ریڈیو زْرمبش بلوچی | ریڈیو زْرمبش بلوچی

بولان لشکر کشی ءَ مزنیں کچے ءَ مردین ، جنین ءُ چک زور بیگواہ کنگ بیتگ-جارکش بی این ایم

بولان لشکر کشی ءَ مزنیں کچے ءَ مردین ، جنین ءُ چک زور بیگواہ کنگ بیتگ-جارکش بی این ایم

NOV

04

شال : بلوچ راجی زْرمبشت۔ بی این ایم ءِ جارکش ءَ بولان ءِ جتائیں دمگاں برجاھیں لشکر کشی ایر جتگ ءُ گْوشتگ کہ پاکستان بلوچ ءِ چکچینی ءَ نوکیں رنگے ءَ گیش کنگ ءَ اِنت۔ سال ءِ دوازدھیں ماہ ءَ بلوچستان ءِ چاریں پھناتاں لشکر کشی برجاہ اِنت۔اے لشکرکشی ءَ مردمی اگبال لپاشگ بیگ ءَ اَنت۔ بولان ءِ انگیں لشکرکشی ءَ مزنیں کچے ءَ مردین، جنین ءُ چک دزگیر کنگ ءُ زور بیگواہ کنگ بیتگ اَنت۔ایشانی تہ ءَ زرگل مری ، ھنیفہ مری، در ھاتون مری، ماھسو سمالانی، گل بی بی سمالانی ، سمو سمالانی ، زربھت سمالانی ، بانی سمالانی ، سمیدہ سمالانی ، پریدہ سمالانی ، راجی سمالانی ءُ چہ گْوستگیں چار سال ءَ بیگواھیں رکیا سمالانی ءِ لوگبانک مھنا سمالانی ءُ آیانی زھگ کلیم سمالانی ھوار اَنت۔ ’ اے لشکر کشی ءِ میان ءَ 4 نومبر ءَ چہ سنگان ءِ نزیک ءَ سپاری ءِ ھند ءَ ’ مھمد گوس مری ‘ ءِ ژانگولیں کنٹ دست کپتگ کہ گْوستگیں سال (2021) ءِ ستمبر ءَ پاکستانی لشکر ءَ دزگیر کنگ ءَ پد زور بیگواہ کرتگ اَت۔‘ آئی ءَ گْوشتگ بولان لشکرکشی بلوچ راج ءِ بگیری ءَ برجاھیں چاگردی ڈنڈ ءِ بھر اِنت۔ پاکستانی لشکر ءَ بلوچ گلزمین نازی وڑیں کنسنٹریشن کیمپ جوڑ کرتگ ءُ دیناداسی جنگی راھبنداں لپاشگ ءَ اِنت۔یکشل ءَ برجاھیں لشکرکشیاں جنین ءُ چک چاگردی ڈنڈ ءِ رد ءَ زوراکی ءِ نشانگ کنگ بیگ ءَ اَنت۔ بولان لشکرکشی ءَ پیش پنجگور ءِ ھند گچک ھم پاکستانی لشکر ءَ سرجم ءَ کنسنٹریشن کیمپ جوڑ کرتگ۔ آ اود ءَ مردم پابند اَنت کہ وتی ھمروچیگیں تر ءُ گرد ءِ موکل ءَ ھم چہ پاکستانی لشکر ءَ موکل بہ گر اَنت۔ گچک ءِ جاھمنندانی سر ءَ گیشیں وراک ءُ وردن ءِ بھا ءَ زیرگ ءَ ھم پابندی اِنت ءُ آ چہ بستگیں کچے ءَ گیشتر وراک بھا زرت نہ کن اَنت۔ جارکش ءَ گْوشتگ چاگردی ڈنڈ بلوچ جھدکارانی بگیری ءَ پاکستان ءِ بے سوبی ءُ سربتگے ءَ پدر کنت۔ پاکستانی لشکر وھدے کہ سنگر ءَ پروش وارت گڑا وتی بیر ءِ گرگ ءَ دیم ءَ گوں دزگوشیں مردماں ترین ایت ءُ آیاں چاگردی ڈنڈ ءِ نشانگ کنت۔ بنشون: درشان | اکس: دامگ