ریڈیو زْرمبش بلوچی | ریڈیو زْرمبش بلوچی

زورانسری بیگواھیں کماش میردرے ھان ءِ زھگ پاکستانی لشکر ءَ زورانسری بیگواہ کُرتگ اَنت۔بی این ایم

زورانسری بیگواھیں کماش میردرے ھان ءِ زھگ پاکستانی لشکر ءَ زورانسری بیگواہ کُرتگ اَنت۔بی این ایم

OCT

19
19 / 10 / 2021 بی این ایم 161

بلوچ راجی زْرمبشت (بی این ایم) ءِ بنجاھی جارکش ءَ بلوچستان ءَ مدامی زھگانی نشانگ کنگ ایرجتگ ءُ گْوشتگ کہ پاکستان ءَ بلوچ سرڈگار نازی بنجلے جوڑ کُرتگ کہ اود ءَ ایردستیں بلوچانی سر ءَ زورکی ءِ نوک نوکیں ھیلکاری کنگ بیگ ءَ انت۔زوراکی ءِ نوکیں دْرچ ءَ زھگ نشانگ کنگ بیگ ءَ اَنت۔زی ھژدہ اکتوبر ءَ واشک ءِ ھند گچک ٹوبہ ءَ پاکستانی لشکر ءَ دو زھگ دہ سالی سنم ء جمیل ءُ گزین ء جمیل دزگیر کنگ ءَ پد بیگواہ کُرتگ اَنت۔ جارکش ءَ گْوشتگ کہ سرجمیں بلوچستان ءِ وڑ ءَ چہ گچک ءَ دزگیر کنگ ءَ پد زورانسری بیگواھیں زھگانی کھول ءَ ھوار سرجمیں میتگ گْوستگیں یک سالے بیت کہ پاکستانی لشکر ءِ زوراکی ءِ نشانگ ءَ اِنت۔ھمے زھگانی پیرُک میردرے ھان ء مھمد کریم پاکستانی لشکر ءَ چِل روچ پیش دزگیر کنگ ءَ پد بیگواہ کُرتگ۔ھمے کھول ءِ جنین ءُ زھگ پیسر ءَ داں بازیں ھپتگاں لشکری آزارجاھاں زورکی ءِ نشانگ کُرتگ اَنت۔ آئی گْوشتگ کہ اگاں تیوک ءَ اے کھول ءِ گپ کنگ بہ بیت گڑا اے کھول ءَ ھوار سرجمیں میتگ یکبرے پد ءَ لڈّ ءُ بار کنگ ءِ نشانگ جوڑ بیتگ۔ایشانی جند ءِ ھنکین سولیر اِنت چہ اود ءَ یک ماھے پیش پاکستانی لشکر ءَ چہ ٹوبہ گچک ءَ لڈ ءُ بار کنگ ءِ پرمان داتگ اَنت کہ چہ اِد ءَ کھن نامیں میتگے ءَ بہ رو اِت۔میتگ ءِ جھمنند آں اے بری لشکر ءِ پرمان نہ منّ اِتگ۔پمشکا لشکر ءَ اے دوئیں زھگ آوار جتگ اَنت۔ آئی گْوشتگ کہ پاکستانی لشکر ءَ گوں تْرندی ءَ زھگانی نشانگ کنگ تیز کُرتگ۔ 2017 ءَ کراچی ءَ آپتاب ءُ اُلپت آوار جنگ ءَ پد داں بازیں ماھاں آزارجاھاں داشتگ اَنت۔ھما روچ ءَ چہ پد اے دْرچ برجاہ اِنت۔جنین ءُ زھگ مُچی سزا ءِ بنیاد ءَ در مردمی ازیت ءِ دیمپانی ءَ کنگ ءَ اَنت۔ جارکش ءَ گْوشتگ کہ دہ اکتوبر ءَ ھوشاپ ءَ پاکستانی لشکر ءِ مارٹر آس دیگ ءَ دو کسانسالیں برات ءُ گھار اللہ بکش ءُ شراتون شھید بیتگ اِت اَنت ءُ یک زھگے مسکان سک ٹپی بیتگ اَت کہ انگت نادراھجاہ ءَ درمان کنگ بیگ ءُ مرگ ءُ زند ءِ میان ءَ جنگ کنگ ءَ اِنت۔آیانی کھول زھرشانی کنگ ءَ لاچار بوت کہ لاشانی ھمراھی ءَ شال ءَ اتک اَنت۔ھژدہ اکتوبر ءَ یک سرکاری جارے ءُ میار بارانی سزا دیگ ءِ پرمان ءَ پد کھول ءَ زھرشانی ھلاس کُرت۔ایشانی کل ءُ کسارت نہ بیتگ اَت کہ چہ گچک ٹوبہ ءَ دو زھگ آوار جنگ ءُ بیگواہ کنگ بوت۔ آئی گْوشتگ کہ ھوشاپ ءَ ھمے سال ءَ سیزدہ سالی مراد امیر پاکستانی لشکر ءَ بدکاری ءِ نشانگ کُرتگ اَت۔بلیدہ ءَ کسانسالیں رامز کُشت۔ بلوچستان ءَ پاکستانی زوراکی ءِ نہ تم اِتگیں دْرچ ءَ لشکر ءَ رسانکدر،آمید گس ءُ آدگہ تْرامگیجانی پلہ مرزی ءَ مزنیں کِردے پیلو کُرتگ۔بلوچ زھگ ءُ جنینانی گوں مھکمیں شوربدی یے ءِ بنیاد ءَ نشانگ کنگ پاکستانی لشکر ءُ چیریں تْرامگیجانی کاؤنٹر انسرجنسی شوندات ءِ تہ ءَ یک نوکیں پندلے ءِ وڑ ءَ گندگ بیگ ءَ اِنت۔اے شوندات ءِ بنیاد ءَ پاکستانی لشکر ءُ چیریں تْرامگیج بلوچ آجوئی دوستیں سروکانی، سیاسی باسک ءُ کارکنانی، سرمچارانی،آیانی سیادانی،دوزواہ ءُ کوھی دمگاں نشتگیں بلوچانی زھگ ءُ جنینانی درکانودی آوار جنگ ءُ لشکری بنجل یا چیریں جاھاں زورانسری بیگواہ کنگ ءَ اَنت۔اے بیگواھیانی میان ءَ آ جانی زوراکی ءِ نشانگ کنگ بنت۔باز بر ءَ بیگواہ کنگ ءِ میان ءَ بدکاری ءِ نشانگ ھم کنگ بنت۔ جارکش ءَ گْوشتگ کہ پاکستان نازی ءِ پیم ءَ بلوچ چکچینی ءَ تیز کنگ ءَ اِنت بلے پاکستان ءِ آسر چو ھٹلر ءُ نازی اِزم ءِ وڑ ءَ بیت۔بلوچ راج ءِ سمائی زانت،چاگرد ءِ دُرسیں بھرگانی زْرمبشت ءَ بھر زورگ ءُ ایردستی ءِ مارشت ءَ پاکستانی زورگری ءِ بنیاد ژاںبلینتگ۔ پاکستانی زوراکی آئی ءِ تُرس ءُ بے سوبی ءِ آسر پدر بیگ ءَ اِنت۔


بنشون:درشان / اکس: بی این ایم