ریڈیو زْرمبش بلوچی | ریڈیو زْرمبش بلوچی

زورانسری بیگواهی ءُ جونانی دوردیگ زورگپتیں بلوچستان ءِ جیڑھانی تہ ءَ مستریں جیڑه انت - بی این ایم برلن مراگش

زورانسری بیگواهی ءُ جونانی دوردیگ زورگپتیں بلوچستان ءِ جیڑھانی تہ ءَ مستریں جیڑه انت - بی این ایم برلن مراگش

SEP

18
18 / 09 / 2022 بی این ایم 150

برلن: شمبے ءِ روچ 17 ستمبر ءَ بلوچ راجی زرمبشت (بی این ایم) ءِ چیر دستی ءَ ماں برلن ءَ یک روچی مراگشے برجم دارگ بیتگ۔ مراگش دو بھر ءِ تہ ءَ بیتگ، اولی بهر ءِ تہ ءَ بلوچستان ءُ دمگ ءِ ایردستیں راجانی بُنگپ ءِ سر ءَ سندی زانتکار ءُ " ورلڈ سندی کانگریس " ءِ کارگشاد ڈاکٹر لکو لوھانہ، ورلڈ اویگور کانگریس ءِ سرکماش دولکون ایسا، کرد سیاسی راهشون ماکو کوگیری ءُ بلوچ راجی زرمبشت (بی این ایم) ءِ کستریں کمک کار گشاد هسن دوست ءَ تران کُرتگ۔ بلوچستان ءِ جاورهالانی بارہ ءَ بی این ایم ءِ بنجاھی پتر ءِ باسک پهیم ءَ بنداتی تران " پریزنٹیشن " درشانتگ ءُ بی این ایم جرمنی " چیپٹر " ءِ کمک سر کماش سمل بلوچ ءَ مراگش ءِ جارچینی ءِ ڈبہ گون بیتگ. ڈاکٹر لکو لوھانہ ءَ گْوشتگ کہ پاکستان ءِ تہ ءَ لشکر ءَ ابید دگہ هچ وڑیں ادارهاں بستار نیست، پاکستان ءِ ریاست ءَ سندی، بلوچ ءُ سرائیکیانی مڈی پُل اِتگ ءُ نزور کُرتگ انت۔ موسمی بدلی ءُ هارانی پد ءَ وت ءَ بے میار کنگ ءَ اَنت بلے سند ءِ تہ ءَ مردم چہ شُد ءُ نادراهیاں مِرگ ءَ اَنت ءُ اے پدّریں چُکچینی یے. آئی ءَ گْوشتگ کہ پاکستان ءِ ریاست ءَ بلوچ، سندی ءُ سرائیکیانی پروا نیست بلکیں آیانی تباہ کنوک ریاست ءِ جند اِنت۔ اود ءَ مردماناں زورانسری بیگواه کنگ ءَ اَنت ءُ اے وهد ءَ درستاں گیش بلوچ بیگواه اَنت هزارانی کچ ءَ بلوچ پاکستان ءِ ریاست ءَ زورانسری بیگواه کُرتگ اَنت۔ ورلڈ اویگور کانگریس ءِ سرکماش دولکون ایسا ءَ گْوشتگ کہ ما مسلمان ایں بلے چین ءِ تہ ءَ مار ءَ مزهبی روچانی دارگ ءِ هچ وڑ ءَ رزا دیگ نہ بیت۔ اود ءِ مسلمان وت ماں وت ءَ یکے دومیگ ءَ دْروت ءُ دْرھبات کُرت نہ کن انت۔ آ وتی چُکانی ناماں اسلامی نام مهمد، اهمد ءُ دگہ همے وڑیں نام بست نہ کن انت۔ اگاں کسے ءِ اُمبر شست 60 اِنت ءُ آئی ءَ اسلامی نامے پِر اِنت تہ آ ھم لاچار کنگ بیتگ کہ وتی نام ءَ سر بہ چنت ءُ دگہ نامے وت ءَ پِر بہ کنت۔