَہ دسمبر 1979 ءَ گوں امریکی اوگانستان شوندات ءِ گل ءَ بندوک آں۔ وھدیکہ روس اوگانستان ءِ سر اُرش کنت من ھمے وھد ءَ امریکہ سی آئی اے ءِ باسکے اِت آں۔ گُڑا ھما وھد ءَ راجی پھزگیں گل ءَ ھال آؤرتگ اَت کہ پہ بلاھیں روسی لشکرے ءِ سر کنگ ءَ کساس سے سد روسی بالیاں چہ بُنجاھی ایشائی استاناں بال کُت ءُ کابُل بالی پِڑ ءَ سربیتگ اَنت۔
واشنگٹن باز ھبکّہ اَت کہ چے بہ کن ایں بلے ماں یک ھپتگے ءَ کارمستر جیمی کارٹر ءَ اوگان شونداتے اڈ کِت، پاکستان ءُ سھودی اَرب ءِ ھواری ءَ روس ءِ ھلاپ ءَ گلے اڈ کُت گُڑا چَہ ھمے گل ءِ آسر ءَ ما روس ءِ ھلاپ ءَ کولڈ وار ءَ باج بُرت۔
اوگانستان ءِ سر ءَ روسی اُرش ءِ دو ھپتگ ءَ رند مئے اولی سِلاہ ءِ کُمک پہ مُجاھدین ءَ کراچی ءَ رست۔
بہ گِند ئے ما اوگانستان ءِ تہ ءَ بلاھیں ردی یے کُتگ چی ءَ کہ وھدے روس چَہ اوگانستان ءَ شُت گُڑا ما اوگانستان ءِ جاوراں دلگوش نہ کُت پمیشکا اوگانستان کم کم ءَ تالبان ءُ الکائدہ ءِ وڑیں ناشریں گلانی دست ءَ شُت ءُ اوگانستان یک بے سوبیں مُلکے جوڑ بوت۔
کارمستر جارج ڈبلیو بوش ءَ وتی زھریں چمّ پیشداشت ءُ 2001 ءَ اوگانستان ءِ سر ءَ اُرش کُت۔ اوسامہ بن لادن ءَ تتک ءُ پاکستان ءَ پناہ گپت بلے اوسامہ بِن لادن 2015 ءَ پاکستان ءِ آبٹ آباد ءِ دمگ ءَ کُشگ بوت۔ یک نیمگ ءَ امریکہ دلگوش ماں اَراک جنگ ءَ اَت ءُ دومی نیمگ ءَ الکائدہ ءُ تالبان پد ءَ یکجاہ ءُ ھاٹیگ زُورگ ءَ اِت اَنت۔


2006 ءِ وھد وَ سک بیمناک اَت وھدیکہ برتانیہ ءِ لشکر ءَ الکائدہ ءِ یک بلاھیں اُرشے بے سوب کنائینت کہ آئی ءِ مول ءُ مُراد چَہ انگلینڈ ءَ بال گپتگیں امریکہ، کینیڈہ ءُ اٹلینٹک اوشن ءِ استانی نیمگ ءَ رؤکیں یک درزِن بالیگراب دُزگیر کنگ ءُ تباہ کنگی اَت اَنت۔ راستی اوسامہ بن لادن ءَ چَہ وتی پناھگاہ ءَ اِے اُرشانی ھُکم داتگ اِت ءُ گل ءِ دْراھیں مردم ھم پاکستانی اَت اَنت۔ بِہ گِند ئے اِے چَہ 9/11 ءَ ھم بلاھیں ویل ءُ اندوھے بوتگ اَت۔


