ریڈیو زْرمبش بلوچی | ریڈیو زْرمبش بلوچی

اوتھل: بلوچ اسٹوڈنس پرنٹ اوتھل ھنکین نیمگ ءَ زالبولانی دوارگس (ھاسٹل) ءَ پہ نوک اتکگیں نودربراں یک وش آتکی مراگشے برجم دارگ بیتگ۔ اے مراگش سے بھرانی تہ ءَ بیتگ۔ اولی بھر راجی سوت، دومی بھر گْوشتانک ءُ سیمی بھر شِئر ءُ شائری بیتگ۔ اے مراگش ءِ تہ ءَ بلوچ اسٹوڈنس پرنٹ اوتھل ھنکین ءِ کمک سرکماش بانک دروشم ءُ بلوچ اسٹوڈنس پرنٹ ءِ بنجاھی پتر ءِ باسک بانک آسیہ بلوچ ساڑی بیتگ اَنت۔ مراگش ءِ بندات چہ بلوچ راجی سوت ءَ کُرتگ، راجی سوت ءِ وانگ ءَ چہ پد سنگتاں مراگش ءِ دومی بھر بندات کُرتگ۔ دومی بَھر ءَ بلوچ اسٹوڈنس پرنٹ ءِ بنجاھی پَتر ءِ باسک آسیہ بلوچ ءَ تران کرتگ ءُ گْوشتانک ءَ نوک اتکگیں نودربراں ءَ راجکاری ءِ ارزشت ءُ نودربرانی بُنکی لوٹ ءُ بلوچستان ءِ انوگیں جاور ھالانی سر ءَ گپ کُرتگ۔ بانک آسیہ ءَ دیمتر ءَ تران کرتگ ءُ گوشتگ کہ انوگیں وھد ءِ سر ءَ اگاں ما چمشانکے بہ دے اَیں گُڑا مارا بلوچ زالبولانی کساس سک ءَ کم گندگ ءَ پیداک اِنت کہ آ راجکاری کنگ ءَ اَنت۔ بلے گیش ءَ چہ گیش نودربر چہ راجکاری ءَ دور بوان اِنت ءُ ھمے زالبولانی دور بوگ ءِ سوب ءَ مرچی چاگرد ءِ تہ ءَ راجکاری ءِ بُن ھُشک تَر اِتگ اَنت۔ سنگتاں دیمتر ءَ تران کرتگ ءُ گوشتگ کہ بلوچ ءِ بگیری ءَ مدام یک پندلے سازگ بیتگ کہ بلوچ نودبراناں چوں چہ راجکاری ءَ دور بہ کن اَنت ایشی ءِ دروَر مئے ءُ شمئے دیم ءَ اِنت اگاں آ چہ ماھل بلوچ ءِ دروشم ءَ بہ بیت یا نورجان بلوچ ءِ، باید ھمیش اِنت کہ گیش ءَ چہ گیش جنکیں نودربر راجکاری ءِ پڑ ءَ وت ءَ را ھوار بہ کن اَنت ءُ پہ وتی بزگیں ءُ پدمنتگیں بلوچ راج ءَ وتی کرد ءَ پیلو بہ کن اَنت۔ مراگش ءِ سیمی بَھر ءَ سنگتاں وتی شھدیں زُبان بلوچی ءُ براھوی ءِ تہ ءَ شئیر ءُ شائری کُرتگ ءُ نوک آتکگیں نودربراناں ءَ وتی ماتی زبان ءِ بابت ءَ شِئر ءُ شائِری نبشتہ کنگ ءِ سکین داتگ، دانکہ گیش ءَ چہ گیش جنکیں نودربر شائری ءِ پِڑ ءَ وت ءَ ھوار بہ کَن انت ءُ مئے ماتی زُبان بہ رک اِیت ءُ مھکم بہ بیت۔ بنشون: درشان | اکس: بی ایس ایپ