ریڈیو زْرمبش بلوچی | ریڈیو زْرمبش بلوچی

بی این ایم جرمنی ھنکین ءِ چیردستی ءَ برلن ءَ زھرشانی کنگ بیتگ

بی این ایم جرمنی ھنکین ءِ چیردستی ءَ برلن ءَ زھرشانی کنگ بیتگ

OCT

03
03 / 10 / 2021 بی این ایم 106

بلوچ راجی زْرمبشت (بی این ایم) ءِ بنجاھی جارکش ءَ گْوشتگ کہ بی این ایم جرمنی ھنکین ءِ نیمگ ءَ شمبے ءِ روچ ءَ برلن ءَ بلوچستان ءَ زورانسری بیگواھی ءِ آماچیں سیاسی کارکنانی سی ٹی ڈی ءِ دست ءَ کلپیں میڑ ءِ نام ءَ نشانگ کنگ ءِ بگیری ءَ برلن گیٹ ءِ دیم ءَ زھرشانی کنگ بیتگ۔زھرشانی کنوکانی دست ءَ پلے کارڈز ءُ بینرز بیتگ۔زھرشانی کنوکاں بلوچستان ءَ زوراکیانی بگیری ءَ اوگام جتگ ءُ چہ جھان ءَ بلوچستان ءَ پاکستانی لشکر ءِ دست ءَ سیاسی کارکنانی نشانگ کنگ ءِ بگیری ءَ توار چِست کنگ ءِ دزبندی کُرتگ۔زھرشانی ءِ میان ءَ جرمن ءُ انگلش زبان ءَ پنتاک بھر ءُ بانگ کنگ بیتگ۔پنتاک ءِ تھا کلپیں میڑ ءِ نام ءَ جنگ بیتگیں سیاسی کارکنانی ءُ آدگہ زوراکیانی بابت ءَ سرپدی دیگ بیتگ۔ اے درگت ءَ بی این ایم جرمنی ھنکین ءِ سرکماش ھمل،کارگشاد اسگر الی ءُ بی آر پی جرمنی ءِ باسک پوز ءُ ھندی چاگردی کارکناں تران کُرتگ۔ترانکاراں پاکستان ءِ نیمگ ءَ بلوچستان ءَ سیاسی کارکنانی نشانگ کنگ،زورانسری بیگواہ کنگ ءَ پد کلپیں میڑ ءِ نام ءَ بیگواھیں مردمانی شھید کنگ ءِ اے نوکیں دْرچ مزنیں مردمی ناگیگی یے گْوشتگ۔ بی این ایم جرمنی ھنکین ءِ سرکماش ھمل ءَ گْوشتگ کہ چہ سالاں پاکستانی چیریں تْرامگیجانی دست ءَ بیگواہ بیتگیں سیاسی کارکنانی کلپیں میڑ ءِ نام ءَ کشگ بلوچ چکچینی ءِ دْرچ اِنت۔اگاں مردمی اگبالانی جھانی تْرامگیج بلوچستان ءِ اے زورکی ءِ سر ءَ بے توار بوت اَنت گڑا بلوچستان ءَ اے مردمی ناگیگی مزنیں جنجالے جوڑ بیت۔ بی این ایم جرمنی ھنکین ءِ کارگشاد اسگر الی ءَ تران کنان ءَ گْوشتگ کہ گْوستگیں دو ماھاں پاکستان ءِ پولیس، کاؤنٹر ٹیررازم ڈپارٹمنٹ ءَ 28 بیگواھیں بلوچ کلپیں میڑ ءِ نام ءَ کُشتگ کہ اے مردم چہ بازیں سالاں پاکستانی چیریں ترامگیجانی دست ءَ بیگواہ کنگ بیتگ اَنت۔ اسگر الی ءَ گْوشتگ کہ گْوستگیں دو دھکاں پاکستانی زورگریں لشکر ءَ بلوچستان ءَ بے کچ زوراکی کُرتگ کہ مردمانی بیگواہ کنگ ءَ بگر داں آزارجاھانی بند کنگ ءُ ھمک پیمیں آزار دیگ ءُ پد ءَ ژانگویں لاشانی دگ ءِ کش ءُ جنگلاں چگل دیگ ھوار اِنت۔بلے زورگریں استان ءِ زوراکی کم نہ بیگ ءَ اِنت بلکیں ھمک روچ استان ءِ زوراکی گیش بیان اَنت۔ اسگر الی ءَ گْوشتگ کہ گْوستگیں دو دھکاں پاکستان ءَ ھزارانی کچ ءَ بلوچ سیاسی کارکن زورانسری بیگواہ کرتگ۔پاکستان مردماں بے میار ءَ آوار جنت ءُ آزارجاھاں بند کنت۔نی پاکستان بلوچ بیگواھیں مردمانی زْرمبشت ءِ بےسوب کنگ ءَ بیگواھیں مردماں کلپیں پولیس میڑ ءِ نام ءَ کُشگ ءَ اِنت۔ایشی ءِ درور بی این ایم ءِ باسک سدام ءُ ابدُل اَنت کہ پاکستانی لشکر ءَ اپریل 2018 ءَ چہ ملیر کراچی ءَ زورانسری بیگواہ کنگ ءَ پد کلپیں میڑ ءِ نام ءَ شھید کرت اَت۔ بی آر پی ءِ باسک پوز ءَ سی ٹی ڈی ءِ نیمگ ءَ بیگواھیں مردمانی کلپیں میڑ ءِ وئیل گوں تْرندی ایرجتگ ءُ گْوشتگ کہ اے مئے راجی زمہ واری اِنت کہ ما بلوچستان ءِ سر ءَ بیتگیں زوراکیاں باھبر بہ بین ءُ جھان ءَ سرپدی بہ دئیں۔اگاں ما بے توار بوتیں گڑا پاکستان بلوچ راجی زْرمبشت ءِ لپاشگ ءَ ھرپیمیں زوراکی کنگ ءَ چک ءُ پد نہ بیت۔ آئی گْوشتگ کہ مامرچی شرپمندیں جھان ءِ دیم ءَ بلوچستان ءَ پاکستانی زوراکیاں آشکار کنگ ءَ ایں۔


بنشون:درشان/اکس:بی این ایم