مارچ 2009 ءِ راجی کارمستر براک اوبامہ ءِ وتگڑیں پاک-اوگان سرھال ءَ ھمے چارگ بیتگ کہ مارا ماں اوگانستان ءُ پاکستان ءِ تہ ءَ الکائدہ ءِ سر ءَ تْرُندیں اُرشاں کنان ءَ پْروشت ءُ پْروش ءِ آماچ کنگی انت۔ چوناھا ماں سرھال ءَ ما سرپد بیتگ ایں کہ تھنا پاکستان ءِ تہ ءَ الکائدہ ءِ جنگی پناھگاہ سک باز اَنت۔ گُڑا واجہ براک اوبامہ ءَ سی آئی اے ءَ ھُکم داتگ کہ چَہ اوگانستان ءَ امریکی ڈرون بالیاں کارمرز کنان ءَ سیمسر ءِ دومی نیمگی الکائدہ ءِ جنگی گل ءِ سر ءَ تْرندیں اُرش بہ بنت ءُ اِے گل اَلّم تباہ کنگ بہ بیت۔ پد ءَ اِے ھم گْوشت ئِے کہ پہ اوسامہ بن لادن ءِ شکار ءَ یک پٹ ءُ پولی اپریشنے ھم بُنگیج بہ بیت۔ گُڑا اِے کار 2009 ءَ بُنگیج بوت ءُ بازیں جُھدے ءَ رند کساس چہ یک مِیل ءَ کم شملگے ءَ پاکستانی مستریں لشکری بلدجاھے ءِ نزیکی ءَ اوسامہ بن لادن کُشگ بوت۔ بزاں دہ سال ءَ پیش 2 مئی 2011 ءَ نیوی سِیل ءِ لشکر ءَ راج ءَ انساپ دیائینت ءُ گُڑا چد ءُ پد الکائدہ ءَ پیشیگیں زور ءُ ھاٹیگ ودی نہ کت۔ چوناھا الکائدہ ءِ گل انگت ھمے دمگ ءُ آتراپ ءَ ھست انت بلے پْروشت ءِ آماچ اِنت۔ گْوستگیں ستمبر ءِ ماہ ءَ اوسامہ بن لادن ءِ رندآیوکیں گل ءِ رھشُون یمن الزواری ءَ 9/11 ءِ سالروچ ءَ وتی یک بیانے درشان کُت گُڑا آئی ءِ ھمے بیان ءَ کس ءَ دلگوش نہ کُت۔ چریشی ءَ اِے پدرا بیت کہ اِے گل ءَ نی ھچ بستار ءُ ارزِشت نیست انت۔
الکائدہ، تالبان ءُ اِلسی جنگ:
اِے گپ راست اِنت وھدیکہ روس 1989 کابُل ءَ یلہ کنت ءُ روت پد ءَ اوگان اُلسی جنگ روک بوت، امریکہ ھم ھمے اُلسی جنگ ءِ باسکے جوڑ بوت۔ داں وھدیکہ پاکستان تالبان ءَ پناہ، پھازگ، بلدی، زَر، ساز ءُ سامان ءِ کُمک کنگ ءَ اِنت ما تالبان ءَ پْروش دات نہ کن ایں۔
"ما پاکستان ھم پْروش دات نہ کن ایں کہ ایٹمی سِلاھبندیں لشکر ءِ استانے ءُ بنی آدمی آبادی ءِ ھساب ءَ دنیا ءِ پنچُمی شمار ءِ مِلک اَنت"
انچوشکہ واجہ اوبامہ ءَ ماں وتی سرنبشت "اے پرومزڈ لینڈ" ءَ اے دانک نبشتگ اَت اَنت۔
البت " دی ریڈل رپورٹ" ءَ ھم اِے چیز ءِ باز سرپدی ھست کہ داں وھدیکہ پاکستان تالبان ءَ پناہ ءُ کُمک کنگ ءَ اِنت مئے دْراہ جُھد اَلّم بے سوب بنت۔
بلے بِہ گِند ئے چَہ 9/11 ءِ ویل ءَ رند مئے راجی لشکر ءَ اوسامہ بن لادن کُشت ءُ وتی زمہ واری پیلو کُت بلے ما روالپنڈی جنرالانی پلہّ مُرزیں گلاں ماں اِے جنگ ءَ پْروش دات نہ کن ایں ءُ اِے یک بلاھیں راستی یے کہ اِے بائیڈن ءِ سوڑگانی پلّامُرزی ءَ کنت۔


البت من بدبھتی ءَ گْوش آں کہ ماں اوگانستان ءَ مئے جنگی لشکر ءِ بے ساڑی مئے جنگی مول ءُ مُرادانی سرجم کنگ ءِ اڑاندے ودی کنت ; اد ءَ واجہ بائیڈن ءَ یک بَے یے گچینتگ۔ اگاں الکائدہ پد ءَ یکجاہ بُوان ءَ مستریں گلے جوڑ بوت ءُ امریکہ ءِ سر ءَ اُرش ئِے کُت گُڑا مئے پھازگی ترامگیجاں بودی نہ بیت کہ الکائدہ ءِ اُرش ءَ بے سوب بہ کن اَنت پمیشکا اِے یک بلاھیں بَے یے۔


