ریڈیو زْرمبش بلوچی | ریڈیو زْرمبش بلوچی

پاکستان ءَ بلوچ سرڈگار کوشجاھے جوڑ کُرتگ۔بنجاھی جارکش بی این ایم

پاکستان ءَ بلوچ سرڈگار کوشجاھے جوڑ کُرتگ۔بنجاھی جارکش بی این ایم

OCT

11
11 / 10 / 2021 بی این ایم 64

شال: بلوچ راجی زْرمبشت( بی این ایم ) ءِ بنجاھی جارکش ءَ ھوشاپ ءَ پاکستانی لشکر ءِ گسانی نشانگ ءُ ماٹر آس دیگ چکچینی ءُ زوراکی ءِ دْرچ لیک اِتگ ءُ گْوشتگ کہ وھد ءِ ھمراھی ءَ پاکستانی زوراکی ءُ بلوچ چکچینی ھم گیش کنگ بیتگ۔انگت تاج بی بی ءُ رامز ءِ مانشاں آیانی کپُن لیگار نہ بیتگ اَنت کہ پاکستانی رستریں لشکر ءَ دو کودکیں زھگ گوں ماٹر گولا آں شھید ءُ یک زھگے ٹپی کُرتگ۔ جارکش ءَ گْوشتگ کہ مارٹر اُرش ءِ زدگ ءَ اتکگیں یک برات ءُ گھارے ھپت سالی اللہ بکش ء ابدل واھد ءُ پنچ سالی شراتون ء ابدل واھد شھید ءُ مسکان ء وزیر سک ٹپی بیتگ۔ھمے سال ءَ ھوشاپ ءَ پاکستانی لشکر ءِ رستراں یک زھگے مراد امیر بدکاری ءِ نشانگ کُرتگ اَت۔مراد امیر ءِ وئیل ءِ چیرترینگ ءَ لھتیں وتگڑیں ھندی میر ءُ نواباں کھول ءِ مردم زر ءُ بیھار ءِ سر ءَ بےتوار کنگ ءِ جُھد کُرت اَنت۔اگاں اے پندل سوبمند نہ بوت بلے رستریں پاکستانی لشکر ءَ ھچ سزا دیگ نہ بوت ءُ گوازی ءَ بیتگیں زھگ نشانگ کُرتگ اَنت ءُ یکبرے پد ءَ پیشداشتگ کہ آئی ءِ رستریں لشکر ھروھد ءَ بہ لوٹ ایت گوں بلوچ ءِ زندمان ءَ گْوازی کُرت کنت ءُ آئی ءَ کس داشت نہ کنت۔ آئی گْوشتگ کہ رامز ءَ کہ ھک نہ رس اِت کھول لاش ءِ ھواری ءَ زھرشانی ءَ نشت۔مرچی ھمے جاہ ءَ اللہ بکش ءُ شراتون ءِ کھول ھک لوٹگ ءَ اَنت۔مارا ایشانی بگیری ءَ گھگیری کنگ لوٹ ایت چے ءَ کہ کُشوک ھک نہ دنت۔ پاکستانی لشکر ءِ مردم نہ اَنت رسترانی یک مُچی یے۔اے لشکر گْوستگیں دو دھکاں بلوچستان ءَ بلوچ چکچینی،جنگی میار باری ءَ ھوار مردمگری ءِ بگیری ءَ کنگ ءَ اِنت۔ جارکش ءَ گْوشتگ کہ ملکناز، تاج بی بی یا ھیات ءِ وئیل بہ بیت یا مرچی اللہ بکش ءُ شراتون ءِ شھید کنگ،اے کُشت ءُ کوش مارا زھنی بنیاد ءَ ایردست کنگ ءِ جُھد اِنت۔چہ زورگریں استان ءَ مردمگری ءُ شرپمندیں دُژمنے ءِ اوست دارگ نہ بیت۔پاکستان ءِ ھواری ءَ بلوچ راجی پجار ءِ ھلاس بیگ ءَ ھوار بلوچ پسگانی کُشت ءُ کوش ھمک روچیگیں کار اِنت۔اِد ءَ شرپ ءُ ایمنی ءِ گون ءَ زندگی بوت نہ کنت۔ آئی گْوشتگ کہ گْوستگیں شپ ءَ پاکستانی لشکر ءِ چریکاں پروم ءِ میتگ ریش پیش ءَ شھید ھان جان ءِ گس ءِ سر اُرش کُرتگ کھول ءِ مردم زوراکی ءِ نشانگ کُرتگ اَنت ءُ گس پروشتگ ءُ سامان پروشتگ اَنت ءُ گرانھادیں سامان دُز اِتگ ءُ بُرتگ اَنت۔ پاکستانی استان رستری ءِ ھما جاہ سر بیتگ کہ شھیدانی کھولاں ھم پہ ایمنی ءَ زندگ بیگ ءَ نیل ایت۔اگاں پاکستان ھمے سرپد بیگ ءَ اِنت کہ پہ رستری ءُ زوراکیاں بلوچ راج ءَ بےتوار کنت گڑا اے آئی ءِ رد پھمی اِنت۔زندگیں راج پہ زوراکیاں بےتوار کنگ نہ بنت بلکیں پہ وتی راجی ارزیشت ءَ جنگ ءَ گیش ءُ توانمند کن اَنت کہ ایشی ءَ دُژمن ءِ آسر بےسوبی ءُ ایردستی راج ءِ سوبمندی ءِ دروشُم ءَ پدر بیت۔


بنشون: درشان | اکس: درشان