ریڈیو زْرمبش بلوچی | ریڈیو زْرمبش بلوچی,BNM,Mahganj-Baloch

بلوچ راجی زْرمبشت (بی این ایم) ءِ ھیلکاری مراگشانی دْرچ ءَ ’’آجوئی ءِ زْرمبشتانی تہ ءَ جنین ءِ کِرد‘‘ ءِ بُنگپ ءِ سر ءَ مراگشے برجم دارگ بیتگ۔مراگش ءِ تْرامکار بی این ایم نیدرلینڈ چیپٹر ءِ باسک اسلام مراد ، مراگش ءِ کمکار بی این ایم یو کے چپٹر ءِ باسک ھپیز بیتگ ءُ بنگپ ءِ سر ءَ بی این ایم ءِ بنجاھی پتر ءِ باسک ماہ گنج ءَ وتی ھیال ءُ لیکہ درشان کُرتگ اَنت۔

اے ھیلکاری مرگش بی این ایم ءِ مزن کمک سرکماش ڈاکٹر جلال ءِ سروکی ءَ برجم دارگ بیتگیں ھشتُمی مراگش بیتگ۔

بنگپ ءِ سر ءَ ماہ گنج ءَ تران کُرتگ ءُ گْوشتگ: گْوش اَنت کہ آجوئی ءِ زْرمبشت چو بالی مُرگے ءِ وڑ ءَ اِنت ءُ اگاں آئی ءِ یک بانزُلے پروشگ بہ بیت گڑا بال کُرت نہ کنت، ھمے وڑ ءَ جنینانی بھر زورگ ءَ ابید زْرمبشت سوبمند نہ بنت۔ اگاں ما گْوستانک ءِ نیمگ ءَ دلگوش گْور بہ کن ایں گڑا چاگردی آشوب جنیناں آؤرتگ۔پس ءُ مال داشتگ،کِشت ءُ کشاری کُرتگ ءُ چاگردی زندمان ٹاھینتگ، بلے انچوش کہ چاگردی زندمان بندات بوت گڑا چاگرد پدر سری نزام ءِ نیمگ ءَ رھادگ بوت ءُ جنینان ءَ نیم بُندگیں بستارے دیگ بوت۔ پدر سری نزام ءَ ابید ما آجوئی ءِ زْرمبشت یا بلوچ زْرمبشت ءَ بہ چار ایں گڑا جنین بازیں کچے ءَ گندگ بنت۔ پدر سری ءُ نوآبادیاتی نزام ءَ چاگرد زْرمب کنگ ءَ ھچی پشت نہ گیپتگ۔ایشی ءَ ابید بلوچ چاگرد ءِ تہ ءَ کریمہ ءَ گند ایں کہ راھشونے ءِ دْورشُم ءَ دیم ءَ کیت،ھوران ءَ گند ایں،ایشی ءَ ابید باز درور ھست۔چونائی ءَ چاگردی جیڑہ ءُ اڈاند باز ھست بلے اے جیڑھاں ابید جنینانی لیکہ ءِ سر ءَ جُست چِست نہ بیت۔اگاں ما وتی گْوستانک ءَ بہ چار ایں گڑا بی بی گل، بانڑی ءُ باز جنین ھست کہ آیاں مزنیں کِرد پیلو کُرتگ۔

ماہ گنج ءَ گْوشتگ کہ جنین آجوئی ءِ زْرمبشتاں ارواہ بکش اَنت۔اے بابت ءَ گل ھان نسیر گْوش ایت کہ '' بلوچ گْوستانک ءِ ناز ءُ منگِہ جنینانی برورد اِنت ‘‘ آ گْوش ایت کہ’’ جنین چہ مرد ءَ گیش مُھکم اَنت۔‘‘۔پکیر شاد بانڑی ءِ بابت ءَ گْوش ایت کہ’’ وھدے ھمایوں ءُ چاکر ءِ جنگ بوت گڑا اے جنگ ءَ ھم بانڑی ءِ کِرد چو روچ ءَ پدر بیتگ۔‘‘اے جنگ ءَ بانڑی ءِ کِرد بیتگ کہ چہ ایشی ءَ جنگ ءِ پِڑ ءَ سوری لشکر پروش وارت ءُ مرچی ھم گْوش اَنت کہ دھلی بلوچاں گیپتگ،گڑا من گْوشاں کہ اے سوبمندی بانڑی ءِ کِرد ءِ برورد اِنت۔