لکانی هساب ءَ چُک چہ وتی مات ءُ پتاں دور کنگ بیتگ اَنت دانکہ آ وتی پجار ءَ بے ھیال بہ کن اَنت۔ چہ نوزده سد ءُ چل ءُ نوہ ءَ 1949 ءَ بگر داں انیگ ءَ لکانی کچ ءَ مردم چینی لشکر ءَ کُشتگ ءُ زالبول بدکاری ءِ نشانگ کُرتگ اَنت۔ آئی ءَ گْوشتگ کہ سی پیک دگ ءِ رِد ءَ هما وڑ ءَ کہ پاکستان بلوچانی سر ءَ زوراکی کنگ ءُ آیانی مڈیاں پُلگ ءَ اِنت همے وڑ ءَ چین اویگور ءِ زمین ءُ مڈیاں زور برگ ءُ پُلگ ءَ اِنت۔ اویگور مسلمانانی سر ءَ بیوکیں زوراکیانی سر ءَ پاکستان، ایران، اوگانستان ءُ دگہ مسلمانیں ملک پمشکا بے توار اَنت کہ آیاں وتی زر ءُ مالانی پگر اِنت، اے ڈیھ مردمانی هچ وڑ ءَ پروا ءَ نہ کن اَنت۔ کرد سیاسی راهشون ءُ جرمنی ءِ تہ ءَ سیوکا آزات نامیں کُرد گلے ءِ جارکش ماکو کوگیری ءَ کُرد راج ءِ سے ریاستانی میان ءَ بهر ءُ بانگ ءِ سوب ءَ کُرد راج ءِ تہ ءَ بیوکیں جیڑهانی سر ءَ تران کُرتگ۔ اے بارہ ءَ بلوچ راجی زرمبشت (بی این ایم) ءِ کستریں کمک کار گشاد هسن دوست ءَ گْوشتگ کہ بلوچستان پاکستان نوزده سد ءُ چل ءُ هشت (1948) ءَ زور گرگ بیتگ ءُ داں انیگ ءَ لکانی هساب ءَ مردم کشگ ءُ زورانسری بیگواه کنگ بیتگ اَنت۔بلوچستان ءِ تہ ءَ وت کُشی ءِ جیرہ روچ پہ روچ گیش بوھان اِنت۔ زورانسری بیگواهی ءِ آماچیں مردماں وت کشی کُرتگ۔ اشی ءِ سوب آزارجاهانی تہ ءَ گوں آیاں بیتگیں کارپد اَنت۔ اود ءَ گوں آیاں انچیں کارپد کنگ بیتگ کہ آجو بیگ ءَ پد آیاں ھمے لیک اِتگ کہ نوں مارا وتی چاگرد ءِ تہ ءَ نندگ ءِ بستار نیست. آئی ءَ گْوشتگ کہ دگنیا ءِ تہ ءَ چہ ایمنیں سیاسی جهد ءَ هم راجاں وتی آجوئی گپتگ بلے پاکستان راجمستری ملکے نہ اِنت بس زوراکی ءِ زبان ءَ سرپد بیت۔ پاکستان ءَ سندی، بلوچ ءُ پٹان ءِ سرڈگار ءُ مڈی وتی دست ءَ کُرتگ اَنت ءُ آیانی سر ءَ زوراکی کنگ ءَ اِنت، مئے جهد همے زوراکیانی بگیری ءَ اِنت۔ شولکش ءُ بے مزیں جهدے ءَ پد ما اے آسر ءَ سر بیتگ ایں کہ سر ءَ مُشتگیں پاکستان ءِ پارلیمانی بند ءُ بست ءِ رد ءَ سیاست کنگ ءَ ما آجو بوت نہ کن ایں، پمشکا ما بید ءِ پارلیمانی سیاست ءَ دَر وتی آجوئی ءِ زرمبشتے جوڑ کرتگ. مراگش ءِ دومی بھر ءَ ماں بلوچستان ءَ گیش بیتگیں زورانسری بیگواهیانی ءُ میان استمانی ڈیھانی زمہ واریانی بنگپ ءِ سر ءَ هیال درانگاز کنگ بیتگ اَنت۔ دومی بھر ءِ تہ ءَ نامی ئیں اسکالر آشا سیدیکا، بلوچ راجی زرمبشت (بی این ایم) ءِ سرکماش ڈاکٹر نسیم، گوستانک نبیس ڈاکٹر نسیر دشتی ءُ بلوچ ھیومین رائٹس کونسل ءِ سرکماش بی بی گل ءَ تران کُرتگ۔ ڈاکٹر نسیم ءَ گْوشتگ کہ پاکستان ءِ زیر دستیں بلوچستان ءَ بلوچانی جیڑهانی تہ ءَ زورانسری بیگواهی ءُ کُشگ ءُ جونانی درودیگ ءِ ریاستی کارراهبند چہ درستاں مستریں جیڑه اِنت۔ آئی ءَ گْوشتگ کہ انیگاں ماں شال ءَ زورانسری بیگواهیں مردمانی کهولاں زهرشانی نندانک ءِ تہ ءَ زورانسری بیگواهیں مردمانی زالبولیں سیاد، آیانی جنین زھگ ءُ مات ءُ گوهاراں یک دستے ءَ وتی زهگ ءُ دومی دست ءَ " مائک " گپتگ ءُ پہ وتی آزیزانی آجوئی ءَ پریات ءُ زاری کُرتگ اَت، ماں زهرشانی ءَ نندوکیں زورانسری بیگواهیں مردمانی سیاد چہ دهکاں زورانسری بیگواه اَنت، همے سال ءِ جولائی ءِ ماه ءَ پاکستانی لشکر ءَ دروگیں میڑے ءَ یازده زندانی ئیں زورانسری بیگواهیں مردم کُشتگ ءُ آهانی جون دور داتگ اَنت۔ دروگیں میڑاں بلوچستان ءِ جهمنندانی کُشگ ءِ دْرچ بلوچستان ءِ تہ ءَ نوکیں گپے نہ انت 1970 ءَ میتگانی میتگ ماندارگ بوتگ انت ءُ یکیں روچ ءِ تہ ءَ هزاراں مردم کُشگ بوتگ، اے یکشلی ءَ برجاهیں چکچینی یے، بلوچانی چکچینی ءِ روتگ پاکستان ءِ جوڑ بیگ ءِ وهد ءُ پاساں بندات بوتگ اَنت، پاکستان ءِ ریاست مارا چہ مئے دودمان، زبان ءُ مئے پجار ءَ زبهر کنگ لوٹ ایت. آئی ءَ گْوشتگ کہ پاکستان ءِ رسانکدر ءُ دگہ اداره بلوچستان ءَ بلوچ راج ءِ چُکچینی ءَ یک وڑ ءَ شریدار اَنت۔ بی این ایم ءِ سرکماش ءَ گْوشتگ کہ پاکستان بلوچستان، گلگت بلتستان، سند ءُ پٹانی سر ءَ زوراکی کنگ ءَ اِنت، مروچی آئی ءَ چین ءِ دروشم ءَ شریدارے دست کپتگ کہ آ لُٹ پُل ءُ زوراکی کنگ ءَ سک بلد اِنت۔ چین ماں بلوچستان ءَ بلوچ چُکچینی ءَ گوں پاکستان ءَ ھوار اِنت پرچاکہ آئی ءِ مول ءُ مراد گلگت بلتستان، سند ءُ بلوچستان ءِ مڈیانی لُٹ ءُ پُل کنگ اِنت۔ آئی ءَ گْوشتگ کہ چہ تبت ءَ بگر داں رودراتکی ترکمنستان ءُ هانگ کانگ ءَ پدءَ داں تائیوان ءَ بیا چین ءِ لُٹ ءُ پل ءُ پدریچ کُشی ءِ یک مزنیں داستانے هست. چین یک انچیں ڈیھے کہ آئی ءِ نِزّ ءَ آئی ءِ وتی ڈیھ ءِ مردم ءُ مردمانی اگبالاں ارزشت نیست۔ بیست لک ءَ گیش اویگور مسلمان آئی ءِ " کنسٹریشن کمیپ " ءِ تہ ءَ آزار سگگ ءَ اَنت ءُ آیانی هم چو بلوچانی وڑ ءَ چکچینی کنگ بیگ ءَ اِنت۔ آئی ءَ گْوشتگ کہ مئے راجی جهد چہ پاکستان ءِ زورگری ءَ وتی آجوئی ءَ لوٹگ ءَ اِنت۔ مارا ستک اِنت کہ مئے جهد پہ دمگ ءِ ایردستیں راجاں یک سانمندیں زرمبشتے، پہ ایشی ءَ نہ کہ ماں دگنیا ءِ تہ ءَ ناشرکاری ءِ بنجل پاکستان ءِ بگیری ءَ جنگ ءَ ایں بلکیں گوں اشی ءَ هوار " تھزیبی تنو " راجی دست رس ءُ نزوریں راجانی پدریچی اگبالاں هم جنگ کنگ ءَ ایں۔ بی این ایم ءِ سرکماش ڈاکٹر نسیم ءَ گْوشتگ کہ ما تچکی ءَ گوں پاکستان ءَ هواریں چین ءَ دیم پہ دیم ایں ءُ ماں گوادر ءَ آئی ءِ ساڑی بیگ ءِ بگیری ءَ جنگ ءَ ایں۔ مئے سوبمندی دُرسیں ایردستیں راجانی سوبمندی بیت کہ چین ءِ لُٹ پُلی شوربندیانی آماچ اَنت۔ مئے مڈیانی لُٹ ءُ پُل ءِ هواری ءَ چین ءِ آبنا ءِ ھرمز ءَ ساڑی بیگ دمگ ءُ دگنیا ءِ لشکری ءُ زَری سیتّاں سانمند کن اَنت۔ آئی ءَ دیوان ءِ نندوکانی جستے ءِ پسو ءَ گْوشتگ کہ بی این ایم کلیں بلوچ سیاسی گلانی هواری ءَ کار کنگ لوٹ ایت۔ ما ماں اے مراگش ءِ هوار بیگ ءَ ایپ بی ایم ءُ بی آر پی ءِ بنجائی راهشوناں لوٹکی نمدی دیم داتگ ءُ ما دیمتر ءَ هم هوری ءَ کار کنگ ءُ یکمشت بیگ ءِ جهد ءَ برجاه دار ایں۔ آئی ءَ گْوشتگ کہ آئی ءَ اے دگہ بلوچ دوستیں گلاں گوں نزیکی هست ءُ رهوت کنگ ءَ اِنت۔ نامداریں نبشتہ کار ڈاکٹر آشا سدیکا ءَ گْوشتگ کہ مارا زورانسری بیگواهی ءِ توسیپ پراه ءُ شاهگان کنگ ءُ آئی ءِ سوب ءُ مول ءُ مراد شوهازگی اِنت ءُ اشی ءِ جتا جتائیں دروشم پجارگی اَنت۔ پاکستان ءِ ریاستی مردم پہ مردمانی بے توار کنگ ءَ آیاں زورانسری بیگواہ کنگ ءَ اَنت۔ مار ءَ هوار بیگی اِنت ءُ زورانسری بیگواهیانی کلیں دروشمانی بگیری ءَ توار چست کنگی اِنت۔ آئی ءَ گْوشتگ کہ چہ آمیدگس ءَ زمانت زورگ ءَ ابید الی وزیر زندان ءَ اِنت۔ اے واک ءِ شزاواریں کارمردی یے زانگ بیت، مردمانی اے هک اِنت کہ آ وتی زند ءُ پہ وتی سرڈگار ءَ شوربندی بکن انت ءُ ریاست ءَ اگبال نیست کہ آیاں داشت بہ کنت۔ آشا سدیکا ءَ گْوشتگ کہ بلوچاں پاکستان ءِ بند ءُ بست ءِ تہ ءِ اے دگہ راجاں گوں همگرنچ بوگ ءُ آهاناں وتی زرمبشت ءُ وتی جیڑهانی سرپدی دیگ لوٹ ایت۔ بلوچ ماں یک کوٹی ءِ تہ ءَ نندگ ءَ وتی مول ءُ مراداں گرگ ءَ سوبمند بوت نہ کنت۔آهاں اے دگہ لکانی هساب ءَ مردماں گوں ھوار بوھگ لوٹ ایت ءُ آهانی کمک زیرگی اِنت۔ رسانکدر ءِ بندی ءِ سوب ءَ مردم سرپد نہ اَنت کہ پاکستان بلوچستان ءَ چونیں زوراکی کنگ ءَ اِنت۔ آئی ءَ گْوشتگ کہ ورنانیں پدریچ ءِ انچیں هزاراں مردم اَنت کہ آهاں بلوچانی بارہ ءَ هچ سرپدی نیست۔ گوستانک نویس ڈاکٹر نسیر دشتی ءَ گْوشتگ کہ پاکستان آوکیں یک ءُ دو سالانی تہ ءَ کُٹ ایت آئی ءِ پُرشت ءُ پروش ءِ تہ ءَ ترندی کیت۔ نی دگنیا ءِ اے دگہ ڈیھ آئی ءَ گیشیں مالی کمک نہ کن انت۔ پاکستان ءِ پُرشگ یک راستی یے کہ اشی ءَ کس ٹگلینت نہ کنت بلے مارا اے چارگی اِنت کہ اراں پاکستان ءِ پُرشگ ءَ پد ما آجو بہ ایں یا گوست ءِ وڑ ءَ انگت هم مئے بهت ءَ وشی نہ ایت۔ آئی ءَ گْوشتگ کہ اے جاورانی تہ ءَ بلوچ راهشون ءُ سیاسی مردمانی کرد سک باز ارزشت دار ایت، اگاں اد ءَ هم ما وتی کماشانی وڑ ءَ ردی کُرت کہ آ اے سرپد بیتگ ات انت کہ برتانیا پہ پاکستان ءِ جنگ ءَ اشاں سلاه دنت وهدے کہ راستی اش اَت کہ پاکستان ءَ برتانیا ءِ سکین ءِ پد ءَ بلوچستان دستیگ کرتگ اَت۔ وتیگانی هما ردی دو وار کنگ بہ بنت تہ اے جاورانی تہ ءَ هم ما چہ آجوئی ءَ زبهر بوت کن ایں۔ آئی ءَ گْوشتگ کہ مسلم لیگ انگریز سرکار ءِ سروگاناں جوڑ کُرتگ ات ءُ اے گوستانک ءِ تہ ءِ اجبیں ڈیھے کہ اشی ءِ آجوئی ءِ جنگ ءَ کسے ءِ پونزے هم نہ بُتکگ۔ دومی جھانی جنگ ءَ پد دگنیا ءِ جاور مٹ بیتگ ات اَنت، زورگریں واک وتی زوگپتگیناں یلو کنگ ءَ لاچار بوت اَنت اد ءِ درستان مستریں زورگریں واک برتانیا اَت کہ آئی ءَ وتی زورگپتگیں ڈیھ انچیں وڑے ءَ آجو کُرت اَنت کہ داں روچ ء مروچ نہ سُدُّر اتگ اَنت۔ ڈاکٹر نسیر ءَ گْوشتگ سویت یونین ءِ جھانی واکے بوگ مزن هور ءِ تیل ءِ دزکپگ ءُ چین کمیونسٹ واکانی توانگر بوگ ءِ تُرس ءَ برتانیا ءَگوں بلوچستان ءَ کُرتگیں مسام ءِ بگیری کُرتگ ءُ بلوچستان ءِ آجوئی پُل اتگ ءُ پاکستان ءِ دست ءَ داتگ۔ دومی بهر ءَ بلوچستان ءِ مردمی اگبالانی کمیشن ءِ سر کماش بی بی گل ھم دامگی ھوار بیتگ، بلے تکنیکی هرابیانی سوب ءَ وتی گشتانک ئےِ سرجم کُرت نہ کُرتگ۔ آئی ءَ درملک ءَ جهمنندیں بلوچ کڈن کُرتگ انت کہ ماں بلوچستان ءَ مردمی اگبالانی لپاشگ ءِ پد ءَ وتی سرجمیں دلگوش ءَ گور بکن اَنت ءُ جهانی ادارهاں چہ بلوچستان ءِ جاوراں هر مدام سرپدی بدئے اَنت۔ بی این ایم برلن مراگش ماں چاگردی رسانکدر ءَ ھم تچک ءَ پیشدارگ بوتگ. بنشون: بی این ایم | اکس: بی این ایم