ریڈیو زْرمبش بلوچی | ریڈیو زْرمبش بلوچی

بلوچ اسٹوڈنٹس کونسل اسلام آباد ءِ جارکش ءَ وتی درشان ءَ گوشتگ کہ بلوچستان ءَ ریاست ءِ نیمگ ءَ درکانودی مردمانی بیگواہ کنگ یک دودے جوڑ بیتگ۔ ریاستی ادارہ مُپت ناھک ءَ بلوچ نودربراں زور بیگواہ کنگ ءَ اَنت۔بیگواہ کنگ ءَ پد نہ آمیدگس ءَ پیش کنگ بنت ءُ نہ آیانی کھول سرپدی دیگ بنت۔ جارکش ءَ دیمتر گوشتگ کہ گوستگیں روچ ءَ بلوچستان ءِ شھر تربت ءِ بازار ءَ ایرڈ ایگریکلچر زانشتجاہ راولپنڈی ءِ زانشتی بھرگ ءِ نودربر اھمد ھان ءُ آئی کھول ءِ پنچ مردم زھیر اھمد، پیرجان، شاہ جان، آدل ءُ شوکت نیمروچ ءِ وھد ءَ پاکستانی لشکر ءَ آوار جتگ ءُ بیگواہ کُرتگ اَنت۔ 24 اداراں پد ھم نہ آمیدگس ءَ پیش کنگ بیتگ اَنت ءُ نہ آیانی کھول ءِ مردم سرپدی دیگ بیتگ اَنت۔ پمشکا کھول چہ آیانی بیگواھی ءَ پریشان اَنت۔ یات بہ بہ اِت کہ یک سالے پیش چہ راولپنڈی ءَ زور بیگواہ کنگ بیتگیں نودربر پیروز ءُ اھمد ھان ء شُگراللہ ھم تبک اَنت۔ آ گوستگیں سال ءِ یازہ مئی ءَ چہ وابجاہ ءَ کتابجاہ ءَ روگ ءِ وھد ءَ زور بیگواہ کنگ بیتگ۔ اسلام آباد آمیدگس ءِ گْوشگ ءَ اَبید ھم پیروز انگت ءَ نہ آمیدگس ءَ پیش کنگ بیتگ ءُ نہ کہ دیم ءَ آرگ بیتگ۔ وھدے کہ پیرجان، شاہ جان، آدل ءُ شوکت ھندی وانگجاھے ءَ دہ تبک ءِ نودربر اَنت ءُ زھیر پہ روزگار ءَ ڈرائیورے کنگ ءَ بیتگ۔ جارکش ءَ وتی درشان ءِ گُڈی ءَ چہ ھمے ادارھاں لوٹ کُرتگ ءُ گْوشتگ کہ مردم درکانودی بیگواہ کنگ مہ بنت ءُ اھمد ھان ءُ پیروز ءَ ھوار درسیں بیگواھیں بلوچ نودربر یل کنگ بہ بنت ءُ مردمانی بیگواہ کنگ ءِ درچ بند کنگ بہ بیت۔ بلوچ اسٹوڈنٹس کونسل اسلام آباد بلوچ نودربرانی زور بیگواہ کنگ ءِ بگیری ءَ زھرشانی کنگ ءِ ھک دار ایت ءُ چہ درسیں بھرگاں سیادی داروکیں مردماں دزبندی کنت کہ اے درکانودی کار ءِ گِر ءُ دار کنگ ءَ مئے کمک ءَ بہ کن اِت۔ بنشون: درشان / اکس: مونوگرام