ریڈیو زْرمبش بلوچی | ریڈیو زْرمبش بلوچی

بلوچ راجی زْرمبشت ( بی این ایم ) ءِ نیمگ ءَ بلوچستان ءَ زور بیگواھی ءُ یکجاھیں کنٹانی دست کپگ ءِ بگیری ءَ پنتاکے شنگ کنگ بیتگ

بلوچ راجی زْرمبشت ( بی این ایم ) ءِ نیمگ ءَ بلوچستان ءَ زور بیگواھی ءُ یکجاھیں کنٹانی دست کپگ ءِ بگیری ءَ پنتاکے شنگ کنگ بیتگ

OCT

27

منگھیں بلوچاں! گْوستگیں دو دھک اِنت کہ ماں بلوچستان ءَ پاکستان ءَ زوراکے ءِ انچیں کردگار کرتگ کہ بلوچستان ءِ نندوکیں ھمک مردم زھن، بالاد، گزرانک، چاگرد ءُ سیاسی تک ءَ سانمند بیتگ۔پاکستان ءَ وتی نوکابادی تْرام ءُ بالادستی ءِ برجاہ دارگ ، چین ءُ پاکستان گزرانکی شور ءِ سرجم کنگ ءُپہ مردمانی زرد ءُ سنچ ءِ ترینگ ءَ بلوچستان ءِ اگبالانی بندات (آغاز حقوق بلوچستان)نامیں پیکجے ءِ جار پرینت ءُ ھمیشی ءِ رد ءَ بلوچستان ءَ شوھاز بہ کن ، آزار بہ دئے ءُ ماں ویرانگاں ژانگولیں کنٹ ءَ چگل بہ دئے ءِ شوندات ھم برجاہ دارگ بوت داں نیمگے ھمے پیکج ءِ نام ءَ مردمانی دل تْرینگ بہ بیت ءُ دومی نیمگ ءَ زور بیگواھی ءُ ژانگولیں کنٹانی پارست ءَ ترس ودی کنگ ءُ مردمانی توار نگٹ کنگ بہ بہ اَنت۔ ڈیھ ءِ پسگاں! انچوش کہ شما زان اِت وھدے پاکستان ءَ بلوچستان ءَ زور بیگواھی ءُ ژانگولیں کنٹانی چگل دیگ بندات کرت گڑا پہ بلوچستان ءِ آجوئی ءَ جھد کنوکیں گلاں گوں مردمانی ھمراھی ءَ ھمے کارپد ایر جت ءُ زھرشانی کرت۔ اے کار ءَ میان استمانی تْرامگیجاں زور بیگواھی ءِ جیڑہ ءِ سر کنگ ءَ بنکی کردے پیلو کرت۔شمئے سنچ ءُ سمائی جھد ءِ برورد ءَ پاکستان رنگیں زوراکیں مھترندے چہ وتی کارپداں شومان ءُ پد کنز و نہ بوت بلے پیش ءَ کہ ھمے کنٹ ئِے ژانگولینتگ ءُ دگ ءُ گیاباں چگل داتگ اَنت داں ترس ءَ گیشتر برجاہ بہ دار ایت نی آ چہ شمئے جھد ءَ انچوش بے وار بیتگ کہ زور بیگواھیں مردماں گیاباں چگل دیگ ءَ نہ اِنت بلکیں چیروکائی یکگور کنگ ءَ اِنت داں بلوچ سیاسی گل چہ مردمانی کمک ءَ پاکستان ءِ بدیں کرد ءُ کاراں جھان ءِ دیم ءَ پاشک کرت مہ کن اَنت۔ منگھیں بلوچ راج! ژانگولیں کنٹانی چگل دیگ بہ بیت یا زور بیگواھیں مردمانی یکگور کنگ اے درس پاکستانی مھترند ءِ کارپد اَنت کہ چہ کس ءَ چیر نہ اَنت۔ژانگولیں کنٹ ءُ یکگور کنگ ءَ پد نی زور بیگواھیں مردمانی کنٹ بے کس لیکگ ءُ پنجاپ ءِ نادْراھجاھانی مردگجاہ ءَ برگ بیتگ اَنت ، ناں پہ آیانی پجار ءَ ڈی این اے کنگ بیتگ ءُ ناں کہ پاکستان ءِ ھالرساناں اے ھال شنگ کرتگ چہ ایشی ءَ پدر بیت کہ اے کنٹ زور بیگواھیں بلوچانی بیتگ اَنت کہ بے کس لیکگ ءُ کل کنگ بیتگ اَنت ، داں اے کارپد ءِ بگیری ءَ کس توار چست مہ کنت۔ نزیکیں روچاں چہ ملتان ءِ نشتر نادْراھجاہ ءَ 500 کنٹ بان ءِ سر ءَ چگل دیگ بیتگ کہ یک ءُ ٹک و پجارگ و نہ بیتگ اَنت بلے گما ن اِنت کہ ژانگولیں کنٹ بلوچانی بہ اَنت پرچا کہ بلوچستان ءَ ھزارانی کچ ءَ بلوچ زور بیگواھی ءِ نشانگ کنگ بیتگ۔نادراھجاہ ءِ چارگزارانی رد ءَ اے کنٹ پاکستانی پھزداراں آؤرتگ اَنت چہ ایشی ءَ ھم اے گمان مھکم تر بیت کہ اے کنٹ زور بیگواھانی بوت کن اَنت۔ بلوچ راج! انچوش کہ شما زان اِت پاکستان ءِ تھی کارانی وزیر ، راھبندی وزیر ءِ سروکی ءَ بولکے ماں شال ءَ گوں زیارت ویل ءِ بگیری ءَ زھرشانی کنوکیں کھولاں دوچار کپت ءُ آیاں دلجمی ئِے دات کہ زور بیگواھیں مردم دروگیں میڑاں کشگ نہ بہ اَنت ءُ زوربیگواھی ءِ سر ءَ راھبند جوڑ کنگ بیت بلے واکدارانی داتگیں دلجمی ھچ پہ ھچ ، ناں کہ دنیگت بلوچستان ءَ زور بیگواھی کم بیتگ، ناں کہ دروگیں میڑ کم بیتگ اَنت ءُ ناں کہ ژانگولیں کنٹانی دست کپتگ بند بیتگ چہ ایشی ءَ سھرا اِنت کہ پاکستان ءَ توان ءُ واک ءِ سرچمگ پاکستانی لشکر اِنت ءُ لشکری واک ءِ دیم ءَ ھچ تْرامگیج ءَ وس نیست کہ ایشانی دیم ءَ بہ دار ایت۔ گیدریں راج ءِ زھگاں! پاکستان چہ وتی اے کارپد ءَ دست ءَ نہ کش ایت پرچا کہ پاکستان ھرچ نھاد ءَ پہ تبلوچ راجی زْرمبشت ءِ دیم ءَ دارگ ءَ ترسین، زھن ءُ سما ءِ تْرینگ ءُ بیران کنگ ءِ شوندات ءِ سر ءَ کار ءَ اِنت۔پاکستان ءِ اے زوراکیانی گر ءُ دار ءِ تیوکیں پارست بلوچ راج ءِ گھگیری اِنت۔راجی ءُ سیاسی گھگیری ءَ ابید گل ناں راجی زْرمبشت ءَ دیم ءَ برت کن اَنت ءُ ناں پاکستان ءِ اے سلیں میار ءَ داشت کن اَنت۔ پمیشکا بلوچ راج گوں سیاسی گھگیری ءِ سلاہ ءَ ایشی ءِ دیم ءَ بند بست کنت داں کہ ما بے توار ایں پاکستان وتی ھمے کار ءَ کنان بیت۔سنچ ءُ سمائیں جھد مئے سوبمندی ءِ مانزمان اِنت ءُ مئے سوبمندی بلوچ سرڈگار ءِ واکدار بیگ اِنت ھما روچ ءَ کہ ما وتی مول ءَ سوبین بہ ایں ھما روچ ءَ بلوچستان ایمن بیت ءُ ژانگولیں کنٹانی دست کپگ ءِ دْرچ آسر بیت۔چہ آجوئی ءَ پیش اے کار برجاہ بیت پمیشکا زانشت، کرد ءُ گھگیری ءِ راہ ءَ بہ زیر اِت ءُ انچیں کارانی بھر بہ بہ اِت کہ چہ آیاں راجی گل مھکم بہ بہ اَنت ءُ پہ جھد ءِ سوبداری ءَ وتی کرد ءَ پیلو کن اِت۔ بنشون: پنتاک | اکس: بی این ایم