ریڈیو زْرمبش بلوچی | ریڈیو زْرمبش بلوچی

بلوچ اسٹوڈنٹس کونسل اسلام آباد ءِ جارکش ءَ وتی دانکانی تہ ءَ راجی شائر ءُ بلوچی شائری ءِ مھکمیں کَلات مبارک کازی ءِ بِیرانی ءَ دلپدردی درشان کرتگ ءُ گْوشتگ کہ مبارک کازی راجی سْرپ ءَ اُوشتوکیں مُجّتی تب ءِ راجی واھُندیں کارستانی لڑّ ءَ مُدام گِیر آرگ بیت۔

آئی ءِ سرجمیں زند لبزانک بہ بیت یا سیاست بلوچ راجدوستی ءِ ستاہ ءَ گْوستگ۔ مبارک کازی ءَ وتی شائری ءُ ساچشتانی تہ ءَ بلوچ دودمان، راجمان، گْوستانک، بندپتر ءُ راجدپتر ءِ بارو ءَ انچیں دَرشانی یے کُرتگ کہ آ بلوچ ءِ راجی مارشتانی جھگیری ءَ کن اَنت ۔

بلوچانی زندگیں کارستانی تہ ءَ مبارک ھم کِرد ئے واھُند بیتگ ءُ مَرگ ءَ پد ھم راج آئی ءَ پُر مڑاھین ءُ نہ تُرسیں بلوچے ءِ دروشم ءَ مُدام یات کنت ءُ گیر کار ایت۔ دیمترا بی ایس سی اسلام آباد ءِ جارکشءَ گوشتگ کہ مبارک کازی، بلوچ ءُ بلوچ سرڈگار ءِ ھاترا ھر وڈیں سکّی ءُ سوری ءُ کُربانی دئیگ ءَ چک ءُ پد نہ بیتگ۔ اے کارست چہ واری ءُ بزّگی ءَ بگر داں زندان ءِ آزار دیستگ اَنت بلے راجی راہ ءُ لیکہ ءَ چہ کمے ھم پد نہ کنِز اِتگ۔ دگنیا ءِ آ دگہ راجانی تہ ءَ پہ راجی گھبودی ءُ تپاکی ءَ لبزانک ءِ ھما کرد کہ آیاں راجانی تپاکی ءُ ایردستی ءَ چہ درآھگ ءِ راہ بزانکہ گھگیری ءِ راہ پیشداشتگ ءُ زمین ءِ پھازگ ءِ سکین اِش داتگ ھمے پئیم ءَءَ مبارک کاز ءِ ھم سرجمیں زند ءُ ازم بلوچ راج ءِ سکین دئیگ ءَ گوستگ۔

مبارک کازی ءِ شائری ءِ وانگ ءَ پد وانوک پہم اِت کنت کہ آئی ءِ شائری بلوچ ءِ تب، زمین ءُ راجی راستی ءَ چہ گِستا نہ بیتگ بلکیں ڈیھ ءِ نندوکیں ھمک تبک ءِ مردم آئی ءَ وتی ساچشتانی بھر کُرتگ انت۔ آئی ءِ لبزانکی لیکہ ءِ جند تچک بیتگ ءُ بلوچستان ءِ مید، شوانگ، شپانگ، پوریاگر ءُ بزگراں ھوار ھمک پڑ ءِ مردم آئی ءِ گوشداروک اَنت۔ آئی ءَ گوشتگ: اے اھد ءَ کہ ما زندگ ایں اے “مُبارک کازی”ءِ اَھد اِنت۔

آئی ءِ شئیری کتاب " منی اھد ءِ گم ءِ کسّہ" وت اے گپ ءِ گواھی ءَ دَنت کہ اھد ساز ھما مردم گوْشگ بنت کہ آ سرجم ءَ وتی راجمان، دودمان، ربیدگ، رسم ءُ رواجاں مھکمیں رنگے ءَ درشان بکن اَنت ءُ پدا راج آئی ءِ منّگ ءَ ساڈی بہ بیت ءُ مردمانی دلّاں آئی ءِ ساچشت جاگھ کرت بِکن اَنت۔ دومی گپّ بندپتر لاچار بہ بیت کہ آئی ءَ را اھد ساز ءِ نام بہ دنت، گڑا ھمے پئیم ءَ کازی ءَ سرجمیں چار پنچ دھکانی رھشونی کرتگ ءُ داں گُڈّی وھد ءَ راجی درد ءُ مارشت آئی ءِ زرد ءَ منت اِت اَنت ءُ نمیران بوت۔ جارکش ءَ گوشتگ کہ کازی، راجی ھمک مچی٘ ءُ زھرشانیاں بگر داں لبزانکی پتّراں یکشل ءَ گون بیتگ ءُ پھکیں بلوچے ءِ داب ءَ وتی راجی زمہ واریاں پیلو کنگ ءَ بیتگ۔

ھمے پئیم مبارک کازی ءِ مزن شانیں بالاد ءِ ستاہ ءُ ساڈاھگ گوں چندے گالاں بُوت نہ کنت ءُ نیکہ کسانیں کارے ءَ کازی ءِ زند ءُ ازم ءِ جتائیں تک ءُ پھنات در جنَگ بنت۔ اے ردا بی ایس سی، اسلام آباد مُبارک کازی ءِ یات ءَ لبزانکی دیوانے برجم دار ایت ءُ مبارک کازی بلوچ ءَ راج ءِ تہءَ یک گھگیرین ءُ اھد سازیں کارستے ءِ رنگءَ مُدام گیر کار ایت۔

بنشون: درشان | اکس: مونوگرام