ریڈیو زْرمبش بلوچی | ریڈیو زْرمبش بلوچی

بی ایس او آزات ءَ بلوچ راج ءُ ورناھانی نام ءَ "اوگانستان ءِ جاور ءُ پہ بلوچ آجوئی جنز ءَ مردمانی گُمان" ءِ سرھال ءَ پنتانکے شنگ کُرتگ

بی ایس او آزات ءَ بلوچ راج ءُ ورناھانی نام ءَ "اوگانستان ءِ جاور ءُ پہ بلوچ آجوئی جنز ءَ مردمانی گُمان" ءِ سرھال ءَ پنتانکے شنگ کُرتگ

JUL

19
19 / 07 / 2021 بی ایس او آزاد 84

بلوچ ورناھاں! آشوبی جھد مدام ناگیگ ءُ نا وشیں جاورانی دیمپان بنت۔ دنیا ءِ تہ ءَ چوشیں ھچ جنزے نیست انت کہ آ راجی آجوئی ءِ پیمیں منزلاں پہ آسودگی ءُ بیدئے جنجالاں سر بہ بیت۔ راجی آجوئی جنزاں بے کچ ءَ کربانی، سگ اوپار ءُ لیکہ ءُ سنگینیں پگر سوبمندی ءِ کشکانی نیمگ ءَ بر انت۔ اوگانستان ءِ تہ ءِ آؤکیں جاور  یکرندے پدا اود ءَ تالبان ءِ بادشاھی ءُ ھاکمی تھت ءُ تاج پوشی ءِ گُمان ءُ دومی نیمگ ءَ بلوچ راجی آجوئی جنز ءِ درگت ءَ مردمانی وتگڑ ءُ نزوریں چار ءُ بیچار راہ رواجی ءُ اجب در ءَ بنت۔ انچوش گوشگ بیگ ءَ انت کہ اوگانستان ءِ ملکی ھاکمی ءِ مٹ بیگ ءَ گوں بلوچ راجی آجوئی جنز یک مزنیں تاوانے ءِ نیمگ ءَ روت انت بلے اے یک نزور ءُ نا پھتگیں گُمانے ءَ چہ ابید دگہ ھچے نہ اِنت۔ چوشکہ بلوچ راجی آجوئی جنز ءِ بندات بلوچ راج ءَ لیکھی بنیات ءَ بنھشت ایر کرتگ۔ اوگانستان یا ایدگہ ھمساھگ ءُ دگہ ملکانی کمکاں چہ جوڑ بیتگیں جنزے نہ اِنت کہ آئی ءِ مھار دگہ دری ملک ءُ تاکتے ءَ گون انت۔ ھستیں دور ءِ بلوچ راجی آجوئی جنز ءِ زانشتی بندات نواب ھیربکش مری ءَ چہ اوگانستان ءَ نہ کُرتگ بگندئے اوگانستان ءَ چہ واتر بلوچستان ءِ آھگ ءَ گوں کُرتگ، کہ اے راجی جنز تاں مرچی ءَ جتائیں کمی ءُ گیشی ءُ سوبمندی ءُ بے سوبیانی میان ءَ جنزگ ءَ انت۔ بلوچ ورناھاناں یک گپے سرپد بیگی انت کہ راجی آجوئی جنز چہ دگہ ملک ءُ راجانی کمک ءَ چہ بندات ءُ آسر نہ بنت بگندئے راجی جنزانی سوبمندی ءُ بے سوبی ءِ دار ءُ مدار گوں ایردستیں راج ءِ وتی کربانی، اوپار ءُ سگ ءُ لیکہ ءَ گوں بندوک انت۔ بلوچستان ءِ تہ ءَ راجی آجوئی جنز مدام چہ راجی تاکت ءُ مردمانی کمکاں چہ بیتگ۔ اے وھداں ھم بلوچ ءِ جھد گوں بلوچ راج ءَ بندوک اِنت کہ بلوچ مردم یک سوچ ءُ پگرے ءِ بنیات ءَ اے جنزءَ گوں بندوکیں جھدکارانی ھمکار ءُ ھم کمک انت۔  اے وَ راستی یے کہ کجام ھم دمگے ءِ سیاسی جاور وتی ھمساھگیں ملک یا راجانی سرا سان (اثر) دور دے اَنت بلئے ھمے سان اے چیز ءَ گوں کار دار انت کہ ھما راج یا کہ راجی جنز چہ تہ ءَ وت چینکس مھکم انت۔ جنزانی سرا دمگ ءِ جاور بدیں سان ھما وھد ءَ کپنت کہ جنز مھکم مہ بنت ءُ چہ تہ ءَ نزور بہ بنت۔ چوشکہ مھکمیں جنز چہ مٹ بووکیں جاوراں پہ وت ءَ گیش راہ گیشین انت۔ راجی جھدکاراں! ما بچار ایں کہ اگاں تھنا پہ دومی ملکانی کمک ءَ ڈیھ آزات بوتین انت گڑا مرچی کشمیر، پارس جنز، تامل، کرد، پلستین ءُ کیتالونیا ءَ ھوار دگہ ھمے ڈولیں ڈیھ مرچی آزات ءُ وتواجہ ات اَنت۔ چی ءَ کہ آزاتی ءُ آزاتی جنز ءِ دار ءُ مدار گوں ھرچ راجے ءِ وتی سر ءَ انت۔ دری ملک تھنا وھدی ھساب ءَ پہ وتی سیتاں دومی راج ءُ مردمانی کمکار بوت کن انت۔ اگاں کجام ھم جنزے ءِ دار ءُ مدار تھنا دری ملکے ءِ جاوراں گوں بندوک بہ بنت گڑا آ جنز ءَ را ادارُکی جنزے گوشگ بوت کنت کہ آ کجام ھم وھد ءَ کٹیت ءُ ھلاس بیت۔ بلوچ راجی آجوئی جنز ءِ مستریں سوبمندی ایش انت کہ بلوچ راج زورگر ءِ اے گنجیں زلم ءُ زوراکیاں ابید ھم بے ھد مھکمی ءَ گوں وتی راجی آزاتی ءِ لیکہ ءَ گوں اوشتاتگ۔ ءُ زورگر ءِ زلم بلوچ مردمان ءَ را ترس ءَ چہ بید آئی ءَ لیکھی رد ءَ گیش مھکم کنگ ءَ انت۔ مرچی بلوچ مھلوک وتی راجی جیڑہ ءِ گیشوار ءَ راجی آجوئی جنز ءِ باندات سرپد بیت۔ بلوچ راجی آجوئی جنز ءِ بابت ءَ اے مردمانی گُمان آھانی نزور ءُ سیاسی نا پھتگی ءِ بستار ءَ در ءَ کن انت۔ بلوچ راجی آجوئی جنز دری ملکے ءِ جوڑ کرتگیں جنزے نہ اِنت پمیشکہ آئی ءَ دری ملکے ءِ جاوراں گوں ھمگرنچ کنگ ءِ جاہ ءَ بلوچ مردمانی پگر ءُ لیکہ ءَ گوں ھمگرنچ کنگ بہ بیت۔ چی ءَ کہ بلوچ راجی آجوئی جنز ءَ را آجوئی ءَ داں سر کنگ ءِ ھاٹی وتی بلوچ لس مردماں چہ زرتگ۔ بلوچ راجءِ تہ ءَ ساڑی ئیں سیاسی ءُ راجی لیکہ دژمن ءَ را سسائی بابت ءَ بے سوب ءُ آئی ءِ زورگری ءِ پروش دیگ ءِ سوب جوڑ بیت۔ پُرسمائیں بلوچ راج! بلوچ راجی آجوئی جنز ءِ سیادی گوں بلوچ مردماں بندوک انت۔ مرچی بلوچ مات وتی زھگان ءَ پہ بلوچ ڈیھ ءَ ندر بیگ ءِ درونت ءَ دیگ ءَ انت۔ بلوچ نوکیں پدریچ ءِ ھیلکاری ھمے راجی جنز ءِ ساھگ ءَ چہ بیتگ۔ ھستیں راجی آجوئی جنز ءِ تہ ءَ بوت کنت ھزاراں کمی بہ بیت۔ بلئے ھمساھگیں ملکے ءِ جاورانی بدلی ءَ نیمونے جوڑ کنگ ءُ چہ وتی نا پوھی ءَ اے پیش کنگ کہ بلوچ راجی آجوئی جنز ءَ یکرندے پد ءَ وتی گوست ءِ یاتاں نوک کنت بزانکہ پرش ایت یا نزور کنت، اے زورگر ءِ پروپیکینڈہ ءُ چیزے نا پھتگیں سیاسی مردمانی ذھنی نا پوھی ءَ چہ ابید دگہ ھچے نہ اِنت- بلوچ راج ءَ را اے گپ سرپد بیگی انت کہ بلوچ راجی آجوئی جنز ءُ آئی ءِ گیش مھکم کنگ ءِ دار ءُ مدار گوں بلوچ ءُ بلوچ ءِ سیاسی پکر ءُ لیکہ ءَ گوں بندوک انت۔ اے وھداں بلوچ ورناھاناں وتی سرکلان ءَ گیش مھکم کنگ ءُ دیم ءِ آؤکیں جنجال ءُ تارا جاڑیگ کنگی انت۔ چی ءَ کہ بلوچ راجی آجوئی جنز ءِ باندات ءُ آئی ءِ باندات ءِ مھکمی ءُ سوبمندی ءِ ڈبہ ھمیشانی کوپگ ءَ انت۔ اے جھد ءِ تہ ءَ گران ءُ نا وشیں جاور کاینت۔ مارا چوش گُشگی نہ انت کہ 2009 ءَ چہ بندات بیتگیں زورگر ءِ گیشیں کریک ڈاؤن ءِ ڈولیں پندل بلوچ راجی جھد ءِ نزور یا ھلاس کنگ ءَ بے سوب بیتگ۔ چوشکہ وھد ءِ ھمراھی ءَ آئی ءِ تہ ءَ گیش ترندی ءُ پھتگی اتکگ۔ دیم ءِ آؤکیں ناگیگیں جاور بوت کنت مارا باندات ءِ بارہ ءَ گیش کار کنگ ءِ سیت بدے انت۔ راجی جنزانی تہ ءِ گٹگیریں جاور گل ءُ پارٹی آن ءَ وتی ردیانی سرپد بیگ ءِ موہ ءَ دنت۔ ھستیں وھدءِ مٹ بووکیں جاور بلوچ جھدکاران ءَ اے دمگ ءِ باندات ءُ میاں استمانی سیاست ءِ پیچ ءُ تاباں سرپد بیگ ءُ وتی جھد ءَ برجاہ دارگ ءِ سوب جوڑ بیت۔ بلوچ جھدکارانی مزن شانیں پکر ءُ اے جھد ھرچ پیم ءَ بلوچ ءَ را اے دلجمی ءَ دنت کہ باج ھرچ ھال ءَ بلوچ ءِ بیت۔ بنشون/اکس:بی ایس او آزات پنتاک