ریڈیو زْرمبش بلوچی | ریڈیو زْرمبش بلوچی

پاکستان ءِ گون ءَ بلوچ ءِ جیڑہ گپ ءُ تران نہ بلکیں آجوئی ءِ بنگپ ءِ سر ءَ اکوامتھدہ ءِ دزمانجنی ءَ لوٹ ایت_ چیئرمین ھلیل

پاکستان ءِ گون ءَ بلوچ ءِ جیڑہ گپ ءُ تران نہ بلکیں آجوئی ءِ بنگپ ءِ سر ءَ اکوامتھدہ ءِ دزمانجنی ءَ لوٹ ایت_ چیئرمین ھلیل

JUL

07
07 / 07 / 2021 بی این ایم 119

بلوچ راجی زْرمبشت (بی این ایم) ءِ سرکماش ھلیل ءَ پاکستانی مزن وزیر امران ھان ءِ بلوچانی گون ءَ گپ ءُ تران کنگ ءِ واھشت ءِ سر ءَ تران کنان ءَ گْوشتگ کہ پاکستان بلوچ راجی زْرمبشت ءِ راستی ءِ پجار،پریچ ءُ منّانک ءَ بےسوب بیتگ۔پمشکہ ھمک وھد ءَ وتگڑ ءُ نوکیں ھاکم بلوچ راج ءِ گون ءَ وتسریں گپ ءُ تران کنگ ءِ جار ءَ جنت۔پاکستان مدام راجی زْرمبشت ءِ راستی ءِ رد کنگ ءُ زْرمبشت ءِ گْواچنی سان ءَ زوال کنگ ءِ جُھد ءَ کنگ ءُ آیان اِنت۔بلے اے راستی جھان ءِ دیم ءَ چو روچ ءَ پدر اِنت کہ بلوچ راجی زْرمبشت یک ھندی ءُ مُھکمیں سیاسی زْرمبشت ئِے کہ ایشی ءِ جتائیں بھرگ برجاہ ءُ پہ آجوئی ءَ جونیں کِردے پیلو کنگ ءَ اَنت۔ چیئرمین ھلیل ءَ گْوشتگ کہ چہ امران ھان ءَ پیش چوشیں وتسریں جار  ذوالپکار الی بٹو، زیا الھک، پرویز مشرپ، بے نزیر بٹو، نواز شریپ، آسپ زرداری ءُ دگہ باز ءَ کُرتگ۔چوشیں جارانی مول بس ھمے پیشدارگ اِنت کہ  پاکستان ھم راجمستری ءُ گپ ءُ تران ءِ سر ءَ بیسہ کنت۔راستی اِنت کہ پاکستان یک استانی ءِ بنیاد ءَ انچُک با بیسہ نہ اِنت کہ گوں دیم پہ دیم ءِ دُژمن ءَ گپ ءُ تران کنگ ءِ بندات ءَ کُرت بہ کنت داں وھدے کہ دیم پہ دیم ءِ دُژمن وتی راجی توانمندی ءَ آئی ءَ پہ چوش کنگ ءَ لاچار مہ کنت۔ آئی گْوشتگ کہ بلوچ راجی زْرمبشت یک انچیں راستی یے کہ ھمک نوکیں پاکستانی ھاکم وتی توانمندی ءِ نشہ ءَ مست بیت ءُ واکداری ءِ کُرشی ءِ سر ءَ نند ایت۔بلے توانمندی ءِ نشہ کہ ھلاس بیت گڑا آئی ءِ دیم پہ دیمی گوں بلرچ راجی زْرمبشت ءِ راستی ءَ بیت۔گُڑی ءَ آ منّ ایت کہ بلوچ راجی زْرمبشت یک indigenous زْرمبشت ئِے۔ایشی ءَ پاکستانی ھاکم جتائیں نام دیئنگ۔برے کمو مردم،برے سَے سردار،برے ناشرکار یا برے دلگرانیں بلوچ۔پہ گپ ءُ تران ءَ رازی کنگ یا مدام پھلی لوٹگ یک ھسابی ءَ پاکستانی تھی منّگ اِنت کہ بلوچ راجی زْرمبشت گوں ناشرکاری ءُ زوراکی ءَ لپاشگ نہ بیت۔ بی این ایم ءِ چیئرمین ھلیل ءَ گْوشتگ کہ بی این ایم چوشیں وتسریں جاراں بلوچ راج ءُ بلوچ راجی زْرمبشت ءِ کمشرپی سرپد باں ءُ ایشی ءَ ھم گْوشاں کہ بلوچ راجی جیڑہ نی گوں پاکستان ءَ گپ ءُ تران کنگ ءَ باز دیم ءَ شُتگ ءُ بس آجوئی ءِ بُنگپ ءِ سر ءَ اکوامتھدہ ءِ دزمانجنی ءُ دیوان درکار اِنت۔ بنشون:درشان/اکس:چیئرمین ھلیل