ریڈیو زْرمبش بلوچی | ریڈیو زْرمبش بلوچی

درانڈیھ ءَ سیاسی کارکنانی کوش ءِ شوربندی گامگیج ءِ دیم ءَ آھگ جوانیں دیمروی یے_بی این ایم

درانڈیھ ءَ سیاسی کارکنانی کوش ءِ شوربندی گامگیج ءِ دیم ءَ آھگ جوانیں دیمروی یے_بی این ایم

JUL

19
19 / 07 / 2021 بی این ایم 68

شال:بلوچ راجی زْرمبشت (بی این ایم) ءِ بنجاھی جارکش ءَ نیدرلینڈز ءَ جھمنندیں بلاگر،چاگردی رسانکدر ءِ کارکن ءُ پاکستانی لشکر ءِ نادوستین وکاس گورایا ءَ ھوار لھتیں مردم کہ آیانی تہ ءَ بلوچ کارکنانی کوش ءِ شوربندی ءِ راز ءِ آشکار بیگ ءَ گوشتگ کہ اے پاکستانی ناشرکاری ءِ بگیری ءَ مزنیں سوبمندی یے۔ نیدرلینڈز ءَ ھوار جھان ءَ اے شوربندی ءِ دُرسیں تک ءُ پھناتانی پٹ ءُ پول کنگی اِنت۔ آئی گْوشتگ کہ اے کوش ءِ شوربندی ءِ گزارش اسکاٹ لینڈ یارڈ ءَ ناشرکاری آمیدگس ءَ کمانڈ یونٹ ءُ نیدرلینڈز واکدارانی پٹ ءُ پول Crown Prosecution Service (CPS) ءِ نیمگ ءَ دیم ءَ اتکگ کہ برتانیا ءَ جھمنندیں  پاکستانی شھری گوھرمھمد ھان دزگیر کنگ بیتگ،آئی منّ اِتگ کہ آئی وکاس گورایا ءِ کُشگ ءِ شور بندی کُرتگ۔اے شوربندی پہ ھما دُرسیں مردماں تُرسناک اِنت کہ آ پاکستانی زوراکی ءُ تُرس ءَ تتکگ ءُ درانڈیھ ءَ باھوٹ بیتگ اَنت۔مارا چہ بنشونے ءَ ھال سربیتگ کہ وکاس گورایا ءَ ابید آدگہ کارکنانی نشانگ کنگ بیگ ءَ اَنت ءُ آیانی تہ ءَ بلوچ ھم ھوار اَنت۔ آئی گْوشتگ کہ پاکستانی ناشرکاری ءِ مستریں منّانک مھمد گوھرھان ءُ آئی ءِ کمکار جھانی راھبند ءِ بنیاد ءَ نہ ایوک ءَ سزا دیگ بہ بنت بلکیں ایشی ءِ باپُشت دُرسیں چیز دیم ءَ آرگ بہ بنت۔ما دلجمیں کہ ایشی تہ ءَ پاکستانی چیریں تْرامگیج ھوار اَنت۔وکاس گورایا ءَ پاکستانی چیریں تْرامگیجاں آوار جتگ ءُ داں بازیں ھپتگے ءَ زھنی ءُ جانی زوراکی ءِ نشانگ کُرتگ اَت۔آئی ءَ اے سزا پاکستانی لشکر ءُ بلوچستان ءِ جاورانی بابت ءَ چاگردی رسانکدر ءِ چیست ءُ ایرانی سْوب ءَ دیگ بیتگ اِت اَنت۔ جارکش ءَ گْوشتگ کہ اے وئیل ءَ پد اے دزگیری اے گپ ءِ منّانک اِنت کہ گْوستگیں سال ءَ سویڈن ءَ نامی ئیں بلوچ اھوالکار ءُ زانوگر ساجد ھسین ءُ کینیڈا ءَ بی این ایم ءِ راھشون کریمہ ءِ کوش ءَ تچکی ءَ پاکستان ءِ دست مان اِنت۔گوھرھان پاکستانی تْرامگیجانی یک کارمندے منّگ بہ بیت ءُ ساجد ھسین ءُ بانک کریمہ ءِ شھید کنگ ءِ پٹ ءُ پول بندات کنگ بہ بیت۔دومی نیمگ ءَ بی این ایم ءَ ھوار دومی، پشتون ءُ سندی راجدوستیں گلانی سروک ءُ کارکن پاکستان ءَ آوار جنگ،زوراکی ءُ مرگ ءِ تُرس ءَ روکپتی ڈیھاں اتکگ ءُ سیاسی باھوٹ بیتگ اَنت۔ایواک ءَ یک چاگردی رسانکدر ءِ کارکنے ءِ پُشت ءَ سرجمیں پاکستان کپتگ گڑا ما سرپد بہ ایں پہ آدگہ مردماں جاور گیش ناگیگ اَنت۔پمشکہ جھان بایدیں تچکی ءَ گامگیج بہ زور ایت۔ آئی گْوشتگ کہ پیشگیں پاکستانی راجمستر ءُ لشکر ءِ سروک جنرل پرویز مشرپ ءِ یک تامُربندے ھم یاداشت ءَ ساڑی اِنت کہ رسانکدر ءِ دیم ءَ درانڈیھاں جھمنندے مردمانی کُشگ ءِ گپ ءَ تچکی ءَ کنت۔اگاں آ وھد ءَ جنرل مشرپ ءِ بگیری ءَ گامگیج زورگ بوتیں گڑا پاکستانی ناشرکاری ءِ بگیری ءَ بلوچ راج انچوک آماچ نہ بیتگ اَت۔ جارکش ءَ گْوشتگ کہ انیگیں پاکستان ءِ مزن وزیر ءَ سرزاھر ءَ لندن ءَ سیاسی باھوٹی ءُ ایم کیوایم ءِ سرکماش التاپ ھسین ءِ کُشگ ءِ گپ کُرتگ۔یک استانی ءِ سروک ءِ نیمگ ءَ کوش ءِ بیھار دیگ ناشرکاری یے گْوشگ بیت۔ کراؤن پراسیکیوشن سروس (سی پی ایس) ءَ جنرل پرویز مشرپ ءِ اے تامُربند ءُ امران ھان ءِ انیگیں درشان ءُ لندن ءَ دزگیر بیتگیں گوھر مھمد ھان ءِ گپاں پٹ ءُ پول ءِ تہ ءَ ھوار کنگ ءُ پاکستان جھانی آمیدگس ءِ دیم ءَ اوشتارینگ بہ بیت،داں درانڈیھاں جھمنندیں راجدوست سیاسی کارکن ءُ دومی ایکٹوسٹس چہ پاکستانی چاریگ ءُ کُشگ ءَ بہ رکّ اَنت۔ آئی گْوشتگ کہ اے جیڑہ دومی ڈیھاں جھمنندیں لھتیں مردمانی جیڑہ ءُ کوش ءِ گامگیج نہ اِنت بلکیں جھانی ناشرکاری گْوشگ بیت۔پمشکہ زمہ واریں جھانی توانمنداں پاکستان ءِ بگیری ءَ جھانی آمیدگس ءَ کیس نبشتہ کنگ ءُ دومی سیاسی ءُ چاگردی کارکنانی پھریزگ ءَ وتی کِرد پیلو کنگی اِنت۔ بنشون : درشان | اکس: زرمبش