ریڈیو زْرمبش بلوچی | ریڈیو زْرمبش بلوچی

کراچی: بساک ءِ سرکماش ڈاکٹر سبیہ ءِ برات ءُ ناکوزتک ءِ پدجنگ ءَ زھرشانی روانکے کشگ بیتگ

کراچی: بساک ءِ سرکماش ڈاکٹر سبیہ ءِ برات ءُ ناکوزتک ءِ پدجنگ ءَ زھرشانی روانکے کشگ بیتگ

OCT

24

کراچی: بلوچ اسٹوڈنٹس ایکشن کمیٹی ءِ بنجاھی سرکماش ڈاکٹر سبیہ ءِ برات ءُ ناکوزتک ءِ پدجنگ ءَ آرٹ کونسل ءَ بگر داں کراچی پریس کلب ءَ زھرشانی روانکے کشگ بیتگ۔زھرشانی روانک ءَ نودربراں ھوار جتائیں بھرگاں سیادی داروکیں مردمان مزنیں کچے ءَ بھر زُرتگ۔ زھرشانی روانک ءَ تران کنان ءَ ترانکاراں گْوشتگ کہ انیگیں وھد ءَ نودربر سیاست ءِ سر ءَ سرجم ءَ پابندی جنگ ءِ جُھد کنگ بیگ ءَ اِنت۔نودربر سیاست ءِ راہ ءَ اڈاند ودی کنگ ءِ جُھد کنگ بیگ ءَ اِنے ءُ نودربر چہ سیاست ءَ گستاہ دارگ ءِ جتائیں پندل چکاسگ بیگ ءَ اِنت۔ بلوچ اسٹوڈنٹس ایکشن کمیٹی ءِ بنجاھی سرکماش سبیہ ءِ برت ءُ ناکوزتک زورانسری بیگواہ کنگ ھمے درچ ءِ یک کڑی یے۔ آئی گْوشتگ کہ بلوچستان ءَ زورانسری بیگواہ کنگ بس کنگ ءِ نام ءَ گرگ ءَ نہ اِنت۔جاھے سیاسی چست ءُ ایرانی سر ءَ پابندی جنگ بیگ ءَ اِنت ءُ جاھے سیاسی کارکنانی بےتوار کنگ ءَ جتائیں پندل سازگ بیگ ءَ اِنت۔ھمے وڑ ءَ چاگرد ءَ بازیں جُست ئِے پاد اَتکگ کہ ڈاکٹر سبیہ کجام میار کُرتگ کہ آ ھم مچی سزا دیگ بیگ ءَ اِنت۔آ کجام کار اَنت کہ آ یک راجمستری سیاسی بنیادے ءِ سر ءَ بیسہ داروکیں کارکنے پریشان کنگ بیگ ءَ اِنت۔ آئی گْوشتگ کہ ڈاکٹر سبیہ ءِ برات ءُ ناکوزتک ءِ زورانسری بیگواھی یک در راھبندی ءُ در راجمستری کارے ما ایشی ءَ گوں ترندی ءَ ایرجن ایں ءُ اے کار ءِ بگیری ءَ باسمائیں مردمانی اوشتگ ھژدری اِنت۔ ڈاکٹر سبیہ مدام ایردست ایں مردمانی توار جوڑ بیتگ ءُ مرچی آئی ءِبے توار کنگ ءَ آئی ءِ بگیری ءَ اے مردم آوار جنگ بیتگ اَنت۔ بنشون: اھوالکار | اکس: اھوالکار