ریڈیو زْرمبش بلوچی | ریڈیو زْرمبش بلوچی

سویانگ: پاکستانی زوراکی ءِ بگیری ءَ بی این ایم ءَ زرباری کوریا ءَ زھرشانی کُرتگ

سویانگ: پاکستانی زوراکی ءِ بگیری ءَ بی این ایم ءَ زرباری کوریا ءَ زھرشانی کُرتگ

OCT

24
24 / 10 / 2021 بی این ایم 96

سویانگ: بلوچ راجی زْرمبشت (بی این ایم)ءِ بنجاھی جارکش ءَ گْوشتگ کہ یکشمبے ءِ روچ ءَ زرباری کوریا ءِ شھر سویانگ ءَ بی این ایم ءِ نیمگ ءَ زھرشانی کنگ بیتگ۔زھرشانی ءِ مول بلوچستان ءَ برجاھیں بلوچ چکچینی ءُ انیگیں وئیل جھان ءِ دیم ءَ پدر کنگ بیتگ کہ پاکستانی لشکر ءَ ھوشاپ ءَ دو زھگ اللہ بکش ء واھد ءُ شراتون ء واھد کُشتگ ءُ واشک ءِ ٹوبہ ءَ دہ سالی سنم ء جمیل ءُ شش سالی گزین ء جمیل زورانسری آوار جتگ ءُ بیگواہ کُرتگ اَنت۔ گل ءِ نیمگ ءَ زھرشانی کنوکاں پہ ھندی مردمانی سرپدی دیگ ءَ پنتاک بھر کُرتگ،شھید ءُ زورانسری آوار جتگیں زھگانی اکس چیست کُرتگ ءُ پاکستان ءِ بگیری ءَ اوگام جتگ۔ زھرشانی ءَ سمیر،ھپسہ ءُ بکتاور ءَ تران کُرتگ۔ سمیر ءَ گْوشتگ کہ پاکستانی لشکر ءِ سْوب ءَ بلوچستان ءَ جاور سک ناگیگ اَنت کہ چہ بلوچستان ءِ زورگیپتی ءَ پد برجاہ اَنت۔بلوچ راج اے زورگری ءِ بگیری ءَ پہ آجوئی ءَ جُھد کنگ ءَ اِنت۔اے جُھد ءِ لپاشگ ءَ پاکستان زوراکی کنگ ءَ اِنت۔ھزارانی کچ ءَ بلوچ پاکستان ءَ کُشتگ ءُ بیگواہ کُرتگ۔اود ءَ جنگی میار باری ءِ بالاھیں لڑے ھست۔گْوستگیں ھپتگ ءَ پاکستانی لشکر ءَ کیچ ءِ ھوشاپ ءَ ماٹر آس داتگ اَت کہ چہ ایشی ءَ دو کودکیؐ زھگ بیران ءُ یکے ٹپی بیتگ اَت۔آ وتی گس ءِ نزیک ءَ گوازی کنگ ءَ بیتگ اَنت۔چہ ایشی ءَ پیش ھمے دمگ ءَ ھیات مات ءُ پت ءِ دیم ءَ تیر جنگ ءُ شھید کنگ بوت۔یک جنینے تاج بی بی پاکستانی پانگس ءَ تیرگْواری کنگ ءُ شھید کنگ بوت۔ھمے وڑ ءَ بلیدہ ءَ رامز گس ءَ دور کنگ ءُ تچکی ءَ تیر جنگ ءُ شھید کنگ بوت۔ سمیر ءَ گْوشتگ کہ ٹوبہ واشک ءَ دہ سالی زھگ سنم جمیل ءُ شش سالی گزین جمیل پاکستانی لشکر ءَ لشکر کشی ءِ میان ءَ زورانسری بیگواہ کُرتگ اَنت کہ انگت بیگواہ اِنت۔ما چہ کوریا ءِ سرکار ءُ دُرسیں میان استمانی گلاں دزبندی کن ایں کہ اے مردمی اگبالانی بگیری ءِ سر ءَ توار چِست بہ کن اَنت۔ ھپسہ ءَ گْوشتگ کہ گْوستگیں ھپتاد ءُ شش سالاں پاکستانئ لشکر ءِ زوراکی ءِ نوکیں درور کارگرگ ءَ اِنت۔زورانسری بیگواھی،کُشگ ءُ چگل دیگ،کلپیں میڑ ءِ کُشگ ھمک روچیگیں کار اِنت۔ پاکستانی لشکر بلوچستان ءَ جنگی میار باری کنگ ءَ اِنت۔چِل ھزار مردم ءَ گیش بیگواہ اَنت ءُ پاکستانی چیریں آزارجاھاں آزار اوپار کنگ ءَ اَنت۔ پاکستانی لشکر ءَ ھیات روچ رھمانی کشگ بوت۔ھمے وڑ ءَ تاج بی بی شھید کنگ بوت۔ بلیدہ ءَ یک گسے ءَ بیڑ برگ ءِ میان ءَ دہ سالی رامز تیر جت ءُ کُشت۔ھوشاپ ءَ ماٹر آس دیگ ءُ دو کودکیں زھگ کُشت۔یک ھپتگے ءَ پیش دہ سالی سنم جمیل ءُ آئی ءِ شش سالی برات گزین جمیل پاکستانی لشکر ءَ آوار جنگ ءَ پد بیگواہ کُرتگ اَنت۔ ھپسہ ءَ گْوشتگ کہ میان استمان ءِ بےتواری بلوچستان ءَ پاکستان زوراکی ءُ چکچینی روچ پہ گیش بیگ ءِ سْوب جوڑ بیگ ءَ اِنت۔ اگاں اے بےتواری ھمے وڑ ءَ برجاہ بہ بیت گڑا پاکستان مردمگری ءِ بگیری ءَ میارباری ءَ آزارتی ءِ سر ءَ برجاہ دار ایت۔ما چہ انٹرنیشنل کمیونٹی ءَ دزبندی کن ایں کہ آ بلوچستان ءَ دزمانجنی بہ کنت ءُ پاکستان ءَ بلوچستان ءِ زوراکیانئ جُست ءَ بہ گیپت۔ بنشون : درشان | اکس: بی این ایم