مستریں گپ ایش انت کہ بائیڈن ءَ واجہ ٹرمپ ءِ سُھلکارانی بے ایبیں منّگ نامہ ءِ سر ءَ کار کُرتگ ءُ دیم ءَ بُرتگ : امریکی لشکر ءَ چہ 1 مئی ءَ پیسر چَہ اوگانستان ءَ بہ کش ایت یا دہ ھزار ءَ چہ گیشتر امریکی ءُ نیٹو لشکر ءَ (تالبان ءُ الکائیدہ ءِ) تْرُندیں اُرشانی دیمپان بہ کنائین ایت۔ کہ ھمے منّگ نامہ ءِ بدل ءَ تالبان ءَ چَہ الکائدہ ءَ وتی گل ءَ جُتا کنگی اَت ءُ وتی سْیاد ءُ بندی ھم ھلاس ئِے کنگی اَت بلے اِے دوئیں کار تالبان ءَ نہ کُتگ اَنت۔ البت چہ گْوستگیں سال ءَ تالبان جنگول امریکی لشکر ءِ سر ءَ اُرش نہ کنگ ءَ اَنت بلے بائیڈن زانت کہ اگاں آئی ءَ امریکی لشکر 1 مئی ءِ میاد ءَ نہ کش اِت گُڑا تالبان ڈنّی میان اُستمانی لشکر ءِ سر ءَ جنگی اُرشاں کنت۔ بے شک اِے مستریں نشانگ ءَ بنت۔ منی ھیال ءَ اِے بلاھیں بَے یے کہ تالبان بائیڈن ءِ اِے میاد ءَ منّ ایت کہ چہ سپتمبر ءَ امریکی پوج روت۔


دیم ءَ چے بیت، ھچ کس سھیگ نہ اِنت بلے اُلسی جنگ اَلّم روک بیت۔ وھدیکہ روسی لشکر ءَ اوگانستان یلہ داتگ اَت گُڑا آزات ھیال ءُ کمیونسٹ سرکار داں سَے سال ءَ مھکم اَت۔ بِہ گِند ئے ھما وھد ءَ پْروشتگ وھدے آئی ءِ مستریں لشکری رھشُون ابدلرشید دوستم ءَ پہ مُجاھدینانی پلہّ مُرزی سرکار یلہ دات ءُ ھمے مرد داں روچ ء مرچی گوریچ ءِ نیمگ ءَ وتی جوزجان پَرکنگ ءِ سرکار ءَ جُنزینگ انت۔ وھدیکہ گوں من واشنگٹن ءَ ڈیک ئِے وارت، من ءَ سک باز شرپ ئِے دات، راستی ءَ اِے وَ زالم کَھرواریں ٹولی یے واھُندے!!
اِے تاجک، اوزبک ءُ ھزار ءِ تبک ھجبر چَہ پشتوان ءِ پُریں تالبان ءِ سرکار ءَ نہ من اَنت ءُ شھر ءِ جھمنِندیں وانِندگیں اوگان لس مھلوک کْوھنگیں زمانگ ءِ اسلامی رِد ءُ رھبنداں ھم نہ منّ اَنت۔ اوگان آبادی ءِ کساس سَیکے 30 سال ءِ کم اُمر ئیگ اَنت کہ آ مرچاں یک آزات ھیالیں چاگِردے ءَ وتی آسودگیں زِندے گْوازینگ ءَ اَنت۔ گُمان ءَ اُلسی جنگ وَ بیت ءُ تالبان اوگانستان ءِ لھتیں زِرباری شھر ھم زورگر اَنت گُڑا مارا اوگان راجی لشکر ءِ کُمک کنگی اِنت انچوشکہ کارمستر بائیڈن ءَ اھد کُتگ۔


