ریڈیو زْرمبش بلوچی | ریڈیو زْرمبش بلوچی

بلوچ نودربر گل آزاد ءِ بنجاھی جارکش ءَ بلوچ راجی شائر مبارک کازی ءِ بیرانی ءَ بژن درشان کرتگ ءُ آئی ءَ شائر ء آشوب ءِ پنام دیگ ءِ جار جتگ ءُ گوشتگ کہ مبارک کازی وتی سرجمیں زندگی پہ بلوچ ءُ بلوچستان ءَ گپ جنگ ءُ نبشتہ کنگ ءَ گوازینتگ۔ آئی ریاستی بیھاراں بگر داں ھر وڑیں ناگیگیں جاورانی دیمپانی کرتگ بلے چہ راج ءُ زمین دوستی ءَ ھچبر پدکنز نہ بیتگ۔ بلوچی شائری ءَ گھگیری ءِ شائری ءِ تہ ءَ آرگ ءِ گرانبھائیں کار ھمائی ءِ نام ءَ روت۔ آئی ءَ چہ وتی شائری ءَ بلوچستان ءِ ھمک رنگ ءُ دروشم دیم ءَ آرتگ اَنت۔ بلوچ گھگیری شائری مبارک کازی ءَ اَبید ناسرجم اِنت بلکیں بلوچ گھگیری شائری ءِ چھرگ ھم مبارک کازی اِنت۔ آئی ءِ کرد ءِ گون ءَ انساپ کنگ ءَ گل آئی ءَ شائر ء آشوب ءِ پنام دیگ ءِ جار ءَ جنت۔

جارکش ءَ گوشتگ کہ بلوچستان ءَ وھدے ریاست ءَ کشگ ءُ چگل دیگ ءِ شوندات بندات کرتگ چہ ایشی ءَ پد یک مزنیں کچے ءَ شائر ءُ ازمکار ھم نشانگ کنگ بیتگ اَنت۔ آیاں بلوچ گھگیر، گھگیری کرد ءُ جھدکارانی بارو ءَ وتی ازمکاری پیش کرتگ یا شائری کرتگ آ نشانگ کنگ بیتگ اَنت۔ مبارک کازی یک گرانبھائیں آشوبی شائرے اَت آ نشانگ کنگ بیتگ ءُ 2014 ءَ آئی ءِ گِس ءِ دروازگ ءَ دستی بمب اُرش کنگ بیتگ، بلے آ ترس آماچ نہ بیتگ ءُ آئی ءَ ھمے پدر کرتگ کہ آ بلوچستان ءُ بلوچ جھد ءِ گرانبھائیں کردانی سر ءَ وتی شائری ءَ یل نہ کنت۔ آئی ءَ وتی شئیرانی تہ ءَ بلوچ راج ءِ ایردستی، ریاست ءِ زوراکی ءُ ناھکی، بلوچ جھدکارانی گرانبھائیں کردانی سر ءَ انچوش نبشتگ کہ آئی ھمک شئیر بلوچاں پہ دل یات اَنت۔ آ پہ ھمے شائری ءَ زندان ءَ بند کنگ بیت، آئی ءِ بگیری ءَ ایپ آئی آر کنگ بیت، وھدیکہ آئی ءَ گوں جتائیں وڑ ءُ پیم ءَ ترسین اَنت بلے یک گرانھائیں آشوبی شائرے بوگ ءِ بنیاد ءَ آئی ءَ ھچبر گپ ءُ تران نہ کرتگ۔ وھدے کہ راجی جھد ءِ اے گرانبھائیں سپر ءَ مبارک کازی ءِ بچ ءُ بلوچ شائر ڈاکٹر کمبر مبارک وتی جان ندر کُرتگ۔

آئی ءَ گوشتگ کہ مبارک کازی ءَ یک بلوچ شائرے ءِ بنیاد ءَ ھما کرد پیلو کرتگ کہ آئی ءَ بلوچ پہ مدامی گیر کار ایت، وھدے کہ آ پہ درسیں ورنائیں بلوچ شائراں یک درورے جوڑ بیتگ کہ بلوچ ءِ وڑیں ایردستیں چاگردے ءَ یک شائرے ءِ راستیں بستار چے بوگ لوٹ ایت ءُ آئی ءَ کجام چیزانی سر ءَ شائری کنگ لوٹ ایت۔ کازی ءَ چہ وتی کرد ءَ ھمے پدر کرتگ کہ بلوچ چاگرد ءِ تہ ءَ چونیں ھم مردم گوں کجام بھرگ ءَ بندوک اِنت چہ ایشی ءَ اَبید راجی جنز ءِ تہ ءَ وتی کرد ءَ پیلو کرت کنت۔ گپ ھمیش اِنت کہ آ پہ لھتیں کسانیں نپاں وتی کارشونی ءِ سودا ءَ مہ جنت۔ مبارک کازی ءَ بازیں لب دیگ بیت کہ آ وتی بلوچ جھد ءِ سر ءَ شائری ءَ یل بہ کنت بلے آئی ءَ گوں بلوچ ھاک ءَ وپا کرتگ ءُ نوں بلوچ راج داں اَبد مبارک کازی ءَ وتی وپا ءَ پیلو کنت۔

آئی ءَ وتی درشان ءِ گُڈی ءَ گوشتگ کہ گل ءَ بلوچ راجی ءُ گھگیری شائری ءُ داں گُڈی دم ءَ آئی ءِ لیکہ ءِ سر ءَ اوشتگ ءَ آئی ءَ ” شائر ء آشوب“ ءِ نام دیگ ءِ سوڑگ کرتگ۔ سدکاں مبارک کازی بلوچ شائری ءِ ھما گرانبھائیں چیدگ اِنت کہ داں اَبد مان ایت ءُ مدام گیر آرگ بیت۔ وھدے کہ بلوچ ورنائیں شائرانی گون ءَ ھمے اوست ءَ دار ایں کہ آ مبارک کازی ءِ زانوگری ءِ راہ ءَ جنزاں بنت ءُ ھمے ھاک ءِ گون ءَ وتی وپاداری ءَ پیلو کن اَنت ءُ بلوچ سرڈگار ءِ سر ءَ زورگراں چست کرتگ ایشی ءَ لّس مردمانی دیم ءَ کار اَنت ءُ آیاں ریاستی زورگری ءُ بلوچ راجی گھگیری ءُ جھد ءِ بارو ءَ سرپد کن اَنت۔ درسیں ھنکیناں گوشگ بیت کہ آ آشوب ء شائر مبارک کازی ءِ چِل ءِ بارو ءَ جتائیں مراگش برجم بدار اَنت۔

بنشون: درشان / اکس: زرمبش