ریڈیو زْرمبش بلوچی | ریڈیو زْرمبش بلوچی

ایران ءِ زورگپتیں بلوچستان ءَ بلوچانی کُشگ نوآبادکاری ءِ شوربندیانی ترسناکتریں دروشم اِنت۔ بی ایس او آزاد

ایران ءِ زورگپتیں بلوچستان ءَ بلوچانی کُشگ نوآبادکاری ءِ شوربندیانی ترسناکتریں دروشم اِنت۔ بی ایس او آزاد

OCT

04

بلوچ نودربر گل آزاد ( بی ایس او آزاد ) ءِ بنجاھی جارکش ءَ وتی شنگ کرتگیں درشان ءَ گوشتگ کہ ایران ءِ زورگپتیں بلوچستان ءَ ایرانی لشکر ءَ دست ھالیگیں بلوچانی سر ءَ وتی واک کارمرز کرتگ ءُ سدانی کچ ءَ مردم کشتگ ءُ سدانی کَچ ءَ ٹپی کرتگ، دگہ بازیں بلوچے دزگیر کنگ بیتگ۔ ما چہ اکوام متهده ءَ دزبندی کن ایں کہ هواریں دروشمے ءَ ماں بلوچستان ءَ ایران ءُ پاکستان ءِ ناھکیں مردمی اگبالانی بگیریانی جُست ءُ پرس ءَ بکن اَنت ءُ بلوچ گلزمین ءَ جنگجاهے بہ لیک اَنت ءُ دزمانجنی بکن اَنت۔ آئی ءَ گوشتگ کہ گوستگیں هپتگ ءَ ماں ایران ءِ زورگپتیں بلوچستان ءَ ایرانی سپاهیگانی دست ءَ یک کسان سالیں بلوچ زهگے ءِ زورانسری بدکاری کنگ ءِ بگیری ءَ پُرایمنیں زهرشانی کنگ بیتگ کہ آئی ءِ دارگ ءَ ایرانی لشکر ءِ نیمگ ءَ لٹ ءُ کُٹ کنگ بیتگ ءُ وتی واک ءِ گوں ءَ زور کار مرز کرتگ ءُ دست ھالیگیں بلوچانی سر ءَ تیرگواری کرتگ۔ ایران ءِ زورگپتیں بلوچستان ءِ شهر دُزآپ ( زاهدان ) ءَ چہ بندات بیتگیں زهرشانی ءَ دمگ ءِ تہ ءِ لس مردماں جہ جتگ ءُ آئی ءِ گِر ءُ دار کنگ ءَ ایرانی لشکر ءَ تیرگواری کُرتگ ءُ بازیں مردمے کُشتگ ءُ سدانی کچ ءَ ٹپی کُرتگ۔ لس مردمانی اے رنگ ءَ تیرانی نشانگ کنگ ءُ تیرگواری کنگءَ نہ تیوک ءَ مردمی اگبالانی سرجمیں بگیری زانگ بیت بلکیں اے بلوچ راج ءِ گوں تُرندی ءَ چکچینی ءِ درچ اِنت۔ آئی ءَ گوشتگ کہ ایران ءُ پاکستان هر دُک بلوچ ءِ گلزمین ءِ سر ءَ زوگری ءِ وڑ ءَ نشتگ ءُ بلوچ ءِ راجی مڈیانی لُٹ ءُ پُل ءَ کنگ ءَ انت ءُ پہ وتی زوگری ءِ برجاہ دارگ ءَ کجام هم وڑیں لٹ ءُ کُٹ ءُ هونریچیں شوربندیانی کارمز کنگ ءَ هم هچ رنگ ءَ چک ءُ پد نہ بنت - هما وڑا کہ پاکستان همک تبک، تهر ءُ امبر ءِ پرک ءُ پیر ءَ ابید بلوچ راج ءِ چُکچینی ءَ کنگ ءُ پیداک انت، ایران هم یک زوگرے ءِ بستار ءَ مدام همے شوربندیانی سر ءَ کار کنگ ءَ اِنت - چہ ایشی ءَ پیش هم ایرانی سرکار سدانی کچ ءَ بلوچ ورناهاں ءَ پاهو ءِ ساد گُٹ ءَ دیگ ءُ چار راهانی سر ءَ درنجگ ءِ وڑیں کوشے ءِ کار راهبندے وتی کرتگ۔ گوستگیں هپتگ ءِ برجائیں کُشت ءُ کوش ءِ درچ چہ دهکاں برجاھیں زوراکیانی درچ اِنت۔ آئی ءَ وتی درشان ءَ گُڈی ءَ گوشتگ کہ ما اکوام متهده ءَ هوار مردمی اگبالانی کلیں ادارهانی گوں ءَ دزبندی کن ایں کہ سیمسر ءِ دویں نیمگاں بلوچانی سر ءَ بیوکیں زوراکیانی سر ءَ وتی بے تواری ءَ بہ پروش انت ءُ زوگرانی بگیری ءَ هک ءُ دلیں گامگیج بزور اَنت ءُ ماں جنگاں کیل کنوکانی بنیات ءَ دویں زوراکانی سر ءَ پابندی بجن اَنت۔ اگاں اے بے تواری ءِ درچ برجاہ بوت ءُ ماں بلوچستان ءَ برجاھیں زوراکیانی پد ءَ زوگریں واک جست ءُ کنگ نہ بوت اَنت اے دمگ ءِ تہ ءَ یک مردمی تباھی یے ودی بیگ ءِ ترسے بیت کہ سکیں نگیگیں جاورے ودی بیت۔ بنشون: درشان | اکس: دامگ