ریڈیو زْرمبش بلوچی | ریڈیو زْرمبش بلوچی

پاکستانی لشکر ءِ نیمگ ءَ بلوچانی کُشت ءُ کوش تیز کنگ بیتگ– بی آر پی

پاکستانی لشکر ءِ نیمگ ءَ بلوچانی کُشت ءُ کوش تیز کنگ بیتگ– بی آر پی

OCT

03
03 / 10 / 2021 بی آر پی 118

بلوچ استمانی گل (بی آر پی) ءِ بنجاھی جار کش شیر مھمد بگٹی ءَ وتی شنگ کُرتگیں درشانی ءَ گْوشتگ کہ بلوچستان ءَ برجاھیں پاکستانی لشکر ءِ زوراکیانی بگیری ءَ جرمنی ءِ شھر گوٹنگن ءَ زھرشانی کنگ بیتگ۔ جارکش ءَ گْوشتگ کہ زھرشانی ءِ مراد بلوچستان ءَ پاکستانی لشکر ءِ نیمگ ءَ برجاھیں زورانسری بیگواھی،کوش،نودربرانی سر ءَ زوراکی،جنین ءُ زھگانی کُشت ءُ کوش جھان ءِ دیم ءَ آشکار کنگ بیتگ اَنت۔ بی آر پی ءِ جارکش ءَ گْوشتگ کہ انیگیں روچاں پاکستانی لشکر ءَ بےمیاریں بلوچانی کُشت ءُ کوش تیز کُرتگ ءُ اے بابت ءَ جھانی مردمی اگبالانی ترامگیجانی بےتواری بژنی گپے۔ آئی گْوشتگ کہ 23 ستمبر ءَ تربت ءِ نزیک ءَ دارُک چنگ ءَ روگ ءَ بیتگیں تاج بی بی پاکستانی لشکر ءِ کارمنداں تیر گْواری ءُ شھید کُرتگ ءُ مرچی پاکستانی لشکر ءَ بلیدہ سیاسی کارکن زریپ رند ءِ گس ءِ سر ءَ اُرش کُرتگ ءُ آئی ءِ ھشت سالی برازتک کُشتگ ءُ یک زھگے ٹپی کُرتگ۔ جارکش ءَ گْوشتگ کہ بے میاری بلوچانی کُشگ آیانی گسانی سر ءَ اُرش کنگ پاکستانی لشکر ءِ ھما شونداتانی دْرچ اِنت کہ گْوستگیں بیست سالاں برجاہ اِنت۔آئی ءِ مول ھمک بھرگ ءِ بلوچانی کُشگ ءُ بےتوار کنگ اِنت داں کس پہ وتی اگبالاں جُھد ءِ بھر مہ بیت۔ھمے سْوب اِنت کہ ھمک روچ شال ءَ ھوار آدگہ شھراں نودربرانی سر ءَ زوراکی کنگ ءُ بندیگجاھاں بند کنگ بیگ ءَ اَنت۔ شیر مھمد بگٹی ءَ گْوشتگ کہ پاکستانی لشکر ءِ ناشرکاری زوراکیانی سر ءَ ملکی ءُ درملکی مردمی اگبالانی تْرامگیجانی بےتواری بژنی گپے۔


بنشون:درشان/اکس:بی آ ر پی