ریڈیو زْرمبش بلوچی | ریڈیو زْرمبش بلوچی

پاکستانی لشکر ءِ آزارجاھاں پنچ سال سرجم بیگ ءَ پد ھم شبیر بلوچ انگت پدر کنگ نہ بیتگ۔بی ایس او آزات

پاکستانی لشکر ءِ آزارجاھاں پنچ سال سرجم بیگ ءَ پد ھم شبیر بلوچ انگت پدر کنگ نہ بیتگ۔بی ایس او آزات

OCT

04
04 / 10 / 2021 بی ایس او آزاد 86

شال: ‎بلوچ نودربر گل آزات ءِ بنجاھی جارکش ءَ وتی شنگ کُرتگیں درشانی ءَ گل ءِ پیشگیں بنجاھی رسانکدری کارگشاد شبیر ءِ بیگواھی ءِ پنچ سال ءِ دراجیں مُدت ءِ سرجم بیگ ءَ پد ھم انگت پدر نہ کنگ ءُ اے بابت ءَ جھانی تْرامگیجانی کِرد ءِ سر ءَ بژن درشان کُرتگ ءُ گْوشتگ کہ سیاسی کارکنانی چہ دھکاں زورانسری بیگواہ کنگ ءُ جھانی تْرامگیجانی نیمگ ءَ بےتواری بژنی گپے۔ آئی گْوشتگ کہ زورگری ءِ روچ ءَ بگر داں مرچی پاکستان یکشلہ بلوچستان ءَ مردمی اگبالاں لپاشگ ءَ اِنت۔پاکستان ءِ نیمگ ءَ بےمیار ءُ لس مردماں روچ رھمانی تیرانی آماچ کنگ ءَ اِنت ءُ سیاسی جُھد کار ءُ گوں بلوچ راجی زْرمبشت ءَ بندوکیں مردماں بیگواہ کنگ ءُ ژانگولیں لاشاں چگل دیگ ءَ اِنت۔پاکستان ءَ بلوچ سرڈگار یک کوشجاھے جوڑ کُرتگ ھمک روچ درزانی کچ ءَ ورنا بیگواہ کنگ ءُ آزارجاھاں بند کنگ بیگ ءَ اَنت۔بلوچستان ءَ برجاھیں زوراکی ءُ ھمک روچ مردمی اگبالانی لپاشگ ءَ ابید جھانی تْرامگیجانی بے تواری ندارگ چارگ ءِ کِرد ءَ پیلو کنگ ءَ اَنت۔ آئی گْوشتگ کہ گْوستگیں دو دھکاں برجاھیں اے زوراکیاں گل مدام پاکستان ءِ نشانگ ءَ بیتگ۔پاکستان ءِ نیمگ ءَ گل ءِ سدانی کچ ءَ کارکن زورانسری بیگواہ کنگ ءُ ژانگولیں لاش چگل دیگ بیتگ اَنت۔درزنے بنجاھی اُگدھدار شھید کنگ بیتگ ءُ سدانی کچ ءَ بنجاھی سروک ءُ باسک چہ دھکاں پاکستان ءِ آزارجاھاں بند اَنت۔گل ءِ پیشگیں کمک سرکماش ذاکر مجید ءِ بیگواھی ءَ دوازدہ سال ءُ گل ءِ پیشگیں سرکماش زاھد ءِ بیگواھی ءَ ھپت سال ءِ دراجیں مُدت سرجم بیتگ۔بنجاھی سروک ءُ باسکانی زورانسری بیگواہ کنگ ءِ مراد گل ءِ پُر ایمنیں جُھد ءِ لپاشگ ءُ شبیر ءِ زورانسری بیگواہ کنگ ھمے دْرچ ءِ یک کڑی یے۔ آئی گْوشتگ کہ گل ءِ پیشگیں رسانکدری کارگشاد‎ شبیر 4اکتوبر 2016 ءَ چہ گورکوپ کیچ ءَ زورانسری بیگواہ کنگ بیتگ۔شبیر ءِ زورانسری بیگواہ کنگ ءِ بگیری ءَ گل ءُ آئی ءِ کھولانی نیمگ ءَ جتائیں وھداں زھرشانی کنگ بیتگ ءُ جھانی تْرامگیجانی شبیر ءِ پہ سلامتی یل کنائینگ ءَ دزبندی کنگ بیتگ۔آئی ءِ کھول ءِ نیمگ ءَ شال ءُ کراچی ءَ ھوار اسلام آباد ءَ ھم زھرشانی کنگ بیتگ بلے مردمی اگبالاں ھوار ھچ مردمی اگبالانی ترامگیجانی نیمگ ءَ ھچ گْوشگ نہ بیتگ۔جھانی تْرامگیجانی نادلگوشی ءِ کہ دیستگ گل ءِ نیمگ ءَ جھانی ترامگیجان ءَ نمدی نبشتہ کنگ ءُ راہ دیگ بیتگ بلے مردمی اگبالانی نیمگ ءَ پہ سیاسی کارکنانی پد جنگ ءَ ھچ پیمیں گامگیج زورگ نہ بیتگ۔ وتی درشان ءِ گُڈی ءَ جارکش ءَ گْوشتگ کہ مردمی اگبالانی بےتواری پہ پاکستان ءَ کمکے جوڑ بیتگ ءُ دومی نیمگ ءَ اے پہ جھانی تْرامگیجانی کِرد ءَ مزنیں جُستے ودی بیتگ۔ شبیر یک پرایمنیں نودربر گلے ءِ بنجاھی سروکے بیتگ ءُ آئی ءِ بیگواھی ءِ پنچ سال سرجم بیگ ءَ پد ھم دیم ءَ نیارگ بژنی گپے۔اے بابت ءَ شبیر ءِ کھول ءِ نیمگ ءَ 4اکتوبر 2021 ءَ آئی ءِ بیگواھی ءِ پنچ سال سرجم بیگ ءَ کراچی پریس کلب ءِ دیم ءَ زھرشانی کنگ ءِ جار جنگ بیتگ۔زھرشانی ءَ دُرسیں مردم دوست ءُ راجدوستیں مردمانی بھر زورگ ھژدری اِنت۔اے بابت ءَ گل ءِ نیمگ ءَ شبیر ءِ پہ سلامتی دیم ءَ آرگ ءَ چاگردی رسانکدر ءَ کیمپین ئِے ھم برجم دارگ بیت۔


بنشون: درشان | اکس: دامگ