ریڈیو زْرمبش بلوچی | ریڈیو زْرمبش بلوچی

پرکوٹگ ھوشاپ وئیل: بلوچ چکچینیءِ ھلاس نہ بیتگیں دْرچ اِنت، بی وائی سی کراچی

پرکوٹگ ھوشاپ وئیل: بلوچ چکچینیءِ ھلاس نہ بیتگیں دْرچ اِنت، بی وائی سی کراچی

OCT

11

کراچی: بلوچ یکجھتی کمیٹی (کراچی) ءِ جارکش ءَ وتی شنگ کرتگیں درشانی ءَ گْوشتگ کہ ھوشاپ ءَ لس آبادی ءِ سر ءَ آس داتگیں ماٹر ءَ زھگانی شھید ءُ ٹپی بیگ ءِ گوں تْرندیں دانکاں ایر نہ جنیں بلکیں نوں ما گھگیری کنیں ، پاکستانی لشکر ءَ اِنچو وتواجھی کئے داتگ کہ کجام وھدءَ لوٹی ایت مردماں کُش ایت ءُ چگل دنت ءُ پرچہ آئیءِ جست کنوک نیست؟ لشکر بلوچستانءَ مدام وتی ھدءَ سرگوز کنگءَ اِنت ءُ چہ ایشیءَ لس مردم زوراکی ءِ آماچ اَنت ۔ جارکشءَ گْوشتگ کہ کیچ ءِ ھند ھوشاپ ءَ پاکستانی لشکرءِ نیمگءَ زھگانی سرءَ ماٹر آس دیگ بیتگ کہ چہ ایشی ءَ دوئیں زھگ شھید بیتگ اَنت ۔زی بیتگیں اے وئیل اولی نہ اِنت بلکیں گْوستگیں بازیں دھکاں چوشیں وئیلانی درچ یکشلہ گندگ بیگ ءَ اَنت۔ لشکرءِ نیمگءَ ایشی ءَ پیش ھم چوشیں بازیں وئیلے دیم ءَ اتکگ۔اودءَ یک نیمگے چادرءُ چاردیوالیانی لپاشگ یکشلہ برجاہ اِنت ءُ چاراھانی سر ءَ مردم کُشتگ بیگ ءَ اَنت۔ آئی گوشتگ کہ گْوستگیں سال ءَ پاکستانی لشکر ءِ نیمگ ءَ تربت آپسر ءَ نودر بر ھیات مات ءُ پتءِ دیم ءَ تیر جنگ ءُ کُشگ بوت ءُ ھمے سال ءَ ملکناز ءُ کلسوم تربتءَ گساں کشگ بیتگ اَت اَنت ۔اے بے راھبندی کار ءَ یک نیمگے پاکستانی لشکر ءُ دومی نیمگ ءَ سرکارءِ جوڑ کرتگیں سلاہ بندیں مردم ھوار اَنت۔ بلوچستانءَ برجاھیں اے زوراکیاں درسیں بھرگانی مردم آماچ اَنت ۔ آئی گْوشتگ کہ بلوچستان ءَ چوشیں وئیل ھمک روچ مردم کشگ بیگءَ اَنت ۔ مرچی ھپتگ ءَ پیش تربت آپسر ءَتاج بی بی پہ گسءِ آس ءِ روک کنگ ءِ دارُکءِ چنگ ءَ روگءَ بیت کہ کشگ بیت ءُ انگت تاج بی بی ءِ ھون ھشک نہ بوتگ اَنت کہ ھوشاپ ءَ اے دلپدردیں وئیل کنگ بیتگ۔ بلوچستانءَ برجاھیں چوشیں وئیلانی بیگ اے گپ ءِ منانک اِنت کہ بلوچستانءَ بلوچانی چکچینی گوں تیزی ءَ برجاہ اِنت ۔ جارکش ءَ وتی درشان ءِ گُڈیءَ گوشتگ کہ بلوچستان ءَ بلوچ راج ءِ چکچینی بند کنگ بہ بیت ءُ پاکستانی لشکر ھوشءَ سرءَ بہ کنت ءُ پہ کجام زمہ واریاں لشکر جوڑ کنگ بیتگ ھمایاں پیلو بہ کنت اگاں نہ ما نوں زھرشانی ءِ نیمگ ءَ نہ بلکیں نندانک دئیں ۔


بنشون: درشان | اکس: اُبید مسئودی بلوچ