ریڈیو زْرمبش بلوچی | ریڈیو زْرمبش بلوچی,اتیکہ

من بلوچی نبیسگ چون دربر آں ؟

من بلوچی نبیسگ چون دربر آں ؟

SEP

06
06 / 09 / 2020 نبشتانک 126

انچوش کہ ما مدام اش کرت ءُ پد ءَ ھم یکشل ءَ اش کن ایں "بلوچی مئے وتی شھدیں زبان اِنت، بلوچی منی راجی پجار اِنت ءُ بلوچی مئے دود ءُ ربیدگ اِنت ءُ بے زبان ءَ راج گار ءُ بیگواہ بہ اَنت۔" بزاں اے وڑیں زْرمبشت بلوچ چاگِرد ءَ باز اش کنگ بیت بلے ما پہ وتی راجی زبان بلوچی ءِ وانگ ءُ نبیسگ ءَ وھد نہ کش ایں، چَہ وانگجاھاں پارسی ءُ ھندی ءِ وانگ ءَ راج ءِ گُپتاری ءَ انچو سان پرینتگ کہ ما بے وسی ءَ بلوچی گپ ءُ توار ءِ وھد ءَ وتی راجی زبان ءِ کْوھن زگریں گالاں ڈالچار کن این ءُ زورگِریں دژمن بولی ءِ گالاں وتی ماتی زبان ءِ گپتاری ءَ ھوار کن ایں۔ بژن ءَ گْوش آں کہ ما بلوچ وتی گْوانکواں بلوچی ابینکدار (کلیتاک یا کیبورڈ) ءُ بزانت بلد (ڈکشنری) ایر نہ گیج ایں بلے ھندی، پارسی ءُ انگریزی ءِ ابینکدار ءُ بزانت بلداں ایرگیج ءُ کارمرز کن ایں۔ پہ نبشتانک، آزمانک یا ھال ءُ اھوالے ءِ وانگ ءَ ما ھندی ءُ پارسی ءِ تندجاہ پچ کن ایں بلے ما بلوچی تندجاہ نہ چار ایں کہ آ اود ءَ مئے وتی شھدیں زبان بلوچی ءَ بلوچی نبشتانک، آزمانک، گچین ءُ تندجاھانی شونگالاں نہ وان ایں کہ مئے راجی زبان دیمروی بہ کنت۔


شھدربرجاہ ءُ مزن شھدربرجاھانی بلوچ نودربر بلوچی دربرگ ءِ وٹس ایپی وانگجاہ اڈ نہ کن اَنت کہ آ اود ءَ بلوچ راج ءِ نودربر وتی راجی زبان ءِ وانگ ءُ زانگ ءَ در بہ بر اَنت بلے ما یکشل ءَ ھندی ءُ پارسی ءَ گپ ءُ رپ ءَ گلائیش ایں۔


اے جوریں راستی یے کہ بلوچ راج دوئیں نیمگ ءَ یک زیردستیں راجے پمیشکا بلوچ زھگاں ماں وانگجاھاں جند ءِ راجی زبان بلوچی ءُ براھوی وانینگ نہ بہ اَنت بلکیں زوراکی ءَ ھندی ءُ پارسی وانینگ اش بیت چر ایشی ءَ مروچیگیں بلوچ ورنائیں پدریچ وتی راجی زبان ءِ وانگ ءُ نبیسگ ءَ زبھر اِنت۔ بژن بیت کہ لھتیں دمگاں بلوچ راج ءِ وانندگیں مھلوک ءَ اے ھم سما نیست کہ بلوچ راج یک شاھگانیں زبانے ءِ واھند اِنت ءُ زبان ئِے وتی جتائیں لبزانکے دار ایت۔


باید اِنت ما اے بے سمائیں بلوچ چاگرد ءَ راجی زبان ءِ بارو ءَ کمیں پوہ بہ کنائین ایں کہ بلوچ راج ءَ ھرچ وڑے ءَ وتی زبان وانگی اِنت کہ بلوچ راج وتی راجی زبان ءِ بستار ءُ ارزشت ءَ بہ زانت چیا کہ داں وھدے راجے وتی زبان ءِ وانگ ءُ نبیسگ ءَ مہ زانت گڑا ھمے راج ءِ تہ ءَ راجدوستانی کمی بیت۔ بزاں بے بلوچی ءُ براھوی وانگ ءُ نبیسگ ءَ تو کس ءَ راجدوست گْوشت نہ کن ئے۔ باید اِنت بلوچ راج ءِ ورنائیں نودربر ءُ لچہ کار وتی راجی زبان ءِ دیمروی ءَ لانک ءَ بہ بند انت ءُ پہ راجی زبان ءِ وانگ ءُ زانگ ءَ آشوب ودی کنگءَ در بہ یا اَنت کہ راج وتی راجی زبان ءِ وانگ ءُ نبیسگ ءَ ھیل بہ کنت۔ ھرچ یکے وتی دمکاں وٹس ایپ ءُ پیسبکی گروپ بہ ٹھین ایت ءُ سْیاد ءُ کساں دزھُورکی ءِ وھد ءَ راجی زبان ءِ وانگ ءُ نبیسگ ءِ ھیل گرگ ءِ سکین بہ دنت۔


چوناھیگا ما وَ بلوچ ایں پمیشکا ما وتی راجی زبان ءِ گُپتاری ءَ بلد ءُ زبر ایں ایوک ءَ مارا راجی زبان ءِ وانگ کم کم ءَ ھیل کنگ لوٹ ایت۔ بلوچی دربرگ پہ بلوچ ءَ ھچ وڑیں اڑے نہ اِنت بس کمیں پنت ءُ سوج دیگ لوٹ ایت۔


گوں راج ءَ منی دزبندی ھمیش اِنت کہ بلوچی نبیسگ ءِ دربرگ ءَ اشتاپ مہ بہ اِت بلکیں شُما پیسر بلوچی درونتاں ھورت بہ وان اِت ءُ پد ءَ بلوچی نبشتانک ءُ آزمانکانی وانگ ءَ یک انچیں دابے ءَ گلائیش بہ بہ اِت کہ شما وت بلوچی استاد اِت ءُ شما اے نبشتانکاں پہ چمشانکے ءَ وانگ ءَ اِت کہ شما آیانی ردیاں در بہ گیج اِت۔ گڑا شما بلوچی نبشتہ کاری ءَ زبر بہ اِت۔ بلے پیسر بلوچی درونتانی وانگ المی اِنت۔ وتی گوانکواں بلوچی ابینکدار ءُ بلوچی بزانت بلد ءَ ایر بہ گیج اِت کہ نبشتانک ءُ آزمانکے ءِ وانگ ءِ وھد ءَ بلوچی ءِ گِرانیں گالانی بزانتاں در گیپت بہ کن اِت۔ چَہ گوگل ءَ انگلش ٹو بلوچی نوکاز ءَ ھم ایر بہ گیج ءُ درپ بہ کن اِت کہ شمارا بلوچی نبشتانکے ءِ نبیسگ ءَ کمک بہ کنت۔ من امیت کن آں کہ بلوچ راج ءِ تہ ءَ ایوکیں وھد ءَ گیشتر بلوچی ءِ نبشتہ کار ءُ ندکار پیداک بیت۔