ریڈیو زْرمبش بلوچی | ریڈیو زْرمبش بلوچی

بی ایس او آزاد ءِ بنجاھی جارکش ءَ تیوگیں بلوچستان ءَ زوریں بیگواھی ءِ تیزی، کشت ءُ کوش، کشندہ ٹولی ءِ مھکمی، دروگیں میڑ ءُ ژانگولیں جونانی دزکپگ ءِ تیزی ءَ بژن درشان کرتگ ءُ گوشتگ کہ پاکستان چین ءُ آدگہ زوراکیں ڈیھانی کمک ءَ بلوچستان ءَ وتی زوراکیاں تیز کنگ ءَ اِنت۔ میان استمانی ادارہ جتائیں ریاستانی دیم ءَ بلیک میل بیتگ اَنت اے جیڑھاں مان آرگ ءَ نہ اَنت چہ ایشی ءَ نزوریں راجانی روچ پہ روچ بیسہ ھلاس بوگ ءَ اِنت ءُ آیانی ارزشت نوں تیوک ءَ یک کسھے جوڑ بوگ ءَ اِنت۔ میان استمانی توانمند پہ وتی کسان ءُ مزنیں نپاں گوں پاکستان ءَ مانگیشتگ اَنت چہ ایشی ءَ اے دمگ ءُ بلوچستان ءَ ریاستی ناشرکاری کاروائی تیز کنگ بوگ ءَ اَنت ءُ باز ریاست پہ وتی مالی ءُ سیاسی نپاں ناشریں کاروائیانی کمک ءَ کنگ ءَ اَنت۔ جارکش ءَ گوشتگ کہ اگست ءِ ماہ ءَ پاکستانی لشکر ءَ سدانی کچ ءَ مردم زور بیگواہ کرتگ اَنت ءُ لھتیں مردم بازیں سَسّائی آزار دیگ ءَ پد یل کنگ بیتگ ءُ بازیں مردم انگت ءَ ریاست ءِ چیریں آزارجاھاں بند اَنت۔ ھمے وڑ ءَ پاروک زھری داں یک سالے ءَ درکانودی بندیگجاہ ءَ بازیں آزاراں پد کشگ ءُ آئی ژانگولیں جون چگل دیگ بیتگ، آئی ءِ جون دارگ ءُ کھول باز دلسیاہ کنگ بیتگ۔ بلوچ ورنایاں ھمے وڑ ءَ پہ زانت ءُ سما یک پندلے ءِ بنیاد ءَ نوں بلوچ جنین ءُ زھگاں زوریں بیگواھی ءِ نشانگ کنگ ءَ اَنت۔ نورھاتون ءُ آئی دو کسانیں زھگانی چہ شال ءَ آوار جنگ ءُ داں چار روچاں آزارانی دیمپان کنگ ھمے شوندات ءِ بھر اِنت، ھمیشی ءِ رد ءَ دُژمنیں ریاست بلوچستان ءَ ترس ودی کنگ ءِ جھد ءَ اِنت۔ بلوچ چکچینی ءِ جتائیں وڑ ءُ پیمانی سر ءَ کار کنگ ءُ ریاست ءَ دروگیں میڑ ءِ شوندات برجاہ داشتگ ءُ ھاران ءَ ھشت مردم دروگیں میڑ ءَ نشانگ کرتگ ءُ کشتگ، سیاسی کارکنانی بگیری ءَ زوراکیانی تہ ءَ ھچ کمی نہ یتکگ۔ لشکرکشی، مردمانی مالی کوش، کشندہ ٹولی ءِ رد ءَ بلوچستان ءَ وت ماں وتیں میڑے ودی کنگ ءِ جھد ءُ بلوچ جھدکارانی کھولانی نشانگ ھمک روچی دودے جوڑ بیتگ۔ ریاستی شونداتاں تیوک ءَ بلوچ نودربر نشانگ کنگ بوگ ءَ اَنت دانکہ ورنایانی تہ ءَ ترسے ودی بہ بیت۔ جارکش ءَ وتی درشان ءِ گڈی ءَ گوں میان استمانی توانمندیں ادارھانی نالگوشی ءَ بژن درشان کرتگ ءُ گوشتگ کہ لھتیں توانمند تیوگیں جھان ءَ مردمی ھک ءُ نزورینانی توار جوڑ بیگ ءِ ٹاپار ءَ جن اَنت ھما دومی نیمگ ءَ ھمے پاکستانی ریاست ءَ مالی ءُ لشکری کمک کن اَنت بلوچ ءِ وڑیں راجانی بگیری ءَ ریاستی زوراکیاں کمک کنگ ءَ اَنت۔ ھمے وڑ ءَ مردمی ھکانی ادارھانی روشت ھمے وڑ ءَ برجاہ اِنت ءُ آ پہ وتی لھتیں نپاں بلوچ ءِ چکچینی ءُ ریاستی زوراکیاں بے توار اَنت، آیاں ھمے لوٹ ایت کہ آ یک زورگر ءُ زوراکیں ریاستے ءِ سروکی ءُ مالی کمک ءَ اَبید نزوریں بلوچ راج ءِ کمک ءَ بہ کن اَنت کہ آ پہ وتی پدریچ ءَ جھد کنگ ءَ اَنت۔ بنشون: درشان / اکس: زرمبش