ریڈیو زْرمبش بلوچی | ریڈیو زْرمبش بلوچی

اکتوبر ءِ ماہ ءَ 40 ءَ لشکر کشیاں41 مردم بیگواہ،31 مردم کُشگ ءُ بازیں گسے ماندارگ بیتگ-دلمراد

اکتوبر ءِ ماہ ءَ 40 ءَ لشکر کشیاں41 مردم بیگواہ،31 مردم کُشگ ءُ بازیں گسے ماندارگ بیتگ-دلمراد

NOV

14
14 / 11 / 2021 بی این ایم 74

شال: بلوچ راجی زْرمبشت (بی این ایم) ءِ بنجاھی رسانکدری کارگشاد دلمراد ءَ اکتوبر 2021 ءِ رپورٹ شنگ کُرتگ ءُ گْوشتگ کہ اکتوبر ءِ ماہ ءَ پاکستانی لشکر ءَ 40 ءَ گیش لشکرکشی ءُ بیڑاں 41 مردم دزگیر کنگ ءَ پد بیگواہ کُرتگ۔ 13 مردم لشکر ءَ،9 مردم سی ٹی ڈی ءَ،یک زھگے پولیس ءَ چار مردم پاکستانی لشکر ءِ چریکاں کُشتگ۔بلوچستان ءِ جتائیں دمگاں چار مردم ءِ لاش دزکپتگ کہ آیانی کوش ءِ سْوب زانگ نہ بیتگ۔ پاکستانی لشکر ءَ لشکرکشیانی میان بازیں گسے ءَ لُٹ ءُ پُل کرتگ ءُ مردم زوراکی ءِ نشانگ کُرتگ اَنت۔اے ماہ ءَ جتائیں دمگاں چہ پاکستانی لشکر ءِ آزارجاھاں 19 مردم آجو بیتگ۔ دلمراد ءَ گْوشتگ کہ پاکستان ءَ بلوچ سرڈگار یک کوشجاھے جوڑ کُرتگ۔ھمک روچ بلوچ چکچینی ءِ سر ءَ ھیلکاری بیگ ءَ اِنت۔آرمی،ایپ سی ءُ استان ءِ جوڑ کُرتگیں کشندہ ءِ ناشرکاریاں ابید یک وتگڑیں کاؤنٹر ٹیررازم ڈیپارٹمنٹ (سی ٹی ڈی) ءَ کلپیں میڑ ءِ نام ءَ مردمانی کُشگ ءِ زمہ واری دیگ بیتگ۔چہ اے پیمیں پندلاں پاکستانی استان وتی میارباریاں چیر دات نہ کنت۔ آئی گْوشتگ کہ بلوچستان ءَ پاکستان ءِ جنگی میارباری ھمک روچ گیش بیان اَنت۔چوشیں روچ نیست کہ پاکستانی لشکر ءُ چیریں تْرامگیج گوں بلوچ ءِ ھوناں گْوازی نہ کن اَنت۔اے نوکیں دور ءَ جھان ءَ ھون انچو ارزان نہ اِنت چوشکہ بلوچ ءِ گون ءَ بیگ ءَ اِنت۔ آئی گْوشتگ کہ پاکستان پہ کُشگ ءُ مُچی سزا دیگ ءَ بلوچ راج ءَ چہ وتی زْرمبشت ءَ دزکش کنگ ءِ جُھد کنگ ءَ اِنت بلے بلوچ راج ءَ گوں سما ءُ زانت ءُ دیمونیاں جُھد دیم ءَ بُرتگ،نوں پہ زور ایشی ءِ ھلاس کنگ پاکستان ءِ نادانی ءُ چہ گْوستان ءَ نا آشنائی اِنت۔ بنشون: بی این ایم رپورٹ | اکس: زرمبش