ریڈیو زْرمبش بلوچی | ریڈیو زْرمبش بلوچی

بلوچستان ءَ مردمی اگبالانی لپاشگ ءِ بگیریءَ بی این ایم ءَ یونان ءَ زھرشانی کرتگ

بلوچستان ءَ مردمی اگبالانی لپاشگ ءِ بگیریءَ بی این ایم ءَ یونان ءَ زھرشانی کرتگ

OCT

05
05 / 10 / 2021 بی این ایم 76

بلوچ راجی زْرمبشت ( بی این ایم ) ءِ بنجاھی جارکش ءَ گوشتگ کہ سے اکتوبر ءَ یونان ءِ بنجاھی شھر ایتھنز ءَ یونانی پارلیمنٹ ءِ دیم ءَ بلوچستان ءَ پاکستانی زوراکی، زورانسری بیگواھی، کلپین میڑ ءُ نشانگ کنگ ءِ بگیری ءَ زھرشانی کنگ بیتگ۔ جارکش ءَ گوشتگ کہ زھرشانی کنوکاں بینر ءُ پوسٹر دست ءَ کرتگ آھانی سر ءَ بیگواھیں مردم ءُ شھیدانی اکس بیتگ اَنت۔ زھرشانی ءَ پنتانک بھر کنگ بیتگ ءُ ھندی مردم پاکستانی زوراکی ءِ بابت ءَ سرپدی داتگ اَنت کہ بلوچستان ءَ اے زوراکی ءَ ورنا، پیر ءُ زھگ کس پھریز نہ اَنت۔ زھرشانی ءَ تران کناں ءَ بی این ایم یونان ھنکین ءِ سرکماش کدیر ساگر ءَ گوشتگ کہ پاکستانی لشکر بلوچاں چست کنگ ءُ بیگواہ کنگ، کشگ ءُ ھلاس کنگ لوٹ ایت، دانکہ بلوچ پہ دائمی نوآبادیاتی ءِتہ ءَ بند بہ بیت۔ پاکستان ءِ چیریں ترامگیج، پولیس، لشکر ءُ آمیدگس بلوچ چکچینی ءَ ھوار اَنت۔ ھمے وڑ ءَ بلوچ ھمک روچ ءِ بنیات ءَ بے راھبندی، بے میار ءَ چیست کنگ ءُ بیگواہ ءُشھید کنگ بیگءَ اَنت۔ انچش کہ تاج بی بی ءُ رامز ناھک ءَ تیرگواری ءَ شھید کنگ بیتگ اَنت۔ انوگیں وھد ءَ بلوچستان ءَ آپ ءِ نھاد گران ااِنت بلےبلوچ ءِ ھون ارزان اِنت۔ کدیر ساگر ءَ چہ اکوام متھد ءُ یورپی یونین ءَ لوٹ کرتگ ءُ گوشتگ کہ شرپمندیں جھان ءَ دیم ءَ آھگ ءُ بلوچ چہ اے زوراکی ءَ رکینگ لوٹ ایت۔ آئی ءَ گوشتگ کہ نہ ایوکءَبلوچستان بلکیں اے دمگءِ ایمن ءُ وشھالی ءِ گچینیں راہ بلوچستان ءِ آجوئی اِنت۔ اے زھرشانی ءَ بی این ایم کارمنداں ھوار یونانی گھبودی گلءُ آدگہ بھرگانی مردم ھوار بیتگ اَنت۔


بنشون:بی این ایم/اکس:بی این ایم