ریڈیو زْرمبش بلوچی | ریڈیو زْرمبش بلوچی

جرمنی ءُ نیدرلینڈ ءَ پاکستانی زوراکی ءِ بگیری ءَ زھرشانی کُرتگ۔ بی این ایم

جرمنی ءُ نیدرلینڈ ءَ پاکستانی زوراکی ءِ بگیری ءَ زھرشانی کُرتگ۔ بی این ایم

OCT

24
24 / 10 / 2021 بی این ایم 80

بلوچ راجی زْرمبشت (بی این ایم )ءِ بنجاھی جارکش ءَ وتی شنگ کُرتگیں درشانی ءَ میان استمان ءَ برجاھیں گل ءِ سرپدی تُکشام ءِ رد ءَ شمبے ءِ روچ ءَ جرمنی ءِ شھربیلپیڈ ءُ نیدرلینڈ ءِ بنجاھی شھر ایمسٹرڈم ءَ بلوچ چکچینی ءُ پاکستانی استان ءِ دگہ زوراکیانی بگیری ءَ زھرشانی کنگ بیتگ۔زھرشانی کنوکانی دست ءَ پلے کارڈ، بینر ءُ زورانسری بیگواھی ءِ آماچیں مردمانی اکس چیست کُرتگ ءُ پاکستانی زوراکی ءِ بگیری ءَ اوگام جتگ۔ بی این ایم ءِ چیردستی ءَ برجم کُرتگیں زھرشانی ءَ گْوستگیں ھپتگ ءَ بلوچستان ءِ دمگ کیچ ءِ ھند ھوشاپ تُربت ءَ پاکستانی لشکر ءِ دست ءَ شھید بیتگیں زھگ اللہ بکش ءُ شراتون ءِ کوش، بلوچستان ءِ دمگ واشک ٹوبہ ءَ زورانسری بیگواھی ءِ آماچیں دہ سالی زھگ سنم جمیل ءُ شش سالی گزین جمیل ءِ بیگواھی ءُ بلوچستان ءَ برجاھیں پاکستانی استان ءِ زوراکی ءِ بگیری ءَ مردم سرپدی داتگ اَنت۔ بی این ایم ءِ چیردستی ءَ برجم داشتگیں زھرشانی ءَ جرمن ایکٹوسٹس رفال ءُ دگراں بھر زُرتگ ءُ ھمدردی درشان کُرتگ ءُ بلوچستان ءَ پاکستانی زوراکی ءُ بلوچ چکچینی کنگ ایرجتگ۔ زھرشانی ءَ بی این ایم جرمنی ھنکین ءِ پیشگیں کمک کارگشاد ندیم سلیم ءَ تران کُرتگ ءُ گْوشتگ کہ پاکستن بلوچ راج ءِ چکچینی ءَ کنگ ءَ اِنت ءُ سول بیوروکریسی پاکستانی لشکر ءِ جنگی میار باری ءِ چیر دیگ ءِ جُھد ءَ کنگ ءَ اِنت۔انیگیں وئیل ءَ کیچ ءِ کمک دمگدار ءَ تاج بی بی ءِ کوش ءِ نشان ھلاس کُرتگ اَنت۔ھمے وڑ ءَ ھوشاپ وئیل ءَ یکبرے پد ءَ کیچ ءِ کمک دمگدار ءَ پاکستانی لشکر ءِ میار باری ءِ چیر دیگ ءِ جُھد کُرتگ۔ آئی گْوشتگ کہ پاکستان بلوچ راجی پگر ءِ لپاشگ ءَ روچے گوں یک نوکیں تْرامے ءَ زوراکی نوک نوکیں گْوستانک نبشتہ کنگ ءَ اِنت۔ھوشاپ ءَ نہ ایوک ءَ زھگ کُشگ بوت اَنت بلکیں کھول ءِ پہ زھرشانی ءِ دارگ ءَ دگہ باز پندانی ھواری ءَ شھیدیں زھگانی پہ زور کل کنگ ءِ جُھد کنگ بیتگ۔ بی این ایم ءِ بنزہ کارگشاد جبار ءَ گْوشتگ کہ پاکستان یک ناشرکاریں استانے۔جھان ءَ کجا کہ ناشرکاری وئیلے بیت ایشی ءِ کجا نہ کجا پاکستان ءُ پاکستانی ناشرکاریں لشکر ءُ آئی ءِ چیریں تْرامگیج آئی ایس آئی ءِ دست الم مان اِنت۔پمشکا ما چہ جھان ءِ دُرسیں ڈیھاں دزبندی کن ایں کہ آ پاکستان ءِ مالی کمک ءَ بند بہ کن اَنت چے ءَ کہ چہ ھمے مالی کمکاں آ نہ ایوک ءَ بلوچستان ءِ بلکیں سرجمیں جھان ءَ ناشرکاری ءَ تالان کنگ ءَ اِنت۔ بی این ایم ءِ باسک بدل ءَ گْوشتگ کہ بلوچستان ءَ پاکستان ءِ نیمگ ءَ بلوچانی چکچینی برجاہ اِنت۔