آئی ءَ گْوشتگ کہ گل بی بی ءَ جنرل ڈائر ءِ بگیری ءَ شیرزالے ءِ گْوستانکے اِشتگ ءُ مرچی ھم گْوستانک ءِ بھر اِنت۔آئی ءِ کِرد ءِ بابت ءَ ڈائر ءَ وت منّ اِتگ۔ھمے جنگاں بی بی گل جنگی کماندار ءُ سپارتکاری ءِ زمہ ءَ زور ایت۔ھمے وڑ ءَ مائی بیبو ءِ کِرد پدر اِنت،آئی ءَ ھم جنگانی تہ ءَ وتی کِرد پہ جْوانی پیلو کُرتگ کہ آئی ءِ ستا دُژمن ءَ وت کُرتگ۔

اے مراگش ءَ بانک ماہ گنج ءَ جھان ءُ دمگ ءَ جنینانی جُھد ءِ بابت ءَ سرجمی ءَ تران کُرتگ۔

آئی ءَ گْوشتگ کہ مرچی بلوچ جنین تیوک ءَ کریمہ ءِ جُھد ءَ ریاست زْرمب کُرتگ چے ءَ کہ کریمہ بلوچستان ءِ ھر کوچگ ءُ گدان ءَ شُتگ ءُ ھرکجا کہ شُتگ آئی ءَ مردم پہ آجوئی ءِ جُھد ءَ سوگہ کُرتگ اَنت۔پمشکا من سرپد باں کہ مرچی بلوچ راجی زْرمبشت ءِ تہ ءَ ھرچی کہ جنین ءِ کِرد اِنت آ دُرس کریمہ ءِ کرد ءُ جُھد ءِ برورد اِنت۔چے ءَ کہ آئی ءَ ڈیھ ءِ تہ ءَ نشتگ ءُ وتی کِرد پیلو کُرتگ چوشیں ھستی گچینی بنت۔

آئی ءَ گْوشتگ: من ھمے سرپد باں کہ 2020 ءَ ڈنُک وئیل ءَ پَد زمین ءِ سر ءَ بلوچ راجکاری ءَ یکبرے پد ءَ زندگ بیگ ءِ ارواہ مان کنگ بوت ءُ ایشی ءِ برورد ھم یک جنینے ءُ آ ملک ناز اِنت ءُ آئی ءِ شیرزالی نمیرانی اِنت۔آئی ءَ کُشندہ ٹولی ءِ بگیری ءَ گھگیری کُرت ءُ آئی ءِ گھگیری کِرد ءَ چاگرد ژامبلینت۔ چہ آئی ءَ پَد سرجمیں بلوچستان ءَ یک بےتاھیری یے ودی بوت، اے وئیل ءِ بگیری ءَ زھرشانیاں جنیناں بلاھیں کچے ءَ بھر زُرت۔ما گْوشت کن ایں کہ ملک ناز ءَ وتی نمیرانی ءَ اے کلوہ دات کہ بےتواری مَرگ اِنت پمشکا مارا گھگیری کنگ لوٹ ایت۔

ماہ گنج ءَ گْوشتگ کہ جھان ءَ کجام کہ زْرمبشت بیتگ اَنت اودئےجنیناں بلاھیں منگھیں کِرد پیلو کُرتگ،آ توری ھندوستان بہ بیت،سند،پلستین،امریکا یا دگء دمگاں ھرکجا جنیناں پہ زمین ءَ وتی کِرد پیلو کُرتگ۔ ھمے وڑ ءَ مرچی بلوچ راج ءِ جنین ھم وتی راجی آجوئی ءِ جوزگ ءَ سرچکار اَنت ءُ دُژمن ءِ بگیری ءَ گھگیری کنگ ءَ اَنت۔

بنشون: درشان / اکس: بی این ایم