ریڈیو زْرمبش بلوچی | ریڈیو زْرمبش بلوچی

میان استمانی ادارہ بلوچستان ءَ برجاھیں زورانسری بیگواھیاں پاکستان ءَ جُست بہ کن اَنت۔ بی ایس او آزاد

میان استمانی ادارہ بلوچستان ءَ برجاھیں زورانسری بیگواھیاں پاکستان ءَ جُست بہ کن اَنت۔ بی ایس او آزاد

AUG

30
30 / 08 / 2022 بی ایس او آزاد 48

بلوچ نودربر گَل آزاد ( بی ایس او آزاد ) ءِ بنجاھی جارکش ءَ وتی شنگ کرتگیں درشان ءَ گوشتگ کہ بلوچستان ءِ چہ زوگپتی بگر داں انوں پاکستان یک وڑ ءَ مردمی اگبالاں لپاشگ ءَ اِنت، وتی زوراکی ءَ تہ ءَ ھمک وھد ءَ انچش تیزی آرگ ءَ اِنت کہ بلوچستان ءِ تہ ءَ پہ مردمگری ءَ تباھی ءِ تُرسے ودی بیتگ۔ آئی گوشتگ کہ پاکستان ءَ ھپت دھکاں پیش بلوچستان پہ زور دستیگ کرتگ ءُ ھما اِنت بلوچ ءِ چکچینی یکشلہ برجاہ اِنت، جتاھیں وھداں آئی وتی زوراکی ءِ وڑ مَٹ کرتگ اَنت ءُ مرچی یک انچیں جاھے ءَ سر بیتگ کہ اد ءَ ھمک بھرگاں سْیادی داروکیں مردم زوراکی ءِ شکار اِنت۔ بلوچستان ءَ پاکستان ءِ زوراکی بے تُرس ءَ برجاہ اِنت پمیشکا مرچی ھزارانی کَچ ءَ زھگ، پیریں، ورنا ءُ جنین ریاست ءِ آزار جاھاں زوراکیانی دیمپان اَنت۔ اد ءَ ریاستی ادارھانی دست ءَ لّس مردم ءُ سْیاسی کارکنانی زورانسری بیگواھی دودے جوڑ بیتگ ءُ چہ سالاں زورانسری بیگواھیں مردمانی جونانی دور دیگ برجاہ اِنت۔ ریاست ءِ نیمگ ءَ زوراکیانی وڑ مٹ کنگ بیتگ اَنت، یک وھدے گونیانی تہ ءَ بندیں جون دور دیگ بیتگ۔ برے برے راھانی سر ءَ ورنا کشگ بیتگ اَنت، مرچان نوکیں شوربندی یے رد ءَ چہ سالاں زورانسری بیگواھیں مردم درزنانی کَچ ءَ دروگیں میڑ ءِ نام دیگ ءُ کشگ بیگ ءَ اِنت۔ آئی گوشتگ کہ پاکستان ءَ بلوچ سرڈگار ءِ سر ءَ پہ وتی زورگپتی ءِ برجاہ دارگ ءُ پہ مڈیانی لُٹ ءُ پُل کنگ ءَ وتی تیوگیں زور چکاس اِتگ اَنت۔ اد ءَ پاکستان وتی زور ءَ کارمرز کنگ ءُ مردمی اگبالاں لپاشگ ءَ اِنت۔ ھمے وڑ ءَ پاکستان ءِ میارباریانی سر ءَ مردمی اگبالانی میان استمانی ادارھانی بے تواری آئی ءَ گیشتر کمک کنگ ءَ اِنت۔ شْرپمندیں جھان ءُ میان استمانی ادارھانی بے تواری نہ تیوک ءَ پاکستان ءَ توانمند کنگ ءَ اِنت بلکیں بلوچستان ءِ تہ ءَ مردمی اگبالانی لپاشگ ءِ تیزی آرگ ءِ سوب جوڑ بیگ ءَ اِنت۔ آئی وتی درشان ءِ گُڈی ءَ گوشتگ کہ بلوچستان ءِ جیڑہ گوں سنگینی ءَ زورگ بہ بیت ءُ میان استمانی ادارہ بلوچستان ءَ جنگ آماچیں ھندے بلیک اَنت ءُ پاکستان ءَ زورانسری بیگواھی ءُ بلوچ چکچینی ءِ بابت ءَ جُست بہ کن اَنت۔ میان استمانی ادارھانی بے تواری بلوچ چکچینی ءُ بلوچستان ءَ مردمی اگبالانی لپاشگ ءِ سوب جوڑ بیگ ءَ اِنت، اے سکیں بژنی گپے۔ بنشون: درشان | اکس: دامگ