ریڈیو زْرمبش بلوچی | ریڈیو زْرمبش بلوچی

ڈاکٹر دین مھمد ءِ بیگواھی ءِ 12 سال سرجم بیگ ءَ کراچی ، واشنگٹن،ایمسٹرڈم، بوسان ءُ ایتھنز ءَ زھرشانی کنگ بیت

ڈاکٹر دین مھمد ءِ بیگواھی ءِ 12 سال سرجم بیگ ءَ کراچی ، واشنگٹن،ایمسٹرڈم، بوسان ءُ ایتھنز ءَ زھرشانی کنگ بیت

JUN

25
25 / 06 / 2021 بی این ایم 86

شال:بلوچ راجی زْرمبشت (بی این ایم) ءِ بنجاھی پتر ءِ باسک ڈاکٹر دین مھمد ءِ بیگواھی ءِ 12 سال سرجم بیگ ءَ کراچی ءُ جھان ءِ آدگہ شھراں زھرشانی کنگ بیت۔گْوستگیں روچ ءَ جرمنی ءُ برتانیا ءَ ھم بی این ایم ءِ نیمگ ءَ زھرشانی کنگ بیتگ۔ بی این ایم ءِ زھرشانیاں بلوچستان ءَ بیگواہ کنگ ءِ جیڑہ پدر کنگ بیتگ۔ 28 جون ءَ کراچی ءَ ڈاکٹردین مھمد ءِ کھول ءَ نیمگ ءَ روانک ءُ زھرشانی کنگ ءِ جار جنگ بیتگ کہ آئی ءِ سروکی ءَ سمی دین کنت۔ آئی اے بابت ءَ وتی ٹویٹر تندجاہ ءَ گْوشتگ کہ من وتی اے درد ءَ درشان کُرت نہ کناں کہ من وتی پِت گْوستگیں 12 سال بیت کہ نہ دیست۔من وتی پِت ءِ کِر ءَ بیگ لوٹاں کہ سال 2009 ءَ آوار جنگ بیتگ۔ آئی گْوشتگ کہ 28 جون ءَ وتی پِت ءِ یلہ کنائینگ ءَ یک روانکے ءِ سروکی ءَ کناں۔ بیگاہ ءِ ادار 4ئےروانک چہ آرٹس کونسل ءَ داں کراچی پریس کلب ءَ زھرشانی یاداشت کنگ بیت۔ 26 جون ءَ شمبے ءِ روچ ءَ واشنگٹن ڈی سی ءَ بی این ایم زوراکی ءِ آماچیں مردمانی پلہ مرزی ءِ جھانی روچ ءِ درگت ءَ ڈاکٹر دین مھمد ءِ 12 سال بیگواھی ءِ سرجم بیگ ءَ زھرشانی کنگ ءِ جار جتگ۔ بیگاہ ءِ ادار دو ءَ بِگر داں چار ءَ وائٹ ھاؤس  (1450 پنسالوینیا ایونیو این ڈبلیو واشنگٹن ڈی سی 20230 ) ءِ دیم ءَ زھرشانی کنگ بیت۔ امریکا ءَ بی این ایم ءِ سروک نبی بکش ءِ نیمگ ءَ اے بابت ءَ بھرزورگ ءِ دزبندی ءَ نبشتگ کہ بلوچستان گْوستانک ءِ گنتریں مردمی جنجالاں گْوزگ ءَ اِنت۔پاکستانی لشکربلوچ آجوئی دوست ءُ مردمی اگبالانی کارکنانی بگیری ءَ کارروائی کنگ ءَ اِنت،اے درگت ءَ جنین ءُ زھگاں ھوار 20 ھزار شھری بیگواہ کنگ بیتگ۔ آئی گْوشتگ کہ زوراکی ءِ میان ءَ ھر مردمے کہ بیران بیت آ مچی مانشانی تہ ءَ کسارت کنگ بنت۔ درشان ءِ رد ءَ بلوچستان نوکیں دور ءِ چکچینی ءِ دیمپان اِنت۔پاکستان ءُ چین ءِ ھواری ءَ برجاھیں مالی چیست ءُ ایرانی پُژدر ءَ دمگ ءَ مزنیں کچے ءَ لشکعی کارمند نادینگ بیتگ۔ آئی گْوشتگ کہ بی این ایم ءِ راھشون ڈاکٹر دین مھمد ءَ پاکستانی لشکر ءِ چیریں تْرامگیجاں 28 جون 2009 ءَ آوار جتگ ءُ آ گْوستگیں دوازدہ سال اِنت کہ بیگواہ اِنت۔آئی ءِ کھول ءَ آئی ءِ زندگی ءِ بابت ءَ پگر مند اِنت۔  ایمسٹرڈم ، نیدر لینڈ ءَ ھم 26 جون ءَ زھرشانی کنگ بیت۔ بی این ایم ءِ درشان ءِ رد ءَ 27جون ءَ ڈاکٹر دین مھمد ءِ بیگواھی ءِ بابت ءَ ایتھنز ءَ یونان ءِ پارلیمان ءِ دیم ءَ بیگاہ ءِ ادار 7 ءَ زھرشانی کنگ بیت۔وھدے کہ ھمے روچ ءَ زِرباری کوریا ءِ شھر بوسان ءَ ادار 5 ءَ بگر داں بیگاہ ءِ ادار 7 ءَ زھرشانی کنگ بیت۔ بنشون: *بی این ایم* /اکس: *دامگ*