ریڈیو زْرمبش بلوچی | ریڈیو زْرمبش بلوچی

تُربت زانشتجاہ واکدار چہ وتی کولاں بَجّ اِتگ ءُ چہ نودربراں گیشیں زَرّ گِرگ ءَ اِنت۔بساک

تُربت زانشتجاہ واکدار چہ وتی کولاں بَجّ اِتگ ءُ چہ نودربراں گیشیں زَرّ گِرگ ءَ اِنت۔بساک

JAN

21

شال: بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کُرتگیں درشانی ءَ گْوشتگ کہ تُربت زانشتجاہ سرجمیں مکران ءَ یکیں زانشتی تْرامگیج اِنت کہ دور ءُ دراجیں نودربر وتی وابانی آسر کنگ ءَ ھمے زانشتجاہ ءَ کاینت،بلے زانشتجاہ ءِ واکدار چہ بنداتی روچاں چہ وتی در راھبندی ءُ زانشت دُژمنی ءِ سْوب ءَ ھمک سال سدانی کچ ءَ پہ نودربراں اے دَر بند کنگ بیگ ءَ اِنت۔بیچلر ءُ پہ ماسٹر ڈگری ءِ داکلہ گِرگ ءَ برے واھگدارانی نام چہ لَڈ ءَ کشگ بیت ءُ برے آیانی داکلہ ءِ پارم رَد کنگ بنت۔ آئی گْوشتگ کہ اے سال ءَ ھم زانشتجاہ ءِ نیمگ ءَ پہ ماسٹر ڈگری ءِ گِرگ ءَ داکلہ ءِ جار جنگ بیتگ اَت ءُ تچکی ءَ گْوشگ بیتگ اَت کہ ھما واھگدار کہ آیانی سوبمندی ءُ بےسوبی انگت زانگ بیتگ آ ھم داکلہ زُرت کُرت کن اَنت۔سدانی کچ ءَ نودربراں وتی داکلہ پارم داتگ اِت اَنت۔چہ نودربراں گیشیں زَر گِرگ گِپتگ اَنت ءُ نوں زانشتجاہ ءِ واکدار چہ وتی کولاں بَجّ اِتگ اَنت،نوں ھمے گْوشگ ءَ اَنت ھما نودربرانی سوبمندی ءِ بےسوبی زانگ نہ بیتگ آ دکلہ دیگ نہ بنت۔ بُنجاھی جارکش ءَ واکدارانی اے روِشت ایرجتگ ءُ گْوشتگ کہ سرجمیں جھان ءِ زانشتی تْرامگیجاں " ھوپ سرٹیپکیٹ" ءِ بنیاد ءَ داکلہ زورگ بیت۔بلے تربت زانشتجاہ ءِ نیمگ ءَ "ھوپ سرٹیپکیٹ" ءِ بنیاد ءَ داکلہ زوروکانی نام رَد کنگ بیتگ اَنت کہ اے زانشت دُژمنی یے۔چونائی ءَ چکاسانی آسر ھم زانشتجاہ ءِ واکدارانی جان بَڈی ءِ سْوب ءَ انگت نیاتکگ اَنت۔زانشتجاہ ءِ واکدار بایدیں نودربراں ھوپ سرٹیپکیٹ ءِ بنیاد ءَ داکلہ بہ دنت یا کہ زوتاں چہ زوت بیچلر چکاسانی آسر ءِ جار ءَ بہ جنت داں نودربر ھمے دْرچ ءَ براجاہ داشت بہ کن اَنت،اگاں نہ نودربر وتی راھبندی ھک ءِ بنیاد ءَ زھرشانی کن اَنت۔ بنشون: درشان | اکس: زرمبش