ریڈیو زْرمبش بلوچی | ریڈیو زْرمبش بلوچی

بلوچ ڈاکٹر پورم ءَ وتی درشانی ءَ گْوشتگ ما جاندراھی بھرگ ءُ راجی سیتانی بگیری ءَ بیتگیں سْوڑگ ءِ پلہ مرزی ءَ نہ کن ایں

بلوچ ڈاکٹر پورم ءَ وتی درشانی ءَ گْوشتگ ما جاندراھی بھرگ ءُ راجی سیتانی بگیری ءَ بیتگیں سْوڑگ ءِ پلہ مرزی ءَ نہ کن ایں

NOV

29

شال ءَ بلوچ ڈاکٹرانی پورم ءِ جارکش ءَ وتی شنگ کُرتگیں درشانی ءَ گْوشتگ کہ ڈاکٹرانی گلے ءِ یک ٹولی یے جاندراھی تک ءَ دستیگ کنگ ءِ جُھد کنگ ءَ اِنت۔تُرسینگ ءُ بیھار دیگ ءِ بنیاد ءَ وتی لھتیں لوٹ منّارینگ ءَ دُرسیں ڈاکٹرانی کمیونٹی ءِ نام ءَ کارمرد کنگ ءَ اَنت۔ جارکش ءَ گْوشتگ کہ شیک زاھد نادراھجاہ ءَ پی جی ایم آئی ءِ برگ پہ سرجمیں جاندراھی بھرگ ءَ سیت مند اِنت،پی جی ایم آئی تیوک ءَ یک نادراھجاھے ءَ دارگ پہ آدگہ نادراھجاھانی دیمروئی ءِ راہ ءَ اڈاند ودی کنگ اِنت، بایدیں ما پہ جادراھی تک ءِ سیتاں بیتگیں سْوڑگانی بگیری کنگ ءِ جاہ ءَ آیانی پلہ مرزی بہ کُرتگیں۔ بلوچ ڈاکٹرانی پورم ءِ جارکش ءَ گْوشتگ کہ ڈاکٹرانی گچین کنگ ءَ پبلک سروس کمیشن ءِ آزمائش ھست اِنت کہ کابِلیں ڈاکٹرگچین کنگ بیتگ اَنت،سرجمیں دمگانی بھر گشینگ بیتگ۔تیوک ءَ پہ ڈاکٹرانی یک ٹولی یے ءِ زور ءَ ڈاکٹرانی ابدی کنگ ءِ گامگیج پہ سرجمیں بلوچستان ءِ آوکیں ورنائیں ڈاکٹرانی گون ءَ ناھکی یے بیت ءُ ما ایشی ءِ ھچ پیم ءَ پلہ مرزی ءَ نہ کن ایں۔ ما ھمے سرپد بہ ایں کہ پہ جاندراھی تک ءِ گھتر کنگ ءَ مارا ھوار بیگ ءُ جُھد کنگی اِنت ءُ ما پہ جاندراھی تک ءِ گھتر کنگ ءَ ھوار بیگ ءُ کار کنگ ءَ آمادھیں بلے پہ ایشی ءَ لھتیں تْرامگیجاں سرپد بیگی اِنت کہ پہ وتی لوٹانی سرجم کنگ ءَ دُرسیں ڈاکٹرکمیونٹی ءِ سر ءَ کپگ چہ نزیکی ءِ بدل ءَ گیش دوری ودیگ بیت۔ بلوچ ڈاکٹر پورم وائی ڈی اے دُرسیں لوٹانی ھک ءَ اِنت کہ ڈاکٹر کمیونٹی ءُ جاندراھی تک ءَ سیت بہ رس ایت بلے ما تچکی ءَ گْوش ایں کہ ما یک ٹولی ءِ سر ءَ داتگین ءُ تاوانیں سوڑگانی پلہ مرزی ءَ ھچبر نہ کن ایں۔ بنشون: درشان /اکس:مونوگرام