ریڈیو زْرمبش بلوچی | ریڈیو زْرمبش بلوچی

بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مرچی ھزدار ءِ ھند زھری کھن ءَ زورگریں پاکستانی لشکر ءِ یک کامندے زھور لوٹانی تیرگواری کرتگ ءُ کشتگ۔

آئی ءَ گوشتگ کہ زھور اھمد ء اَبدُالسلام لوٹانی ءَ گوستگیں دراجکشیں وھدے بیت زورگریں لشکر ءِ چیردستی ءَ راج دُژمنیں کاراں ھوار بیتگ۔ اے کارمند ھزدار ءَ ھوار گْوادر ءَ زورگریں لشکر ءِ چیردستی ءَ چاریگی ءِ کار ءَ کنگ ءَ بیتگ۔ ھزدار ءَ بلوچ ورنایانی زوریں بیگواھی، گسانی سر ءَ بیڑ برگ ءَ اے کارمند تچکی ءَ ھوار بیتگ۔ ایشی ءِ جاہ ءَ زورگریں لشکر ءَ نشہ باپاری ءِ موکل داتگ۔

جارکش ءَ گشتگ کہ اے کارمند ءَ 2019 ءَ ھمبلیں گلے ءِ سرمچارے ءِ چاریگی کرتگ ءُ زھری ءِ بازار ءَ لیوز لشکر ءِ دست ءَ زور بیگواہ کنائینتگ۔ چہ ایشی ءَ پیش سے رند ءَ بی ایل اے ءَ کڈن کرتگ کہ وتی ردیں کارپداں یل بہ کن بلے آ انگت ءَ راج دُژمنیں کاراں کنگ ءَ بیتگ۔

آئی ءَ گوشتگ کہ زھور لوٹانی ءِ سر ءَ راجدروھی ءُ وتن دُژمنی ءِ سرزد بیگ ءَ بلوچ آمیدگس ءَ مرگ ءِ سزا گوشتگ ایشی ءِ سر ءَ بلوچ سرمچاراں کار کرتگ ءُ آئی ءَ گُڈی آسر ءَ سر کرتگ۔ آئی نیٹورک ءِ آدگہ مردم مئے نشانگ ءَ اَنت۔

بی ایل اے ءِ جارکش جیھند ءَ اُرش ءِ زمہ واری منّ اِتگ ءُ گوشتگ کہ راجدروھی ءَ ھواریں ھر وڑیں مردم بکشگ نہ بیت۔ زورگریں لشکر ءُ آئی شریدارانی سر ءَ مئے اُرش برجاہ بنت۔

بنشون: درشان / اکس: زرمبش