ریڈیو زْرمبش بلوچی | ریڈیو زْرمبش بلوچی

بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں گوستگیں روچاں شال ءِ نزیکیں ھند ولی تنگی ءَ زورگریں پاکستانی لشکر ءِ یک بنجلے سرجم ءَ دستیگ کرتگ ءُ یازدہ کارمند کشتگ ءُ دُژمن ءِ سلاہ ءُ سامان دستیگ کرتگ اَنت۔

آئی ءَ گوشتگ کہ بی ایل اے ءِ سرمچاراں 14 ستمبر 2023 ءَ بیگاہ ءِ شش ءِ نزیک ءَ شال ءِ نزیک ءَ ولی تنگی ءَ زورگریں پاکستانی لشکر ءِ یک بنجلے ءِ پھازداریں پانگسانی سر ءَ اُرش کرتگ، بنجل سرجم ءَ دستیگ کرتگ۔ سرمچاراں دُژمنیں لشکر چہ جتائیں نیمگاں انگر کنگ ءَ پد راکٹ ءُ آدگہ مزنیں سلاھانی گون ءَ اُرش کرتگ۔ چہ اُرش ءَ دُژمن ترس آماچ بیتگ ءُ دُژمنیں لشکر ءَ وتی سلاہ ءُ مرتگ ءُ ٹپی بیتگیں کارمند یلداتگ ءُ جستگ اَنت۔

جارکش ءَ گوشتگ کہ سرمچاراں زورگریں لشکر ءِ بنجل ءِ دو پانگس سرجم ءَ دستیگ کرتگ، وھدیکہ سیمی پانگس کہ آ سلاھانی ھمبار اِنت، آ گوں راکٹاں نشانگ کرتگ ءُ تباہ کرتگ۔ ایشی ءِ آسر ءَ دُژمن ءِ سلاھانی ھمبار سرجم تباہ ءُ پانگس ءِ درسیں کارمند مرتگ اَنت۔

آئی ءَ گوشتگ کہ اُرش ءِ آسر ءَ زورگریں لشکر ءِ سوبیدار کیسر رھیم بھٹہ جھمنند کوٹ ادو ءَ ھوار یازدہ کارمند مرتگ ءُ وھدیکہ دسیتگ کنگ ءَ پد دُژمن ءِ سلاھانی ھمبار ءِ درسیں سامان بلوچ سرمچاراں دستیگ کرتگ اَنت۔

بی ایل اے ءِ جارکش جیھند ءَ اُرش ءِ زمہ واری منّ اِتگ ءُ گوشتگ کہ ھمے کول ءَ کن ایں داں پاکستانی لشکر ءِ سرجم ءَ در آھگ ءَ دُژمن ءِ سر ءَ اے وڑیں اُرش برجاہ بنت۔

بنشون: درشان / اکس: زرمبش