ریڈیو زْرمبش بلوچی | ریڈیو زْرمبش بلوچی

مھراب پندرانی ءِ کوش ءِ بگیری ءَ بلوچ یکجھتی کمیٹی کراچی شمبے ءِ بیگاہ ءِ ادار چار ءَ زھرشانی کنت

مھراب پندرانی ءِ کوش ءِ بگیری ءَ بلوچ یکجھتی کمیٹی کراچی شمبے ءِ بیگاہ ءِ ادار چار ءَ زھرشانی کنت

AUG

24
24 / 08 / 2021 پاکستان 70

کراچی: بلوچ  یکجھتی کمیٹی (کراچی) ءِ جارکش ءَ وتی درشانی ءَ گْوشتگ کہ بلوچ یکجھتی کمیٹی ( کراچی)شمبے ءِ روچ ءِ بیگاہ ءِ ادار چار ءَ کراچی پریس کلب ءِ دیم ءَ زھرشانی کنت۔ درشان ءَ گْوشگ بیتگ کہ انیگیں وھد ءَ زمینی ھدا آں مرچی یک ماتے ءِ جگر ءِ ٹُکر چہ آئی ءَ پچ گیپتگ،مرچی اے گس ءِ چراگ کُشگ بیتگ کہ آئی ءِ زندگ بیگ ءَ اے گِس رُژنا بیتگ۔اے شانزہ سالی زھگ کودکیں مھراب پندرانی بیتگ کہ زمینی ھدا آنی کِر ءَ پہ دو وھد ءِ نان ءَ کاردار بیتگ ءُ وتی گِس گزران کنگ ءَ زمینی ھدا آنی ھمک زوراکی اوپار کُرتگ۔مرچی آ رُژنائی ءِ چراگ زمینی ھدا آنی زوراکیاں بیران بیتگ۔ جارکش ءَ نسیرآباد ءِ کودک ءِ دردناکیں کوش ءِ بابت ءَ گْوشتگ کہ کودکیں مھراب پندرانی نامی ئیں ٹرانسپورٹ کمپنی سدا بھار ءِ واھُند ءِ گس ءَ کاردار بیتگ۔آئی ءِ مرگ ءِ وئیل چوش بیان کنگ بیگ ءَ اِنت کہ سدا بھار ٹرانسپورٹر ءِ واھُند ءِ گس ءَ لکانی کچ ءَ زر دُزگ ءُ یا گار بیتگ۔ھمے گمان ءِ بنیاد ءَ کہ آیاں وتی گس ءِ کاردار زوراکی ءِ نشانگ کُرتگ اَنت کہ ایشانی تہ ءَ یکے شانزہ سالی چورھیں مھراب پندرانی بیتگ۔پہ لٹ ءُ آسِن جنگ ءُ زوراکی ءِ ھد توام کُرتگ۔آیاں داں سَے ءُ چار روچ ءَ یکشلہ لٹ داتگ چہ ایشی ءَ آئی درد نہ سَگ اِتگ اَنت ءُ بیران بیتگ۔پد ءَ اے کوش وتکشی یے پدر کُرتگ ءُ لاش نسیرآباد ءَ کھول ءِ دست ءَ داتگ۔بلے آئی برات ءَ لاش ءِ شودگ ءِ وھد ءَ زوراکی ءِ نشان دیستگ اَنت ءُ آئی ءِ یک اکسے کش اِتگ ءُ چاگردی رسانکدر ءَ شنگ کُرتگ۔پمشکہ مرچی اے جیڑہ داں اِد ءَ سر بیتگ۔ جارکش ءَ گْوشتگ کہ ھمک روچ زوراکی ءِ داستان گیش بیگ ءَ اَنت اگاں مرچی ما اے زوراکیانی بگیری ءُ مالدارانی اے مالدراری تْرام ءِ بگیری ءِ دیم ءَ یکجاھی ءَ نہ اوشتات ءُ چیردستانی ھمراھداری نہ کُرتگ گڑا آ وھد دور نہ اِنت کہ اے کار گوں ما ھم کنگ بنت۔پمشکہ ما چہ ھمک پگر ءُ لیکہ ءِ مردماں دزبندی کنیں کہ زوراکی ءِ بگیری ءَ بوکیں زھرشانی ءَ بھر بہ زور اِت ءُ چیردستیں راج ءِ ھمراھداری ءُ ھکانی دیگ ءَ مئے ھمرھداری ءَ بہ کن اِت۔ جارکش ءَ وتی درشان ءِ گُڈی ءَ گْوشتگ کہ ما یکبرے پد ءَ یات دیگ لوٹ ایں کہ  بلوچ یکجھتی کمیٹی (کراچی) 28۔اگست۔2021 ءَ شمبے ءِ بیگاہ ءِ ادار چار ءَ کراچی پریس کلب ءِ دیم ءَ زوراکی ءِ بگیری ءَ زھرشانی کنگ بیت۔ما چہ زندگی ھمک بھرگ ءِ مردماں زھرشانی ءَ بھر زورگ ءِ دزبندی ءَ کنیں۔ بنشون: درشان | اکس: دامگ