ریڈیو زْرمبش بلوچی | ریڈیو زْرمبش بلوچی

بی این ایم ءَ ستمبر ءِ ماہ ءِ گزارش شنگ کُرتگ،40 ءَ گیش لشکرکشیاں 61 مردم بیگواہ، 8 مردم لشکر ءِ دست ءَ کُشگ،10 مردم ءِ کوش ءِ سْوب زانگ نہ بیتگ ءُ 11لاش دزکپتگ

بی این ایم ءَ ستمبر ءِ ماہ ءِ گزارش شنگ کُرتگ،40 ءَ گیش لشکرکشیاں 61 مردم بیگواہ، 8 مردم لشکر ءِ دست ءَ کُشگ،10 مردم ءِ کوش ءِ سْوب زانگ نہ بیتگ ءُ 11لاش دزکپتگ

OCT

04
04 / 10 / 2021 بی این ایم 76

بلوچ راجی زْرمبشت (بی این ایم) ءِ بنجاھی رسانکدری کارگشاد دلمراد ءَ ستمبر 2021 ءِ گزارش شنگ کُرتگ ءُ گْوشتگ کہ ستمبر ءِ ماہ ءَ سرجمیں بلوچستان ءَ پاکستانی لشکر ءِ 40 لشکرکشیاں61 مردم بیگواہ، 18 مردم کُشگ بیتگ کہ ایشانی تہ ءَ ھپت مردم پاکستانی لشکر ءِ دست ءَ کشگ بیتگ ءُ یک ورنایے پاکستانی لشکر ءِ چریکاں کُشتگ۔دہ مردم ءِ کوش ءِ سْوب زانگ نہ بیتگ۔60 مردم زورانسری بیگواہ کنگ بیتگ کہ ایشانی تہ ءَ 53 مردم پاکستانی لشکر ءَ آوار جتگ ءُ 5 مردم سی ٹی ڈی ءِ دگہ 3 مردم پجار نہ بیتگیں مردمانی دست ءَ بیگواہ کنگ بیتگ۔ کولواہ ءُ گچک ءَ بازیں میتگے پہ زور لڈگ ءِ پرمان دیگ بیتگ۔کیچ ءِ میتگ آسکانی بازار ءَ پاکستانی لشکر ءِ تیرگْواری ءَ تاج بی بی کُشگ ءُ آئی ءِ جود ٹپی بیتگ۔بلے دُرسیں منّانکاں ابید پولیس ءَ لشکر ءِ نام ءِ جاہ ءَ پجار نہ بیتگیں مردمانی نام ءَ ارزی نبشتگ۔ 18 مردم پاکستانی لشکر ءِ آزارجاھاں آجو بیتگ کہ ایشانی تہ ءَ گیشتریں مردم ھمے ماہ ءَ پاکستانی لشکر ءِ دست ءَ بیگواہ کنگ بیتگ اَنت۔ آئی گْوشتگ کہ پاکستانءَ بلوچ راجی زْرمبشت ءِ لپاشگ ءَ زوراکی ءُ رستری یے ءِ دُرسیں سیمسر گْوازینتگ اَنت۔چوشیں ھچ روچے نیست کہ بلوچ گس ماندارگ،بلوچ کشگ بیگ ءَ نہ اِنت،بلوچ ءِ مال ءُ مڈی لُٹ ءُ پُل بیگ ءَ نہ اِنت۔بلے مجال اِنت کہ پاکستانی رسانکدر،آمیدگس ءُ سول سوسائٹی ءِ نیمگ ءَ یک دانکے گْوشگ بہ بیت۔چہ ایشی ءَ ھمے پدر بیت کہ بلوچ ءُ پاکستان دو جتائیں راستی اَنت کہ بس پہ ھون ءِ ریچگ ءَ یکجاہ بیتگ اَنت۔ دلمراد ءَ گْوشتگ کہ بوت کنت پاکستان ھمے سرپد بیت کہ چہ زوراکی ءُ رستری ءَ بلوچ ھستی،زانت ءُ زْرمبشت ءُ گْوستانک ھلاس کنگ بیت بلے جھان ءَ زندگیں راجانی گْوستانک ءُ گھگیری چوشیں ھزاراں دروراں سریچ اَنت کہ راج پہ زوراکی ءُ رستری ھلاس کنگ نہ بنت۔دیریگیں گپے نہ اِنت ھمے زوراکی ءُ رستری پاکستان ءَ بنگلہ دیش ءِ سر ءَ ھم چکاس اِت اَنت بلے بنگلہ دیش مرچی جھان ءِ سْرپ ءَ پہ شانے اوشتاتگ۔بلے رُزوائی پاکستان ءِ کسمت ءَ بوت۔ بلوچستان ءَ ھم پاکستان ءِ آسر جتا نہ بیت۔ھمے کانود ءِ ابرم اِنت۔ آئی گْوشتگ کہ بلوچ مردمی اگبالانی گلاں بلوچستان ءَ مردمی اگبالانی لپاشگ ءِ سر ءَ گھتری آرگ لوٹ ایت چے ءَ کہ داں زْرمبشت ءِ دُرسیں بھر گھتر مہ بنت بلوچ راج ءِ جنجال گیش بیان بنت۔


بنشون :درشان /اکس:زْرمبش