ریڈیو زْرمبش بلوچی | ریڈیو زْرمبش بلوچی

بلوچ شھمیرانی روچ ، بی این ایم ءِ پنتاک: 13 نومبر پما پھر ءِ چیدگے

بلوچ شھمیرانی روچ ، بی این ایم ءِ پنتاک:  13 نومبر پما پھر ءِ چیدگے

NOV

11
11 / 11 / 2021 بی این ایم 18

شال: 13 نومبر بلوچ شھمیرانی روچ ءِ درگت ءَ بی این ایم ءِ نیمگ ءَ شنگ بیتگیں پنتاک ءِ تہ ءَ گْوشگ بیتگ کہ 13 نومبر پما پھر ءِ چیدگ اِنت۔وھدے برتانیا ءِ زورگر جتائیں ڈیھاں دستیگ کنگ ءَ اَت،سرجمیں جھان ءَ برتانیا ءِ لشکر ءِ بادشاھی اَت،آئی ءِ لشکر ءَ نوکیں سلاہ سامان گون اَت بلے ھان مھراب ھان ءُ آئی ءِ ھمبلاں سرڈگار ءِ اشک ءُ دیمونی ءِ جوزگ ءُ شھیدی ءَ انگریز ءَ اے باور دات کہ زوراکی ءُ زور ءِ بگری ءَ گھگیری کنگ بلوچ ءِ ابرمی بھرے۔ پنتاک ءَ گْوشگ بیتگ کہ ابرم ءَ کس بدل کُرت نہ کنت ءُ گھگیری ءَ ھچ پیمیں زوراک چہ بلوچ ءَ پچ گیپت نہ کنت۔اے گھگیری ءِ روچ ءَ بلوچ راج شھیدانی روچ ءِ نام ءَ یات کنت۔ ’’ مھراب ھان ءِ رندگیری ءَ شھید بیتگیں دُرسیں شھید مئے راجی بامرد اَنت کہ آیاں زوراکی ءِ بگیری ءَ ھمک پیمیں جنجال اوپار کُرتگ،آزارجاھاں آزار سَگ اِتگ،ژانگولیں لاشانی دروشُم ءَ دزکپتگ اَنت بلے چہ راجی زْرمبشت ءَ دزکش نہ بیتگ اَنت بلکیں زندگی ءِ ھمک وشی پُشت داتگ ءُ دیمونی ءِ لیکہ ءِ راہ ءُ شھیدی ءِ گرانبھائیں مراداں سربیتگ اَنت۔‘‘ پنتاک ءِ گُڈی ءَ گْوشگ بیتگ کہ اے نوک اھد کنگ ءِ روچ اِنت۔بیا اِت کول کن ایں کہ ھر پیمیں جنجالانی دیم ءَ پہ بچکندگ اوشتیں ءُ داں مرادانی منزل ءَ سربیگ ءُ راجی زْرمبشت ءِ سوبندی ءَ جُھد ءَ برجاہ دار ایں۔ «سرجمیں پنتاک» «13 نومبر: نوک کول کنگ ءِ روچ اِنت» بلوچ راج! 13 نومبر بلوچ راجی گْوستانک ءَ یک گرانبھا ءُ پُر اَرزِشت ایں روچے۔بلوچ راج ھمک سال اے روچ ءَ پہ نازے برجم دار ایت چے ءَ کہ اے روچ دیمونی ءُ جُھد ءِ چیدگ اِنت۔اے روچ ءَ بلوچ ھاکم ھان مھراب ھان ءَ انگریزی لشکر ءِ دیم ءَ سرجھل کنگ ءِ بدل ءَ دیمونی ءِ مزنیں لیکہ گچین کُرت۔آ بلوچ راجی گْوستانک ءَ مدام یک راجی بامردے ءِ وڑ ءَ یات کنگ بیت۔آئی داں بازیں روچاں انگریز ءِ زوراکیں لشکر ءِ دیم پہ دیمی کُرتگ۔انگریزی لشکر ءِ سروگاناں ھوار سد ءَ گیش لشکری کشگ بیتگ ءُ بلوچ ھاکم ءَ ھوار بلوچ لشکر ءِ چارسد ءَ گیش سرمچار شھید بیتگ۔