اے چکچینی ءَ نہ پیریں پھریز اَنت ءُ نہ زھگ ءُ جنین۔ پاکستانی زوراکی یکشلہ گیش بیان اَنت۔اے مئے زمہ واری اِنت کہ ما جھان ءِ دیم ءَ بلوچستان ءِ سر برجاھیں مردمی اگبالانی لپاشگ ءَ پدر بہ کن ایں۔ زھرشانی ءَ بی این ایم جرمنی ھنکین ءِ باسک شار ھسن، ماجد،ابدل ھمید ءُ آدگہ ترانکاراں تران کُرتگ ءُ گْوشتگ کہ پاکستان ءَ بلوچستان یک لشکری بنجلے جوڑ کُرتگ۔جھان ءَ ھژدری اِنت کہ آ پاکستانی زوراکی ءِ آماچین بلوچانی کوش ءَ دلگوش گْور بہ کنت۔ زھرشانی کنوکاں پہ ھندی مردماں جرمن ءُ انگلش زبان ءَ یک پنتاکے بھر کُرتگ۔کہ آئی تہ ءَ ھوشاپ ءُ واشک وئیل ءَ زھگانی کوش ءُ بیگواہ کنگ ءِ ھواری ءَ سی ٹی ڈی ءِ دست ءَ زورانسری بیگواھی ءِ آماچیں مردمانی کلپیں میڑ ءَ کشگ ءُ استان ءِ زوراکی ءِ بابت ءَ سرجم ءَ نبشتہ کنگ بیتگ۔ بی این ایم نیدرلینڈ ھنکین ءِ نیمگ ءَ بلوچ چکچینی، وا شک ءَ زھگانی بیگواہ کنگ ءُ ھوشاپ ءَ زھگانی شھید کنگ ءِ بگیری ءَ زھرشانی کُرتگ۔زھرشانی نیدرلینڈ ءِ بنجاھی شھر ایمسٹرڈم ءِ ڈام اسکور ءَ کنگ بیتگ۔مردمانی مزنیں کچے ءَ بھر زُرتگ۔زھرشانی کنوکاں بینر، پلے کارڈ ءُ پاکستان ءِ پاکستان ءِ دست ءَ بیگواہ ءُ شھید کنگ بیتگیں زھگانی اکس دستاں بیتگ اَنت۔ زھرشانی کنوکاں بلوچستان ءَ مردمی اگبالانی لپاشگ ءُ پاکستانی زوراکی ءِ بگیری ءَ اوگام جتگ۔زھرشانی کنوکاں پہ ھندی مردمانی سرپدی دیگ ءَ پنتاک بھر کُرتگ۔بی این ایم نیدرلینڈ ھنکین ءِ باسک لتیپ ءَ پنتاک ونتگ۔ زھرشانی ءَ تران کنان ءَ بی این ایم نیدرلینڈ ھنکین ءِ سرکماش کیّا ءَ گْوشتگ کہ اے زوراکی ءِ داستان گْوستگیں ھپت دھکاں اِشکنگ ءَ ایں۔پاکستانی لشکر ءِ زوراکی روچ پہ روچ گیش بیان اَنت۔ پاکستان بلوچ راج ءِ چکچینی ءَ کنگ ءَ اِنت۔مرچی جھان بلوچ ءِ چکچینی ءَ بےتوار نشتگ ءُ ندارگ چارگ ءَ اِنت۔ پاکستان ءَ ھمے چکچینی بنگالیانی کُرتگ اَت۔ شاکر ءَ وتی ھیال ءُ لیکہ درشان کُرتگ اَنت ءُ گْوشتگ کہ پاکستانی لشکر مئے زھگ،جنین ءُ پیرین آں ھم نہ بکش ایت۔آیاں آوار جنگ ءُ بیگواہ کنگ بیگ ءَ اَنت۔پاکستانی زوراکی ءِ آماچیں بلوچ راج جھان ءِ نیمگ ءَ چارگ ءَ اِنت کہ آ مارا چہ اے جنجال ءِ رکینگ ءَ دیم ءَ کاینت۔ما اے جُست ءَ کنگ لوٹ ایں کہ بلوچ ءَ اے جھان ءَ زندگ بیگ ءِ اگبال نیست؟،بلوچ ءِ اگبال مردمی اگبال نہ اَنت؟۔ زھرشانی کنوکاں چہ میان استمان ءِ تْرامگیج ءُ مردمی اگبالانی گل،آجوئیں رسانکدر ءَ دزبندی کُرتگ ءُ گْوشتگ کہ زورگیپتیں بلوچستان ءَ پاکستانی لشکر ءِ دست ءَ برجاھیں بلوچ چکچینی ءَ دلگوش گْور بہ کن اِت۔ آیاں گْوشتگ کہ بلوچستان ءَ اے وھدی مردم ناگیگ ءُ جنجالانی دیمپان اَنت۔اگاں جھان اے زوراکیاں بےتوار بوت گڑا پاکستانی زوراکی کمی جاہ ءِ گیش بنت ءُ بلوچستان ءَ یک ماشجاھے ءِ جوڑ کنگ ھچ دل نہ جنت۔