ریڈیو زْرمبش بلوچی | ریڈیو زْرمبش بلوچی

چہ پاکستانی لشکر ءِ زوراکیاں مردم شزار اَنت ءُ وتکشی کنگ ءَ اَنت- بی این ایم

چہ پاکستانی لشکر ءِ زوراکیاں مردم شزار اَنت ءُ وتکشی کنگ ءَ اَنت- بی این ایم

NOV

06

شال : بلوچ راجی زْرمبشت( بی این ایم) ءِ جارکش ءَ وتی درشانے ءَ گْوشتگ کہ پاکستانی لشکر ءِ زوراکی ءِ پد ءَ بلوچستان ءَ مردم پہ وتکشی کنگ ءَ لاچار اَنت۔ھاران ءَ اجاب یلانزھی ءِ برات لتیپ اللہ یلانزھی ءُ آئی ءِ لوگبانک ءَ ریاست ءِ زوراکی ءِ آسر ءَ وتکشی کرتگ۔اے وتکشی ءِ ویلے نہ اِنت بلکیں کوشے۔ بلوچستان ءَ پاکستانی لشکر مردماں پہ وتکشی وڑیں تانسریں گامگیج ءِ زورگ ءَ لاچار کنگ ءَ اِنت۔اے سال ءَ داں انوں چار مردم ءَ لشکری زوراکیانی آسر ءَ وتکشی کرتگ۔ آئی ءَ گْوشتگ 23 اکتوبر ءَ سی ٹی ڈی ءِ دست ءَ اجاب یلانزھی ءِ زوریں بیگواھی ءُ آئی ءِ ناکو شپکت یلانزھی ءِ ریٹائر جسٹس مسکان نور زھی ءِ کوش ءِ دروگیں بُھتام ءَ دزگیری ءَ ابید پاکستانی لشکر مدام اجاب یلانزھی ءِ گس ءَ بیڑ برگ ءَ بیتگ۔چادر ءُ چار دیوالیانی پادمال کنگ ءِ ھواری ءَ گس ءِ مردم جانی ءُ زھنی زوراکی ءِ نشانگ کُرتگ اَنت۔ چہ ایشی ءَ دلسیاہ بیگ ءِ سْوب ءَ ورنائیں لتیپ اللہ یلانزھی ءِ لوگبانُک ءَ وتکُشی کُرت ءُ آئی ءِ گمیگیں لوگواجہ ءَ ھم وتی زندگی آسر کُرت۔ بی این ایم ءِ جارکش ءَ گْوشتگ کہ ایشی ءَ پیش کیچ ءِ میتگ سرنکن ءَ چاکر مجید ءَ پاکستانی لشکر ءِ زور دیگ ءِ آسر ءَ وتکشی ءِ راہ گچین کرتگ اَت۔ آئی ءَ گْوشتگ کہ سَے سال ءَ پیش 2019 سال ءِ مارچ ءِ ماہ ءَ پاکستانی لشکر ءَ سرنکن ءَ بیڑ برتگ ءُ چاکر دزگیر کرتگ، داں دہ ماہ ءَ پہ زور بیگواہ کرتگ ءُ بازیں زھنی ءُ جانی آزار دیگ ءَ پد یل کرتگ۔ یل کنگ ءَ پد ھم لشکر ءَ آ پہ ایمنی نندگ ءَ نہ اشتگ بلکیں پاکستانی لشکر ءَ چاکرمجید مدام وتی بنجل ءَ لوٹائینتگ ءُ آ زور داتگ کہ بلوچ جھدکارانی بگیری ءَ پہ پاکستانی لشکر ءَ چاریگی بہ کنت۔ بلے چاکر ءَ پہ لشکر ءَ کار کنگ ءِ جاہ ءَ وتکشی ءِ راہ گچینتگ۔ جارکش ءَ گْوشتگ کہ چاکر مجید ءَ وت ءَ ھما وھد ءَ کشتگ وھدے کہ آ بنجل ءَ لوٹائینگ ءُ آئی ءِ موبائل پچ گرگ ءُ چہ وتی نیمگ ءَ دگہ موبائلے گوں سم ءُ دگہ چاریگی ڈیوائسے دیگ بیتگ داںکہ آئی ءِ سر ءُ پرانی سر ءَ نگاہ ایر کنگ بہ بیت بلے آئی ءَ پہ لشکر ءَ چاریگی کنگ ءِ جاہ ءَ پہ وت ءَ دلپدردی ئیں مرگ دوست کرت۔ ’ 30 اگست 2022 ( ھمے سال) ءَ مھیم ء آسمی ءَ ھم وتکشی کرتگ کہ آ مارچ 2014 ءَ پاکستانی لشکر ءَ پہ زور بیگواھی ءِ نشانگ کرتگ اَت۔چہ زوراکی ءُ بازیں آزاراں آ زھنی ءُ جانی تک ءَ سک نادْراہ بیتگ اَت ءُ گڈی ءَ چہ وتی زند ءَ دلپروش بوت۔آزارجاھاں پاکستانی لشکر گوں بندیگاں ھما کردگار کن اَنت کہ پد ءَ زور بیگواھی ءُ آزار دیستگیں مردماں دْراھیں مردم بیگ ءَ سال پکار بیت ءُ بازیں مردم گھتریں آسراتی ءُ درمان نہ بیگ ءِپد ءَ وتی سرجمیں زندگی ءَ چہ اے درد ءُ مارشتاں دراتک نہ کن اَنت ءُ آیاں پہ وتی تاھیر ءُ ایمنی ءَ ایوک ءَ وتکشی ءِ راہ گندگ بیت۔‘ آئی ءَ گْوشتگ کہ بلوچستان ءَ وتکشی ءِ میل ترسناکیں کچے ءَ گیش بیتگ ءُ چاگردی جیڑھے ءِ دْروشم ءَ دیم ءَ اتکگ۔بلوچستان پولیس ءِ رد ءَ گْوستگیں سال ءَ ھشتاد مردم ءَ وتکشی کرتگ ءُ اے سال ءَ رسانکدر ءِ یاداشت ءِ رد ءَ داں انوں 14 مردم ءَ وتکشی کرتگ کہ درسی وتکشی کنوکانی چارکے بیت۔در سرکاری کچ ءُ کساس ءِ رد ءَ اے سال ءَ بلوچستان ءَ 56 مردم ءَ وتکشی کرتگ ءُ دُرساں گیش وتکشی ءِ ویل مکران ءَ کیچ دمگ ءَ بیتگ اَنت۔زانوگرانی گْوشگ اِنت کہ بلوچستان ءِ جاور ، پاکستانی لشکر ءِ زوراکی ءُ بلوچستان ءَ پاکستانی لشکر ءِ وتگڑیں سرکار ءِ ماں چاگردی جیڑھانی سر ءَ نادلگوشی ءَ مردم دلپروش کرتگ اَنت چہ ایشی ءَ وتکُشی گیش بیان اَنت۔وتکشی کنوک گیشتر ورنا اَنت ءُ جنین ھم بازیں کچے ءَ وتکشی کنگ ءَ اَنت۔ بنشون: درشان | اکس: بی این ایم