ریڈیو زْرمبش بلوچی | ریڈیو زْرمبش بلوچی

بی این ایم ءَ جون ءِ ماہ ءِ گزارش شنگ کُرتگ،50 ءَ گیش لشکرکشیاں 19 مردم کُشگ ءُ 47 مردم بیگواہ کنگ بیتگ،بازیں جنینے ءِ گون ءَ بدکاری،درزنی ءَ گیش گس ماندارگ ءُ سدانی کچ ءَ پس ءُ مال لُٹگ بیتگ۔

بی این ایم ءَ جون ءِ ماہ ءِ گزارش شنگ کُرتگ،50 ءَ گیش لشکرکشیاں 19 مردم کُشگ ءُ 47 مردم بیگواہ کنگ بیتگ،بازیں جنینے ءِ گون ءَ بدکاری،درزنی ءَ گیش گس ماندارگ ءُ سدانی کچ ءَ پس ءُ مال لُٹگ بیتگ۔

JUL

18
18 / 07 / 2021 بی این ایم 141

بلوچ راجی زْرمبشت (بی این ایم) ءِ رسانکدری کارگشاد دلمراد ءَ جون 2021 ءِ ماہ ءِ گزارش شنگ کُرتگ ءُ گْوشتگ کہ بلوچستان ءَ پاکستانی زوراکی چو مدامی ءِ وڑ ءَ برجاہ بیتگ۔جون ءِ ماہ پنجاہ ءَ گیش لشکرکشیاں 47 مردم بیگواہ ءُ 19مردم کُشگ بیتگ،درزنی ءَ گیش گِس ماندارگ ءُ سدانی کچ ءَ مردمانی پس ءُ مال لُٹگ بیتگ اَنت۔کُشتگیں مردمانی تہ ءَ یکے پاکستانی لشکر ءِ آزارجاھاں،دو مردم کیلکور ءُ یکے پنجگور ءَ تیرگْواری کنگ ءُ کشگ بیتگ۔پنچ بلوچ جُھدکار پاکستانی لشکر ءِ گون ءَ دیم پہ دیمی میڑ ءَ شھید بیتگ۔وڈ ءُ روکپتی بلوچستان ءَ دو مردم پاکستانی لشکر ءِ باڑھی کُشندھاں شھید کُرتگ،وھدے کہ مند ءَ سرکاری کمکاریں ماسٹرے ءَ جنگ کنان ءَ یک جنینے ءَ چاکوے جتگ ءُ کُشتگ۔دگہ ھپت مردم ءِ کوش ءِ سْوب زانگ نہ بیتگ۔اے ماہ ءَ پاکستانی لشکر ءَ کیلکور ءُ کولواہ مادگ کلات ءَ درزنی ءَ گیش جنینانی گون ءَ بدکاری کُرتگ۔پنچ مردم چہ پاکستانی لشکر ءِ آزارجاھاں آجو بیتگ۔ دلمراد ءَ گْوشتگ کہ پاکستانی لشکر ءِ زوراکی ءُ رستری یکشلہ برجاہ بیتگ۔تمپ ءَ گھرام نادل ءِ پاکستانی لشکر ءِ آزارجاھاں کُشگ ءُ کیلکور ءَ مُچی بدکاری زوراکی ءُ رستری ءِ پدریں درور اَنت۔اے وئیلانی پُژدر ءَ بلوچ راج ءِ زھرشانی ءُ آماچیں مردمانی نیمگ ءَ پریس کانپرنس کنگ اے گپ ءِ منّانک اِنت اے وئیل مدامی بیگ ءَ اَنت بلے نی مردمانی تُرس دراتکگ ءُ وئیلاں رسانکدر ءِ دیم ءَ بیان کنگ ءَ اَنت۔مردم سرپد بیتگ اَنت کہ پاکستانی زوراکی پہ چیر دیگ ءَ ھلاس نہ بنت۔  دلمراد ءَ گْوشتگ کہ جون ءِ ماہ ءَ تمپ ءَ گھرام ء نادل پاکستانی لشکر ءَ آوار جنگ ءَ پد بیگواہ کُرتگ ءُ چار روچ ءَ پد گس ءِ مردم رھوت کُرتگ اَنت کہ گھرام ءِ لاش بہ بَر اِت۔آزارجاھانی تہ ءَ کوش ءُ بدکاری کنگ ءِ تہ ءَ گیشی آرگ بیتگ۔زورگریں لشکر آوار جنگ،بیگواہ کنگ،کلپیں میڑ ءِ نام ءَ کُشگ ءِ پندلاں پد جنینانی گون ءَ بدکاری کنگ ءَ ھم یک سلاھے ءِ پیم ءَ کارمرد کنگ ءُ بلوچ راج ءَ لپاشگ ءُ چہ راجی جُھد ءَ دزکش کنگ ءِ جُھد ءَ کنگ ءَ اِنت۔ آئی گْوشتگ کہ پنجگور کیلکور ءَ زوراکی ءِ میان ءَ پاکستانی رستریں لشکر ءَ یک درزنی ءَ گیش جنین بدکاری ءِ نشانگ کُرتگ۔یک جنکے ءِ پت ءَ گھگیری کُرتگ پاکستانی لشکر ءَ تیر جتگ ءُ کُشتگ،کیلکور ءِ بازیں میتگ آں پاکستانی لشکر ءِ زوراکی ءَ تنگ بیتگ ءُ پہ لڈّ ءُ بار کنگ ءَ لاچار بیتگ اَنت۔اے دمگ پاکستان چین اکنامک کوریڈور (سی پیک) شوربندی ءِ سْوب ءَ مدام پاکستانی لشکر ءِ زوراکی ءِ آماچ اِنت۔ھمے دمگ ءَ ھوشاپ ءَ پاکستانی لشکر ءَ  یک یازدہ سالی زھگ امیر مراد بدکاری ءِ نشانگ کُرتگ اَت۔دگہ یک وئیلے مشکے ءَ جنینے ءِ گون ءَ بدکاری کنگ ءَ پد آئی ءِ کھول بےتوار بیگ ءِ بیھار دیگ بیتگ۔ دلمراد ءَ گْوشتگ کہ ھمے وڑ ءَ بازیں وئیل دیم ءَ آھگ ءَ اَنت بلے پاکستانی لشکر ءِ زوراکی ءِ سْوب ءَ تُرس ءُ رسانکدر ءِ نہ بیگ ءِ سْوب ءَ اے وئیل جھان ءِ چماں اندیم اَنت۔ آواران ءَ نورجان ءَ پمشکہ وتکشی کُرت کہ پاکستانی لشکر ءَ آئی ءَ جنک ءِ بنجل ءَ پیش کنگ ءِ گْوشتگ اَت۔ اے وئیلانی بگیری ءَ بی این ایم ءَ جھان ءَ زھرشانی ءِ ھواری ءَ جتائیں تْرامگیجاں نمدی ءُ چاگردی رسانکدر ءَ مراگش برجم داشتگ۔چوشیں جاوراں اکوامتھدہ ءُ جھانی توانمندانی دزمانجنی ھژدری اِنت۔ما چہ آیاں دزبندی کنیں کہ آ وتی زمہ واریاں پیلو بہ کن اَنت ءُ بلوچستان ءَ چہ اے تباھیاں بہ رکین اَنت۔ پنجگورکیلکور ءَ پاکستانی لشکر ءَ ششت سالی پیرمرد اِنام ء پیر داد ءُ پشو ء ساکو نامیں مردمے دزگیر کنگ ءَ پد بیگواہ کُرتگ اَت۔ شال بروری ءِ جھمنند بھادر الی زھی پاکستانی چیریں تْرامگیجاں آوار جنگ ءَ پد بیگواہ کُرتگ۔ ھزدار وڈ ءَ پاکستانی لشکر ءِ چریکاں تیرگْواری کُرتگ ءُ ھندوتا باپاری اشوک کمار کُشتگ۔ بولان ءَ پاکستان لشکر ءَ لشکر کشی برجاہ بیتگ۔ شال ءَ نامی ئیں اھوالکار آبد میر ءِ برات ساجد پاکستانی چیریں تْرامگیجاں چہ شال ءَ بیگواہ کُرتگ ءُ یک ھپتگے ءَ پد یل کُرتگ۔ پنجگور کیلکور ءَ پاکستانی لشکر ءَ درزنی ءَ گیش جنینانی گون ءَ بدکاری کُرتگ،پیری ء اھمد ءَ وتی زھگ ءِ بدکاری ءِ رکینگ ءَ گھگیری کُرتگ،چہ ایشی ءَ پاکستانی لشکر ءَ تیرگْوری کُرتگ ءُ کُشتگ۔ھمے لشکرکشی ءِ میان ءَ دل جان پاکستانی لشکر ءَ آزار داتگ ءُ کُشتگ۔ کیچ ءِ بنجاھی شھر تربت ڈنک، بھمن، گوگدان ءُ ڈگاری کھن ءَ پاکستانی لشکر ءِ زوراکی برجاہ بیتگ،راہ در بند کُرتگ اَنت ءُ لشکر کشی کُرتگ یک درزنی ءَ گیش مردم دزگیر کنگ ءَ پد بیگواہ کنگ بیتگ۔اے مردمانی بابت ءَ مارا دگہ گیشیں سرپدی نہ رس اِتگ۔ چہ کیچ ءِ بنجاھی شھر تربت ءَ پاکستانی لشکر ءَ گلاب ء کریم بکش دزگیر کنگ ءَ پد بیگواہ کُرتگ۔ بنشون:درشان /اکس:زْرمبش