ریڈیو زْرمبش بلوچی | ریڈیو زْرمبش بلوچی

برتانیا ءَ میان استمانی روچ ءِ درگت ءَ بی این ایم ءِ نیمگ ءَ آگاھی باوستے برجم دارگ بیتگ

برتانیا ءَ میان استمانی روچ ءِ درگت ءَ بی این ایم ءِ نیمگ ءَ آگاھی باوستے برجم دارگ بیتگ

AUG

31
31 / 08 / 2022 بی این ایم 56

لندن: بلوچ راجی زْرمبشت۔ برتانیا تک ءِ نیمگ ءَ یک شمبے (30 اگست) ءِ روچ ءَ زورانسری بیگواھی ءِ آماچ بیتگیں مردمانی میان استمانی روچ ءِ درگت ءَ آگاھی باوستے برجاہ دارگ بیتگ ءُ ھمے رد ءَ ’سرپدی تاک‘ شنگ کنگ بیتگ۔ چہ بی این ایم ءِ نیمگ ءَ لوٹ کنگ بیتگ کہ پاکستان ءِ لشکر ءَ برتانیا ءِ کمک اشتاپی ءَ بند کنگ بہ بیت ءُ پہ آئی ءَ منگ بیتگیں مردمی کمک گوں اے گپ ءَ بندوک بہ بیت کہ پاکستانی واک مردمانی بیگواہ کنگ ءَ سرجمی ءَ بند کن اَنت۔ بی این ایم ءِ نیمگ ءَ شنگ کنگ بیتگیں پنتاک ءَ گْوشگ بیتگ چہ 2001 ءَ بہ گر داں انی بلوچستان ءَ ھمروچ 4 کس پہ زور بیگواھی ءِ آماچ کنگ بیگ ءَ اِنت۔ داں انیگ ءَ 30ھزار ءَ گیش مردمی اگبالانی پانکجن،استاد، اھوالکار، نودربر، وکیل ءُ سیاسی کارکن پہ زور بیگواہ کنگ بیتگ ، آ دگہ برے بھ گندگ نہ بیتگ اَنت۔ چہ ایشاں ابید 6 ھزار مردم زندانانی تہ ءَ کشگ ءُ پہ ترس ودی کنگ ءَ آیانی ژانگولیں کنٹ جتائیں جاھاں چگل دیگ بیتگ اَنت۔ ’مردمی اگبالانی میان استمانی ادارھاں ابید پاکستانی سرکار ءُ آمیدگس ھم اے من ایت کہ پاکستانی فوج ءُ آئی ءِ چیریں واک زوریں بیگواھیانی تچکیں زمہ وار اَنت اے گپ ءِ پدر بیگ ءَ پد ھم ھندی آمیدگس ءُ میان استمانی تک ءَ بیگواھیانی زمہ وار آیانی اے ملامانی سر ءَ جست کنگ نہ بیتگ اَنت۔‘ بی این ایم ءَ چہ برتانیا ءِ شھرمننداں اے دزبندی کرتگ کہ آ بلوچستان ءَ پہ زوریں بیگواھی ءُ مردمی اگبالانی باروا وتی ایم پیزاں نمدی نبشتہ بہ کن اَنت ءُ آیاں کڈن بہ کن اَنت کہ آ وتی سرکار ءَ زور بہ دئے اَنت کہ برتانیا ءِ سرکار پاکستان ءِ کمک ءَ گوں مردمی اگبالانی جاور ءِ گھتری ءَ ھمگرنچ بہ کنت۔ بنشون: درشان | اکس: بی این ایم