بہ گِند ئے تاں بیست سال ءَ ما اوگانستان ءِ تہ ءَ ھما بدلی آؤرتگ اَنت مارا آیانی سر ءَ پھر ءُ ناز کنگی اِنت، ھاسکن پہ اوگان زالبولانی دیمروئی ءُ آزاتی ءَ ما سک باز کار کُتگ کہ آ مرچاں وانگجاھاں وانگ ءَ اَنت، وت پوریاگِری کنگ ءَ اَنت ءُ دیگہ بازیں موھے آیاں رستگ کہ پیسرءَ تالبان سرکار ءِ وھد ءَ آ زبھر اِت اَنت۔ تالبان کہ تاں بیست سال ءَ ھمے ردیں ھیال ءِ نشتہ ھنوش اَنت کہ میان اُستمانی چاگِرد آیاں منّ ایت گُڑا وت ءَ دروھگ دیگ ءَ اَنت۔


پاکستان ءِ باج:
پاکستان ءَ پد ءَ باج بُرتگ ءُ یکرندے پد ءَ دو سوپرپاوراں پْروش ئِے داتگ۔ پاکستانی لشکر ءِ جنرل وتی سر ءَ ناز کنان ءَ گیشتر بیمناک بنت، لشکر ءِ چیریں ترمیگج کہ آئی ایس آئی ءِ نام ءَ زانگ بیت، دیمتراں گیدی ءِ ھر وڑیں ناشرکاری ویلانی واجکار بیت، ھاسکن ھکانی گل ءِ کارمرزی ءِ آسر ءَ!!
چوناھا پاکستان سرجمیں تالبان ءَ واگ دات نہ کنت بلے واگ دیگ ءِ آسر رَد ھم بیت ءُ راستیں آسر ھم ودی کنت۔ پاکستان ءِ بیگری ءَ پاکستانی تالبان گیشتر زورمند بنت ءُ پاکستان ءِ تہ ءَ جْوانیں اُرشاں کن اَنت چریشی ءَ اوگان تالبان چَہ پاکستان ءَ وازمندگ نہ بنت بلکیں گیشتر آزات بنت۔


بہ گِند ئے مارا پہ پاکستان ءَ دارگ ءَ یک الکاپیں شونداتے لوٹ ایت چو کہ بائیڈن گوں سروزیر امران ھال سُھل ءُ تْران ءَ بے سوب بیتگ انچوشکہ منی باسک بانُک مادھیا اپزل ءَ ماں وتی نبشتانکے ءَ گْوشتگ، پمیشکا پاکستان ءِ ڈالچار کنگ وَ ردی یے۔ گُڑا مارا آیانی سر ءَ کار کنگ لوٹ ایت ءُ پاکستان ءِ تب بدل کنگ انچو آسانیں کارے وَ نہ اِنت انچوشکہ آ چین ءِ وڑیں زورآورے ءِ ھمراہ انت پمیشکا چہ ڈالچار کنگ ءُ پابندی جنگ ءَ گوں پاکستان ءَ سُھل ءُ تْران جْوان انت۔
مئے راجی کارمستر ءَ ھم اوگان سوڑگ ءِ سر ءَ دلگوش کنگی لوٹ ایت کہ چَہ سھودی اَرب ءُ دیگہ بازیں ھلیجی مُلکاں وتی جنگی لشکر ءَ گردین ءُ بیار ایں، انیگیں ءِ وھد ءَ کویت ءُ ایراک ءَ مئے جنگی لشکر گْوستگیں جنگانی راجدپتری چیدگ اَنت بلے نی ئیں وھد ءَ اود ءَ بےکاری ءَ سْرپبند اَنت پمیشکا باید اِنت چَہ اِے سرجمیں دمگ ءُ آتراپاں وتی لشکر کشگ بہ بیت۔
نیٹو گل ءَ ھم دلگوش کنگ لوٹ ایت کہ پہ لشکر کشی ءَ اوگانستان مئے گل ءِ تہ ءَ یک ارزِشتے دار ایت ءُ ما تیوگیں گل ءَ ماں بُنجاھی ایشیا ءِ دمگ ءُ آتراپاں وتی پلہّ مُرزیں لشکر کُمک کُتگ اَنت۔ کینیڈہ ءَ بازیں زدگ ءُ ٹپ ءِ آماچ بیتگ۔ بِہ گِند ئے اوگانستان ءِ بے سوبی زیت پہ سرجمیں گل ءِ باسکان بیرانی یے ودی کنت۔