ریڈیو زْرمبش بلوچی | ریڈیو زْرمبش بلوچی

میان استمانی انساپ ءِ روچ ءِ درگت ءَ بی این ایم ءَ جرمنی ءَ زھرشانی ءُ سرپدی مراگشے برجم داشتگ

میان استمانی انساپ ءِ روچ ءِ درگت ءَ بی این ایم ءَ جرمنی ءَ زھرشانی ءُ سرپدی مراگشے برجم داشتگ

JUL

19
19 / 07 / 2021 بی این ایم 68

شال: بلوچ راجی زْرمبشت (بی این ایم) ءِ بنجاھی جارکش ءَ وتی درشانی ءَ گْوشتگ کہ میان استمان ءَ برجاھیں سرپدی تُکشام ءِ رد ءَ ھبدہ جولائی ءَ جرمنی ءِ شھر کولن ءَ ”میان استمانی انساپ ءِ روچ“ ءِ درگت ءَ زھرشانی کنگ بیتگ ءُ جرمنی ءِ شھریان ءَ پاکستانی زوراکی ءِ بابت ءَ سرپدی ءُ پنتاک بھر کنگ بیتگ۔زھرشانی ءَ بی این ایم ءِ کلانیں باسک جبار، امجد مراد، بدل ءُ آدگراں تران کُرتگ۔ سنگت جبار ءَ گْوشتگ کہ بلوچستان چہ کرناں جھان ءِ نکشہ ءَ یک آجو ءُ پُرایمنیں ڈیھے بیتگ،بلے چہ بدبھتی ءَ برتانیا ءَ وتی سیتاں بلوچستان بھر ءُ بلوچ راج پہ چیردستیں زندے ءِ گْوازینگ ءَ لاچار کُرتگ ءُ برتانیا ءِ کمک ءَ پاکستان بلوچستان ءِ سر ءَ زورگر بیتگ۔مرچی پاکستان نہ ایوک ءَ بلوچ ءِ چکچینی ءَ کنگ ءَ اِنت بلکیں سرجمیں جھان ءَ ناشرکاری ءَ تالان  کنگ ءَ اِنت۔مئے مرچیگیں زھرشانی ءِ مول جھان ءُ گوں آدگہ پُرایمنیں تْرامگیجاں دزبندی کنگ اِنت کہ پاکستان ءِ ناشرکاری ءَ ھلاس بہ کن اَنت ءُ بلوچ راج ءَ انساپ بہ دیئنت۔ما چہ جھان ءَ دزبندی کنیں کہ ناشرکاریں پاکستان ءِ مالی کمک ءَ بند بہ کن اَنت چے ءَ کہ پاکستان جھان ءِ داتگیں مالی کمکاں بلوچ ءُ آدگہ چیردستیں راجانی بگیری ءَ کارمرد کنگ ءَ اِنت۔پاکستانی لشکر نہ ایوک ءَ وت بلوچستان ءَ ناشرکاری کنگ ءَ اِنت بلکیں جتائیں مزھبی ناشرکاریں گلانی کمک ءَ بلوچ راج ءِ کرنیگیں آزات ھیالیں دودمان ءَ مزھبی بنیاد ءَ تباہ کنگ ءَ اِنت۔ امجد مراد ءَ گْوشتگ کہ وھدے ما زھرشانی کنیں،مئے یک مولے کہ وتی چیردستی ءُ پاکستان ءِ زوراکیاں جھان ءِ دیم ءَ بیار ایں۔ما شرپمندیں جھان ءَ اے گْوشگ لوٹیں کہ پاکستان نہ دگہ کانود ءِ پابند اِنت ءُ نہ مردمی اگبالانی پاسداری ءَ کنت۔بلوچستان ءَ بلوچانی چکچینی ءَ کنگ ءَ اِنت بلے جھان بےتواری ءَ ندارگ چارگ ءَ اِنت۔مرچیگیں روچ ءَ جھان ءَ انساپ ءِ روچ ءِ درگت ءَ برجم دارگ بیگ ءَ اِنت بلے ما مرچی ھم انساپ ءِ وداریگیں۔بلوچستان ءِ سر ءَ پاکستانی زورگری ءَ ھپتاد سال ءَ گیش گْوستگ۔چوشیں ھچ روچے نیست کہ اود ءَ یکے آوار جنگ ءُ کُشگ نہ بیت۔بلے بژن کہ جھان اے زوراکیانی دیم ءَ بےتوار اِنت۔جھان ءِ بےتواری ءَ پاکستان روچ پہ روچ وتی زوراکیاں گیش کنان اِنت۔بلوچستان ءَ نہ ایوک ءَ مردین آوار جنگ ءُ کُشگ بیگ ءَ اَنت بلکیں جنین ءُ زھگ ھم چہ پاکستانی زوراکیاں پھریز نہ اَنت۔ بدل ءَ گْوشتگ کہ مرچی ما پہ ھما مردماں انساپ لوٹگ ءَ ایں کہ بلوچ راج ءُ پہ آدگہ چیردستیں راجاں مرچی پاکستانی آزارجاھاں زوراکیانی دیمپان اَنت۔بلوچستان ءَ ھزارانی کچ ءَ مردمانی ژانگولیں لاش چگل دیگ بیتگ اَنت۔مرچی بلوچستان ءِ  ھمک مردم ھمے اوست ءِ وداریگ اِنت کہ یک روچ ءِ میان استمان پاکستانی زوراکیانی بگیری ءَ گامگیج زوریت ءُ آئی ءَ انساپ ءِ آمید گس ءِ دیم ءَ اوشتارین ایت۔ مُچی ءَ تران کنان ءَ مردمی اگبالانی کارکن بشیر ءَ گْوشتگ کہ بلوچستان ءَ انیگیں جاور بَدتِر بیگ ءَ اَنے۔ھزارانی کچ ءَ بلوچ سیاسی کارکن،مردمی اگبالانی کارکن آوار جنگ بیتگ اَنت۔داں مرچی نہ کسے پاکستانی آمیدگس ءَ پیش کنگ بیتگ ءُ نہ ارزی نبشتہ کنگ بیتگ۔سالانی سال مردم آزارجاھاں زوراکیانی دیمپان اَنت۔ بی آر پی ءِ باسک ابدالجلیل ءَ تران کنان ءَ گْوشتگ کہ مرچی ما اِد ءَ میان استمان ءِ انساپ ءِ روچ ءِ درگت ءَ پمشکہ زھرشانی کنگ ءَ ایں کہ جھان ءَ سرپدی بہ دئیں مرچی ھم بلوچ راج انساپ ءِ وداریگ اِنت۔مردمانی بیگواہ کنگ ءِ درچ چہ 2000 ءَ برجاہ اِنت کہ ایشانی تہ ءَ ڈاکٹر، اسٹوڈنٹس، ٹیچر، مُزور، سیاسی کارکن ءُ مردمی اگبالانی کارکناں ابید لس مردم ھم بیگواہ کنگ بیگ ءَ اَنت۔ گُڈی ءَ بانک پرزانہ ءَ پنتاک ونتگ ءُ ھندی مردمان ءَ گوشدارائینتگ۔  بنشون: درشان | اکس: بی این ایم