انگریزانی بیھار ءُ اُرش ءَ پیش ھان مھراب ھان ءَ چہ سرداراں کمک ءِ دزبندی کُرتگ اَت بلے سرداراں ھما وھد ءَ ھم زوراک ءِ دیم ءَ سر جھل کُرت ءُ بنامے پہ وت ءَ گچین کُرت بلے چہ ایشی ءَ بلوچ راجی زْرمبشت ءُ گھگیری ءَ نہ آ روچاں کمی ءُ نزروری اتکگ ءُ نہ مرچی سردارانی پاکستانی بیگ ءَ بلوچ راج ءِ گھگیری ءَ نزورے ھست۔ 13 نومبر پما پھر کنگ ءِ چیدگ اِنت۔وھدے برتانیا ءِ زورگر جتائیں ڈیھاں دستیگ کنگ ءَ اَت گڑا سرجمیں جھان ءَ برتانیا ءِ زوراکیں لشکر ءِ بادشاھی اَت ،آئی ءِ لشکر گوں نوکیں سلاھاں سلاہ بند اَت بلے ھان مھراب ھان ءُ آئی ءِ ھمبلاں گوں سرڈگار ءَ اشک ءُ دیمونی ءِ جوزگ ءُ شھیدی ءَ انگریزی لشکر ءَ اے باور دات کہ زوراک ءُ زورگر ءِ بگیری ءَ گھگیری بلوچ ءِ ابرمی بھرے۔ابرم ءَ کس بدل کُرت نہ کنت ءُ گھگیری ءَ جھان ءِ ھچ زوراک چہ بلوچ ءَ پچ گیپت نہ کنت۔اے گھگیری ءِ روچ ءَ بلوچ راج بلوچ شھیدانی روچ ءِ نام ءَ یات کنت۔ شھید کجام ھم راج ءِ گْواچنی بامرد بنت۔آیان ءَ ستاشانی ندر کنگ زندگیں راجانی اگبال اِنت۔بلوچستان ءِ شھیداں مرچی بلوچ راج ءِ جیڑہ چہ زمین ءَ چِست کُرتگ ءُ آزمان ءَ رسینتگ۔شھیدان ءَ ستک شانی ندر کنگ آیانی پگر ءُ لیکہ ءِ دیم ءَ برگ مئے راجی پرز اِنت ءُ شھیدانی رندگیری ءَ روگ ءُ راجی جُھد ءِ تیز کنگ مئے راجی زمہ واری اِنت۔ گیرت مندیں بلوچ راج! بلوچ راجی زْرمبشت ءِ انیگیں لوٹ،جنجال ءُ پاکستانی استان ءِ زوراکی ءُ تُرس ءِ شوندات اے گپ ءِ لوٹ ءَ کنت کہ مارا چہ بھر ءُ بانگی ءُ تُرس ءَ دراھگ ءُ بلوچ راجی زْرمبشت ءَ کِردی بنیاد ءَ ھوار بیگ اِنت۔ بلوچ راجی سیاست ءَ وتی کُنش ءِ بنیاد ءَ جُھد بہ کن ایں۔مئے بےتواری ءُ یکِر بیگ مارا یکجاہ کُش ایت۔ ”بے تواری مرگ ءِ نام اِنت“۔ جھان ءَ آ راج کہ زوراکی ءِ بگیری ءَ بےتوار بیتگ اَنت آیانی آسر بیمناک بیتگ۔ مھراب ھان ءِ رندگیری ءَ شھید بیتگیں شھید مئے راجی بامرد اَنت کہ آیاں زوراکی ءِ بگیری ءَ ھمک وڑیں جنجال اوپار کُرتگ،آزارجاھاں آزار سَگ اِتگ ءُ ژانگولیں لاشانی دروشُم ءَ دزکپتگ اَنت بلے چہ راجی زْرمبشت ءَ دزکش نہ بیتگ اَنت بلکیں زندگی ءِ ھر پیمیں وشی پُشت داتگ ءُ دیمونی ءِ لیکہ ءِ راہ گچین کُرتگ ءُ شھیدی ءِ گرانبھائیں مراداں سر بیتگ اَنت۔ اے نوک کول کنگ ءِ روچ اِنت۔بیا اِت کول کن ایں کہ ھمک پیمیں جنجالانی دیم ءَ پہ بچکندگ اوشت ایں ءُ داں مرادانی منزل ءُ راجی زْرمبشت ءِ سوبمندی ءَ جُھد ءَ برجاہ داریں۔ بلوچ راجی زْرمبشت (بی این ایم) بنشون: بی این ایم ، پنتاک | اکس: بی این ایم